1 "Kuya Musa na iwanzehe wa Isiraeli wawalongela iwanu, ‘Ghakindeni ghamalaghitso aghano ghanimwing'ani leloli.’ 2 Hamloka ghumto Yoridani na kwingila mna isi iyomwing'ani IMNDEWA Imulungu wenu, mwimitse mabwe meli makulu na mghakulughe. 3 Mghandike malaghitso ghose mna ghamabwe ghano hamloka na kwingila mna isi iyomwing'ani IMNDEWA, Imulungu wenu, isi inoghile kwa ukulima na kufughila, ka apfila IMNDEWA, Imulungu we iwahenga wenu pfayawalongele. 4 Na hampfika kumwambu mwa ghumto Yoridani, mghemitse ghamabwe ghano mna chidunda Ebali ka pfaniwalaghitsa leloli na mghakulughe."

5 Baho mumtsengele matsabahu ye ghamabwe IMNDEWA, Imulungu wenu, na hamuhitsenga, mleke kughasongola ghamabwe agho kwa chinu chochose cha chuma. 6 Mtsomtsengela IMNDEWA, Imulungu wenu matsabahu kwa ghamabwe ng'ana ghasongolighwe baye. Imatsabahu yamtsomlapfila IMNDEWA, Imulungu wenu tsinambiko tsa ukulakatsighwa. 7 Baho mlapfe tsinambiko tsenu tsa kukala tseghamba na mtsije, na mdeng'elele hambele he IMNDEWA, Imulungu wenu. 8 Namwe mwandike pfinoghile ghamalaghitso ghose mna ghamabwe agho ghamghakulughe.

9 Kuya Musa na Walawi iwatambika, wawalongela Waisiraeli wose, "Mwinyamale, mwemwe Waisiraeli na mnitegheletse. Leloli ino mwemwe mwa iwanu wa IMNDEWA, Imulungu wenu. 10 Apfo mtegheletse chayowalongela IMNDEWA, Imulungu wenu na mkinde imiko yose na ghamalaghitso ghose ghanimwing'ani leloli."

11 Tsuwa lilyo, Musa kawalaghitsa keli Waisiraeli, kalonga, 12 "Hampfika kumwambu mwa Yoridani, makabila ghano gheme mna chidunda cha Gerizimu wakemelele tsibalaka kwa iwanu, likabila lya Simoni, lya Lawi, lya Yuda, lya Isakari, lya Yosefu, na lya Banjamini. 13 Na makabila ghano gheme mna chidunda cha Ebali wakemelele ghamalighito, kabila lya Rubeni, lya Gadi, lya Asheli, lya Zabuloni, lya Dani, na lya Nafutali. 14 Kuya Walawi wawalongele iwanu wa Isiraeli kwa kukemelela."

15 "Yalighitighwe imunu ayula iyosongola au iyolubula chinyagho che libwe, che mbiki, na che chuma na kuchitambikila kwa chinyelenyele. Ipfinyagho pfino pfawosongola iwanu pfomwihila IMNDEWA."

Kuya iwanu wose wedike walonge, "Amina!"

16 "Yalighitighwe imunu yula iyolema kumtegheletsa mai wake na aba wake."

Kuya iwanu wose wedike walonge, "Amina!" 17 "Yalighitighwe imunu wowose yula iyosoghetsa ilibwe lya ghumbaka ghwa miyaghe."

Na iwanu wose wedike walonge, "Amina!"

18 "Yalighitighwe imunu yula iyomlongotsa ichifita mna inzila imwaghisa."

Kuya wanu wose wedike walonge, "Amina!"

19 "Yalighitighwe imunu wowose yula iyowema ghawobamighwa weng'ighwe iwagheni, ipfitsuka na iwachuwa."

Kuya wanu wose wedike walonge, "Amina!"

20 "Yalighitighwe imunu yula iyowasa na mwehe wa aba wake, kwaapfila ayo komghuma chinyala aba wake."

Kuya iwanu wose wedike walonge, "Amina!"

21 "Yalighitighwe munu yula iyowasa na imnyama."

Kuya iwanu wose wedike walonge, "Amina!"

22 "Yalighitighwe immale iyowasa na lumbu wake, yawe koneka naye au koneka kunze."

Iwanu wose wedike walonge, "Amina!"

23 "Yalighitighwe immale wowose yula iyowasa na mai mkwe wake."

Iwanu wose wedike walonge, "Amina!"

24 "Yalighitighwe imunu yula iyomkoma miyaghe chinyelenyele."

Kuya iwanu wose wedike walonge, "Amina!"

25 "Yalighitighwe imunu iyobokela hongo ili yamkome imunu yalihela totso."

Iwanu wose wedike walonge, "Amina!"

26 "Yalighitighwe imunu yula iyolema kukinda ghamalaghitso na ghamalangulitso gha Imulungu."

Kuya iwanu wose wedike walonge, "Amina!"