1 "Iwatambika Walawi, awala wose wa likabila lya Lawi, waleke kubokela isi yoyose iwe yawo mna Isiraeli, wawo watsokala kwa ukuja ipfinu ipfilapfighwa kwa IMNDEWA na awo uwo ulisi wawo. 2 Wawo waleke kubokela isi yoyose iwe yawo ka pfaghobokela ghamakabila ghangi gha Isiraeli. Wawo watsobokela ipfinu apfila pfayakwing'ighwa IMNDEWA, ka apfila yeye pfayalongile. 3 Ing'ombe au ing'olo yang'achinjighwa yawe nambiko, iwatambika weng'ighwe chidali, na makanza meli na pfinu pfili munda. 4 Muweng'e pfijo pfenu pfamlimbula, idipfai yenu na mapfuta, na mighala ikwandusa kughanighwa ye wang'olo wenu. 5 Kwaapfila mna ghamakabila ghenu ghose, IMNDEWA, Imulungu wenu kawasaghula Walawi ne wana wawo wamale weme na walisang'anile litaghwa lye IMNDEWA Imulungu."

6 "Mlawi wowose yang'abama mwenyegho kutsa kulawa mna ghumji ghwoghwose ghwa Isiraeli ghwayokala na kughenda hanu hayosaghula IMNDEWA, Imulungu wenu, 7 aho kodaha kusang'anila IMNDEWA, Imulungu wake ka Walawi wayaghe pfawosang'ana hambele ha IMNDEWA. 8 Naye katsakwing'ighwa ipfinu ka pfawakwing'ighwa wayaghe, ipfilapfighwa pfiwe nambiko hata ka katsobokela pfinu ipfilawa mna tsimali tsawoutsa ndughu tsake."

9 "Hamkwingila mna isi iyomwing'ani IMNDEWA Imulungu, mleke kwigha ipfihendo ipfimwihila IMNDEWA pfe wanu iwokala ako. 10 Kuleke kulawila munu wowose mna mwemwe iyombititsa mwanaghe ipinga au mmale mmoto yawe nambiko ya kulakatsighwa, wala kuleke kulawila mtowa lamli, iyotambula ighatsolawila, iyolaghula wala imuhawi, 11 wala mlogha wayaghe, wala yana ipfinyamkela, wala iyolonga na imitsimu, wala munu iyowalomba iwafile. 12 Kwaapfila imunu iyotenda ipfinu apfino komwihila IMNDEWA Imulungu, na kwa ukutenda agho IMNDEWA, Imulungu wenu kowawinga iwanu awo hambele henu. 13 Lekeni mwemwe mleke kwoneka mna matotso hambele ha IMNDEWA, Imulungu wenu."

14 Iwanu iwokala mna isi yamghenda kuisola wowinza aghala ghawolonga watowa lamli na walaghutsi. Lekeni mwemwe, IMNDEWA, Imulungu wenu kowaghoma kutenda apfo. 15 IMNDEWA, Imulungu wenu katsomwing'ani nabili iyali ka nene kulawa mna mwemwe, namwe mumtegheletse yeye.

16 "Achi chicho chamumlombile IMNDEWA, Imulungu wenu akula Horebu (Chidunda Sinai) hamtingane hamwe na hamlongile, ‘Tuleke kuhulika keli litsi lye IMNDEWA, Imulungu wetu wala kwona keli ghumoto mkulu ka ghuno, hela tutsakufa.’ 17 Naye IMNDEWA tsakanongela, ‘Chawalongile walongesa.’ 18 Nitsowasaghulila inabii kulawa mna ndughu tsawo ka ghweghwe, na nitsomwing'a cha ukulonga mna mlomo ghwake, naye katsowalongela ghose ghanitsomlaghitsa. 19 Munu wowose iyolema kutegheletsa achila chayolonga yeye kwa taghwa lyangu, nene mwenyegho nitsomhigha. 20 Lekeni inabii iyolonga kwa taghwa lya milungu ingi, au iyolonga kwa litaghwa lyangu ichinu chila nene simlongele yalonge baye, inabii ayo yakomighwe."

21 "Lekeni mwemwe mwodaha kulonga, ‘Tudahatse kumanya imbuli ila ng'ailongile baye IMNDEWA?’ 22 Inabii yang'alonga kwa litaghwa lya IMNDEWA, na chayalongile ng'achitendeka baye, wala ng'achilawila baye, acho chicho ing'achilongighwe baye na IMNDEWA. Inabii ayo kalonga kwa ichidandali. Apfo mleke kumpfuka."