1 Musa kaghendelela kuwalongela, "Hamghenda kwitowa ne wanu iwowehila mwemwe na mwakona wawo wana iwafalasi wengi na mituka ya kukweghighwa na falasi na wanu wengi kubita mwemwe, mleke kuwapfuka kwaapfila IMNDEWA Imulungu wenu iyawalapfile Misiri kahamwe namwe. 2 Hamsoghela habehi kwitowa, mtambika yalongole, yawalongotse iwanu. 3 Naye yalonge, ‘Tegheletsani mwemwe muwamale wa Isiraeli, leloli mwoghenda kwitowa na iwowehilani, mleke kutenyuka ghomoyo, wala kuwapfuka, wala ukughudema, wala mleke kwingilighwa na wogha, 4 kwaapfila IMNDEWA Imulungu wenu katselongotsa namwe kuwatowela, naye katsowatenda muhume.’ 5 Kuya iwakulu wa ing'ondo watsowalongela iwanu, ‘Apfi kuna munu yatsengile ing'anda na ng'ana yaitsindule baye? Leka yoke ukaye hela katsakufa hatutsetowa nawo na munu yungi katsoitsindula. 6 Angu kuna munu yahandile mitsabibu na ng'ana yaghaje baye ghamatunda ghake? Mlekeni yoke ukaye kwaapfila yang'afa kwing'ondo munu yungi katsakuja ghamatunda ghake. 7 Pfihi hana munu kamlapfila tsengele ipinga, na yang'ali kumkwela? Mlekeni yoke ukaye kwaapfila yang'afa ako, pinga ayo katsokwelighwa na mmale yungi.’ "

8 "Iwakulu wa ing'ondo pfipfila watsowalongela iwanu keli, ‘Pfihi hana munu iyopfuka na iyatenyuke ghumoyo? Yoke ukaye hela katsowatenda wayaghe wapfuke na watenyuke ghumoyo.’ 9 Iwakulu hawomalitsa kuwalongela iwanu, wawasaghule pfilongotsi wa kulongotsa pfikosi. 10 Hamsoghela habehi kuitowa na ghumji ghwe iwanu, muwaghutse ka wotoghola ukuleka kwitowa na mwemwe. 11 Wang'atoghola ukuleka ukwitowa namwe, nawo wowapfughulila imilango yawo, apfo iwanu wose wali mumo watsakuwa watumwa wenu, nawo watsowasang'anila tsing'onde tsenu. 12 Lekeni wang'alema, nawo wakwanza kwitowa namwe, mghupfingile ghumji aghwo, 13 na IMNDEWA, Imulungu wenu hayotsomwing'ani ghumji aghwo mna ghamoko ghenu, mkomeni chila mmale iyali mumo kwa mimaghe yenu. 14 Lekeni mwodaha kwisolela wenyegho iwapinga, iwana, imifugho, na chila chinu achila ichili mumo. Na mwodaha kudeng'elela ipfinu pfe wanu iwowehila, apfila IMNDEWA, Imulungu wenu pfayomwing'ani. 15 Muitendele pfipfo imiji yose ili kutali na isi yamtsokala."

16 "Lekeni mna imiji iyomwing'ani IMNDEWA, Imulungu wenu iwe yenu, mleke kuleka chochose ichihumula. 17 Wakomeni wanu wose, Wahiti, Waamori, wakanani, Waperizi, Wahivi na Wayebusi ka IMNDEWA, Imulungu wenu pfayamlaghitseni, 18 hela watsowafunda mtende pfinu pfa kumwihila Imulungu, ka pfawoitambikila imilungu yawo namwe mtsomtendela ghehile IMNDEWA, Imulungu wenu. 19 Hamghupfingila ghumji na kughusola ghuwe ghwenu, mleke kuihinya imibiki ili mumo kwa kuighana ne hoya, kwaapfila mtsakuja ghamatunda ghe mibiki ayo. Angu imibiki wanu mbaka nayo muipfingile? 20 Lekeni mwodaha kughana mibiki ingi ili mtengenetsele tsingatsi, na minala itsomwapfila kuipfingila imiji itowa namwe mbaka ighwe."