1 "IMNDEWA, Imulungu wenu hayatsowaghala mna isi yamghenda kuisola iwe yenu, katsowawinga wanu wali muisi amwo, Wahiti, Wagirigashi, Waamori, Wakanani, Waperizi, Wahivi, na Wayebusi, iwanu awo wa tsiisi atso saba wakulu na wana ngupfu kubita mwemwe. 2 Kuya IMNDEWA, Imulungu wenu hayatsoweka iwanu awo mna ghamoko ghenu, muwatowe, na muwakome ghendo, mleke kwilaghana nawo, na mleke kuwonela libatsi. 3 Mleke kwikwela nawo, mleke kuwaleka wanenu wamale wawakwele wana wawo mapinga, au wanenu iwapinga wakwelighwe nawo. 4 Mng'atenda apfo wawo watsowaghitsa wanenu kuitegheletsa milungu ingi, naye IMNDEWA katsowonela maya mwemwe na ng'atsokawa baye kuwakoma. 5 Lekeni muwatendele pfino, mbomole matsabahu tsawo, tsituleni tsingutso tsawo tsa ghamabwe, mupfighane pfinyagho pfawo pfa Ashera, na mpfilakatse pfinyagho pfawo pfo kusongola. 6 Kwaapfila mwemwe mwa wanu iwenzeluke we IMNDEWA, Imulungu wenu. Kamsaghulani mwemwe kulawa mna iwanu wose iwali muisi muwe iwanu wake mwenyegho."

7 "IMNDEWA ng'awakundile baye mwemwe wala ng'awasaghuleni mwemwe baye kwaapfila tsa mwawengi kubita wanu wose, ila tsakawakunda na kawasaghula hata ka tsa mwa chidogho kubita wanu wose. 8 Lekeni ilawila apfo kwaapfila IMNDEWA, Imulungu tsakawakunda na tsakabama kutenda achila chayelahile ne wahenga wenu, chinu acho chicho ichimtendile yeye yawaghombole mwemwe kwa ngupfu tsake ng'ulu mlawe mna isi ayo ya utumwa, na mna ghumoko ghwa Farao mfalume wa Misiri. 9 Apfo mmanye ghendo IMNDEWA, Imulungu ka Imulungu, yeye ka Imulungu yotogholighwa, yokinda laghano lyake, kotenda wende kwa pfeleko pfingi pfe wanu awala iwomkunda yeye, na iwokinda ghamalaghitso ghake. 10 Lekeni yeye katsowaliha awala wose iwomwihila, wala ng'atsokawa baye, katsowahigha awala iwomwihila. 11 Apfo mwalangitse kukinda imiko, ghamalaghitso, na malamtsi ghaniwalaghitsa leloli."

12 "Mng'aghategheletsa malaghitso aghano, na mng'aghakinda na kughatenda, naye IMNDEWA, Imulungu wenu katsokinda laghano lyake na kuwatendela wende ka pfayelahile kwa iwahenga wenu. 13 Katsowakunda, na kuwamotetsa namwe mtsakongetseka na kuwa na wana wengi, katsomotetsa imighunda yenu, ili mpate pfijo pfingi, dipfai na mapfuta, na kuweng'ani iwanyama wengi, wang'ombe na ng'olo wengi. Katsowamotetsa kwa kumwing'ani ghano ghose mna isi iyelahile kwa iwahenga wenu ka katsoweng'ani mwemwe. 14 Mtsomotetsighwa kubita wanu wangi, kutsakuwa kuduhu immale wala ipinga mna mwemwe iyalihela mwana wala iwanyama wenu nawo ng'awatsokala baye bila wana. 15 IMNDEWA wenu katsoghalapfa ghamatamu ghose mna mwemwe, na kuduhu utamu wihile utsowapatani mwemwe ka aula uwapatile akula Misiri, lekeni utamu awo katsoweng'a awala iwowehila mwemwe. 16 Namwe wakomeni iwanu wose iyowaghalila IMNDEWA, Imulungu wenu mna ghamoko ghenu, mleke kuwonela libatsi ghendo, mleke kuitumikila milungu yawo, kwaapfila alyo litsakuwa mtegho kuna mwemwe."

17 "Mwodaha kwilongela wenyegho, ‘Iwanu awano wana ngupfu na wa wengi kubita twetwe, tutsodahatse kuwawinga mna isi yawo?’ 18 Lekeni mleke kuwapfuka, mkumbuke achila IMNDEWA, Imulungu wenu chayamtendile Farao na wanu wake wose wa Misiri. 19 Mkumbuke utamu wihile, ipfihulo, na ipfinzonza, na ghumoko ghune ingupfu, na ighugholoke pfamwonile kwa nenge tsenu wenyegho IMNDEWA, Imulungu wenu pfayatumile kuwakombola, apfi pfipfo pfamtsowatendela iwanu wala wamuwapfuka. 20 Kuya IMNDEWA, Imulungu wenu katsowaghalila wanzukwi wawakome iwanu awala iwepfisa mleke kuwona. 21 Mleke kuwapfuka, kwaapfila IMNDEWA, Imulungu wenu, iyokala mghati mwenu, yeye kamkulu na kopfukighwa. 22 Yeye katsowawinga iwanu wano chidoghochidogho aku mwolola kwa tsinenge tsenu. Ng'ambamighwa baye kuwawinga mala lumwe, mng'atenda apfo wanyama wa kwibagho watsakongetseka kuna mwemwe. 23 Lekeni IMNDEWA, Imulungu wenu katsowaghela mna ghamoko ghenu na katsowatenda wawelukeweluke, mbaka wamale kukomighwa. 24 Naye katsowaghela iwafalume wawo mna ghamoko ghenu, mtsowakoma na mtsowasemwa ghendo hasi ha kulanga, kuduhu munu iyodaha kwima hambele henu, kuwaghoma mbaka mmalitse kuwakoma. 25 Mpfihinye pfinyagho pfawo na mpfilakatse mmoto, mleke kusulukila nzahabu wala fetsa, na mleke kusola pfiwe pfenu, agho ghatsakuwa mtegho kuna mwemwe, kwaapfila IMNDEWA, Imulungu wenu kopfihila. 26 Mleke kughala pfinyagho mmakaye mwenu, hela mtsolighitighwa ka pfinyagho apfo, mpfihile na kupfilema ghendo, kwaapfila pfilighitighwa na Imulungu."