1 "Aino iyo imiko, na malaghitso ghambamighwa kughakinda matsuwa ghose ghamkala mna isi iyomwing'ani IMNDEWA, Imulungu we iwahenga wenu, iwe yenu. 2 Muhinye ghendo hanu hohose ahala iwanu hawotambikila milungu yawo, mna pfidunda pfikulu na pfidunda pfidodo, na hasi ha chila mbiki ghune mitsani mibisi. 3 Namwe mtsibene ghendo matsabahu tsawo, na tsingutso tsawo, na mpfilakatse ipfinyagho pfa imilungu yawo ya Ashera mna ghumoto, na mghabaghuse ghendo mataghwa gha milungu yawo hanu aho."

4 "Wala mleke kumtambikila IMNDEWA, Imulungu wenu ka wawo pfawotambikila milungu yawo. 5 Lekeni mtsoghenda hanu hohose ahala IMNDEWA, Imulungu wenu hayatsohasaghula mna makabila ghose, ili yeke taghwa lyake na hawe hanu hake ha ukukala, ako kuko kwamtsoghenda. 6 Ako mghale nambiko tsenu tsa kulakatsighwa, na tsinambiko tsingi, na tsaka tsenu, nambiko tsenu tsa kwinulighwa, na nambiko tsenu tsamlapfa kwa kubama wenyegho, na tsinambiko tsamwilahile kulapfa, na chila mnyama yanduse kwelekighwa wa wang'olo, wamene na wang'ombe. 7 Ako mtsakuja hambele ya IMNDEWA, Imulungu wenu, na mtsodeng'elela hamwe na wanu wo kaye yenu kwa ghose ghamtenda kwa ghamoko ghenu kwaapfila IMNDEWA, Imulungu wa iwahenga wenu kawabaliki."

8 "Ghamatsuwa agho haghatsopfika mleke kutenda ka pfatutenda leloli ahano, chila munu kotenda ka pfayobama imwenyegho, 9 kwaapfila ng'ana mpfike baye hanu ha ukubwihila mna isi IMNDEWA, Imulungu wenu iyomwing'ani iwe yenu. 10 Lekeni mtsoloka ghumto Yoridani na kukala mna isi iyomwing'ani IMNDEWA, Imulungu wenu iwe yenu, naye katsowatenda mbwihile kulawa kwe wanu wose iwowahila, namwe mtsokala tseghamba. 11 Apfo hanu aho IMNDEWA, Imulungu wenu hayatsohasaghula hatsakuwa hanu ha ukukala litaghwa lyake, aho mtsoghala chila chinu chaniwalaghitse, nambiko tsenu tsa kulakatsighwa, na tsinambiko tsingi, na tsaka tsenu, na nambiko tsenu tsa kwinulighwa, na tsinambiko tsamwilahile kulapfa. 12 Baho mdeng'elele hambele ha IMNDEWA, Imulungu wenu, hamwe na iwanenu wamale na wapinga, iwatumwa iwamale na wapinga na Walawi iwokala mna imiji yenu, kwaapfila wawo wahela isi ili yawo wenyegho. 13 Mwalangitse mleke kulapfa nambiko tsenu tsa kulakatsighwa hanu hohose hala hambama, 14 lekeni mtsilapfe hanu hala IMNDEWA, Imulungu wenu hayahasaghule mna isi ya likabila lyenu limwe, na aho mtende chila chinu chanimlaghitsani."

15 "Lekeni mwodaha kumsubutula imnyama na mje inyama yake mmakaye mwenu ka pfambama, ka IMNDEWA, Imulungu wenu pfayawabaliki. Iwanu wose iwelile na iwehile wodaha kuja ka pfamkuja inyama ya mbala na ya idondolo. 16 Lekeni mleke kuja idamu, muikutule hasi ka matsi. 17 Tsinambiko itsilapfighwa kwe IMNDEWA, mleke kutsija mmakaye mwenu, iwe itsaka ye pfijo pfenu, ya idipfai, ya ghamapfuta, wala ing'ombe au ing'olo yanduse kwelekighwa, wala chochose chawilahile kulapfa, wala nambiko yambama wenyegho kulapfa wala tsinambiko tsingi. 18 Lekeni apfo mtsakuja hambele ha IMNDEWA, Imulungu wenu hamwe na wanenu wamale na wapinga na watumwa wenu wamale na wapinga, na Walawi iwokala mna imji yenu, namwe mdeng'elele hambele he IMNDEWA, Imulungu wenu kwa chila chinu chamtenda kwa ghamoko ghenu. 19 Mwalangitse, mleke kuwasemwa Walawi matsuwa ghose ghamkala mna isi yenu."

20 "IMNDEWA, Imulungu wenu hayatsakongetsa isi yenu ka pfayalongile, namwe mwolonga ‘Twobama kuja nyama,’ kwaapfila mna batsu lya ukuja injama, mwodaha kuja inyama ka pfambama. 21 Lelo, hanu hayosaghula IMNDEWA, Imulungu wenu kwika litaghwa lyake hang'awa kutali namwe, mwodaha kumsubutula imene au ing'olo iyaweng'ile IMNDEWA, ka pfayawalaghitse, na mmkaye mwenu mwodaha kuja inyama ayo ka pfambama. 22 Imunu wowose yawe kela au keha kodaha kuja inyama ayo, yaje ka apfila pfamkuja inyama ya mbala au ya dondolo. 23 Lekeni mwalangitse mleke kuja idamu, kwaapfila idamu wuwo ughima, apfo mleke kuja ughima hamwenga na inyama. 24 Mleke kuja idamu, muikutule hasi ka matsi. 25 Mleke kuja idamu, ili mkebwede mwemwe na iwanenu na iwatsukulu wenu, kwaapfila mtsotenda ghanoghile hambele ha IMNDEWA."

26 "Ipfinu pfenu ipfenzeluke na apfila pfamwilahile kumlapfila IMNDEWA, mghende napfo hanu hayohasaghula IMNDEWA. 27 Mlapfe nambiko tsenu tsa kulakatsighwa, inyama na idamu hane matsabahu ye IMNDEWA, idamu ya tsinambiko tsenu muikutule hambele ha imatsabahu ya IMNDEWA, Imulungu wenu. Lekeni mwodaha kuja inyama. 28 Mwalangitse kukinda chila chinu chaniwalaghitse ili mkebwede mwemwe na watsukulu wenu, kwaapfila mtsotenda ighanoghile na ighomnoghela IMNDEWA, Imulungu wenu."

29 "IMNDEWA, Imulungu wenu hayatsowakoma iwanu wa isi yamghenda kuisola, namwe mng'awawinga na kukala mna isi yawo, 30 hawatsokomighwa hambele yenu, mwalangitse mleke kughutsa mbuli tsa milungu yawo, wala mleke kughutsa na ukulonga, ‘Iwanu awano woisang'anila pfii milingu yawo, ili na twetwe tutende pfipfo.’ 31 Mleke kumtambikila apfo IMNDEWA, Imulungu wenu, kwaapfila hawoitambikila imulungu yawo apfo, wotenda aghala ghayolema na ighomwihila IMNDEWA, mbaka wowalakatsa iwana wawo wamale na wapinga mna ghumoto ka nambiko kwa imilungu yawo."

32 Mwalangitse ghose ghaniwalongela mkinde, mleke kwongetsa wala kuhungutsa mna agho ghose ghaniwalaghitse.