1 "Mwalangitse kughakinda malaghitso ghose ghanimlaghitsani leloli, ili muwe waghima na mwongetseke na mwingile mkaisole isi ila iwe yenu IMNDEWA, Imulungu wenu iyelahile kuweng'a iwahenga wenu. 2 Mkumbuke IMNDEWA, Imulungu wenu pfayawalongotse mna ghumwanza ghwenu mna nyika kwa miyaka ino alubaini, na kuwaghetsa ili yamanye ighali mmoyo mwenu, ka mtsokinda malaghitso ghake au ng'amtsokinda baye. 3 Kawadununza, kawaleka mkale na nzala, hambele kaweng'ani imana mje, ichijo acho ng'amchimanyile baye wala iwahenga wenu, katenda apfo ili yawalangulitse ka imunu ng'okala mghima kwa chighate chiliyeka baye, lekeni kwa chila chinu chayolonga IMNDEWA. 4 Maghwanda ghenu ng'aghalalile baye wala mighulu yenu ng'aipfimbile baye mna imiyaka ayo alubaini. 5 Pfipfila mmanye ghendo mna mimoyo yenu imunu pfayomfunda imwanaghe, pfipfo IMNDEWA pfayomfundani. 6 Lelo mghakinde ghamalaghitso ghe IMNDEWA, Imulungu wenu, muwinze nzila tsake na kumpfuka yeye. 7 Kwaapfila IMNDEWA, Imulungu wenu katsowaghala mna isi inoghile, isi ina ipfikolongo pfa ghamatsi, tsimbwibwi, na pfisima pfe ghamatsi igholawa mlwanda na mpfidunda. 8 Isi ine ngano na shayili, minzabibu, mitini na mikomamanga, isi ine mapfuta gha mitseituni na uki. 9 Isi ayo ina pfijo bwelele, na ng'amtsohungikighwa na chinu chochose baye, isi ayo ina mabwe gha chuma na mna pfidunda pfake mwodaha kihimba shaba. 10 Mtsakuja na kwighuta, mtsolonga mighede kwa IMNDEWA, Imulungu wenu kwa isi inoghile iyaweng'ile."

11 "Mwalangitse mleke kumsemwa IMNDEWA, Imulungu wenu, kwa kuleka kughakinda ghamalaghitso ghake, imiko yake, na malamtsi ghake ghanimlaghitsani leloli. 12 Hamtsakuja na kwighuta, na hamtsotsenga ing'anda inoghile na kukala mumo, 13 na ng'ombe wenu na ng'olo wenu hawakongetseka, nzahabu, na fetsa tsenu na pfose pfamli napfo hapfitsakongetseka, 14 ghumoyo ghwenu ghuleke kwighoda na kumsemwa IMNDEWA, Imulungu wenu iyawalapfile Misiri, mna isi ya utumwa. 15 Kawalongotsani mna inyika ila ng'ulu ighela wogha, ine wanzoka na inge, inyika isakale na ilihela matsi, kawalapfila ghamatsi kulawa mbambalawe. 16 Kaweng'ani imana ako kunyika, ichijo acho ng'awachimanyile baye iwahenga wenu. Katenda apfo yawadununze na yawaghetse, ili hambele mbwede. 17 Mleke kwilongela mna mimoyo yenu, ‘Ingupfu yangu na ukudaha kwangu kungaya tsimali tsino tsose.’ 18 Lekeni mkumbuke ghendo ka IMNDEWA, Imulungu wenu yuyo iyoweng'a tsimali atso, ili yaghendelele kulikinda laghano lyayekile ne iwahenga wenu, ka pfaili leloli ino. 19 Lekeni mng'amsemwa IMNDEWA, Imulungu wenu na kutegheletsa milungu ingi na kuitambikila, leloli ino nowakanya mtsokomighwa ghendo. 20 Ka iwanu wa isi tsila pfawakomighwe na IMNDEWA hambele yenu, namwe pfipfila mtsokomighwa ka wawo kwa kuleka kumtegheletsa IMNDEWA, Imulungu wenu."