1 "Tegheletseni mwemwe Waisiraeli! Leloli mwa habehi kuloka ghumto Yoridani kughenda kusola isi ng'ulu na iwokala iwanu wengi na wene ngupfu kubita mwemwe, na miji ye iwanu awo mikulu na itsungulutsighwa ubanda iupfika kulanga. 2 Wanu wenyegho Waanaki, awo wana ngupfu, na watali, ka apfila pfamuwamanyile na pfamuhulike iwanu wowalonga, ‘Yuhi yodaha kwima hambele ya Waanaki?’ 3 Lekeni mmanye ghendo ka IMNDEWA, Imulungu wenu yuyo iyowalongolela ka ghumoto ighulakatsa, ng'atsokawa baye kuwakoma na kuwahuma hambele yenu, mtsowawinga na kuwatenda wahupe ghendo ka Imulungu pfayawalongele."

4 "IMNDEWA, Imulungu wenu hayomalitsa kuwawinga hambele yenu, mleke kwilongela wenyegho pfino ‘Imulungu kangala ahano kusola isi aino kwa ukutogholighwa kwangu.’ Ila Imulungu kawawinga iwanu wano kwaapfila wawo weha. 5 Mtsoisola isi yawo si ka mwemwe mnogha au mwotogholighwa, ila mwoisola kwaapfila wanu awo weha. IMNDEWA, Imulungu wenu kowawinga wanu wano hambele yenu, kobama yachike achila chayelahile na iwahenga wenu, kwa Aburahamu, Isaka, na Yakobu. 6 Apfo mmanye ghendo ka IMNDEWA, Imulungu wenu komwing'ani isi ino inoghile si ka mwemwe mnogha, ila mwemwe mwa wasughu. 7 Mleke kwisemwa pfamumtendile IMNDEWA, Imulungu wenu yone maya akula kunyika. Tangiya hamlawile mna isi ya Misiri mbaka hampfikile hano, mwemwe mghendelela kumlemela IMNDEWA. 8 Namwe mumtenda IMNDEWA yone maya hane chidunda cha Horebu, naye tsakona maya na kabama yawakome. 9 Hangeluke kuchidunda kubokela mabamba ghe ghamabwe ghandikighwe lilaghano lyayekile Imulungu na mwemwe, ng'ala kuchidunda matsuwa alubaini chilo na misi. Sijile chijo chochose baye wala kunwa matsi."

10 "Kuya IMNDEWA kangaya mabamba meli ghe ghamabwe ghandikighwe na ichidole cha Imulungu. Mchanya mwa ghamabwe agho tsa mna ghamalaghitso ghose gha IMNDEWA ghayawalongele akula kuchidunda kulawa hane ghumoto, mna litsuwa lya mtingano. 11 Matsuwa alubaini haghamalile, ghanikalile chilo na misi, IMNDEWA kangaya mabamba meli ghe ghamabwe ighandikighwe lilaghano."

12 "Kuya Imulungu kanongela, ‘Uhulumke sambi baha, kwaapfila wanu wako wauwalapfile kulawa Misiri wagha. Waghaleka aghala ghaniwaghitse na wetendela wenyegho chinyagho cha kulubula.’ "

13 "Na IMNDEWA kanongela, ‘Niwona wanu wano, na ulole awano wasughu ghendo. 14 Undeke niwakome na nilibaghuse taghwa lyao ahano muisi. Na nitsokutenda ghweghwe uwe na wanu wengi, na wane ngupfu kubita wawo.’ "

15 "Apfo nihunduka na kuhulumka kulawa kuchidunda aku nikinda ghamabamba meli ighandikighwe lilaghano mna ghamoko ghangu. Na ghumoto ghung'ali ghukwaka mna chidunda. 16 Handolile, nikangawala ghendo hambonile mwemwe ma mumtendela nzambi IMNDEWA, Imulungu wenu, mwitendela wenyegho chinyagho che imwana we ng'ombe. Msumka kughaleka aghala ghose ghayawalaghitse IMNDEWA. 17 Apfo nikinda ghamabamba meli gha ghamabwe, nighasa kulawa mna ghamoko ghangu, nighabena aku mwemwe mwolola. 18 Kuya nifunama keli hambele ha IMNDEWA Imulungu matsuwa alubaini, chilo na misi, ka pfanongole kutenda. Sijile baye chijo chochose wala kunwa matsi. Nenda apfo kwaapfila mwemwe mumtendela ghehile IMNDEWA, na mumghobola yeye yone maya. 19 Tsaniipfuka imaya ye IMNDEWA, kwaapfila yeye tsakona maya ng'ani na kabama kuwakomani, lekeni IMNDEWA kanitegheletsa keli. 20 Na IMNDEWA tsakamghudubukila Aruni, kabama yamkome, na baho nimlomba yaleke kumkoma. 21 Kuya nichisola ichinu chila chihile, imwana yula we ng'ombe yamumtendile, na nimlakatsa mna ghumoto. Kuya nimhondahonda na nimsagha, kawa ka timbwisi, kuya nilyasa litimbwisi alyo mna chikolongo ichihulumka kulawa kuchidunda. 22 Pfipfila mwemwe mumtenda IMNDEWA yone maya akula Tabera, Masa na Kibroti Hataava. 23 Na IMNDEWA hayawatumile kulawa Kadeshi Barinea, kalonga, ‘Mgheluke na mkaisole isi yanimwing'eni iwe yenu.’ Lekeni mwemwe mlema laghitso lye IMNDEWA Imulungu wenu. Ng'amumtoghole baye wala ng'amumtegheletse baye. 24 Muwa wanu wa kumlema IMNDEWA, tangiya haniwamanyile mwemwe."

25 "Nifunama hambele ye IMNDEWA matsuwa agho alubaini chilo na misi kwaapfila IMNDEWA tsakalonga yang'awakomile. 26 Nimlomba IMNDEWA nilonga, ‘Ghwee IMNDEWA Imulungu uleke kuwakoma iwanu wano. Iwanu wano wa kwako ghweghwe mwenyegho, wauwakombole kwa ngupfu yako na wauwalapfile ako Misiri kwa ghumoko ghwako ghune ngupfu.’ 27 Uwakumbuke watumighwa wako, Aburahamu, Isaka na Yakobu, wala uleke kulola usughu wawo, wala ukwiha kwawo, wala inzambi yawo. 28 Hela iwanu wa isi ya Misiri, isi yautulapfile watsolonga, ‘Kwaapfila IMNDEWA ng'adahile baye kuwasola na kuwaghala mna isi iyelaghane nawo.’ Au wodaha kulonga, ‘Tsakawasola na kawaghala kunyika yawakomele kuko kwaapfila tsakawahila. 29 Lekeni wawo wa iwanu wako, iwanu wauwalapfile kwa tsingupfu tsako na kwa ghumoko ghwako ighugholoke.’ "