1 Mleke kumlapfila IMNDEWA, Imulungu wenu, ing'ombe au ing'olo yane chilema yawe nambiko, kwaapfila alyo lyomwihila IMNDEWA, Imulungu wenu. 2 Mwodaha kuhulika ka mmale au ipinga iyokala mna ghumji ghwenu ghumwe kotenda ghehile hambele ha IMNDEWA, Imulungu wenu na kolema kukinda lilaghano lyake, 3 kwa kuitambikila milungu ingi, na kutambikila litsuwa, au ghumwetsi, au tsinondo itsili kulanga, apfila nene siwalaghitse baye. 4 Namwe mng'ahulika apfo, muipelembe imbuli ayo pfinoghile ka chinu acho chihile chitendeka mna isi ya Isiraeli, 5 kuya mumghale immale ayo au pinga ayo kunze kwa ghumji namwe mumtowe na ghamabwe mbaka yafe. 6 Lekeni kokomighwa ka wanu weli au wadatu wolonga ka imunu ayo katenda ghehile. Mleke kumkoma munu wowose kwa kumuhulikitsa munu yumwe yaliyeka. 7 Awala iwonile kotenda walongole kumtowa na ghamabwe, kuya iwanu wangi nawo wamtowe. Apfi pfipfo pfamtsotenda ighehile agho ghamale mna mwemwe. 8 Kung'alawila ghomba mmakaye mwenu nalyo komu kulilamla, ka apfila ukwilagha kwe wanu, ukumkoma miyaghe ghila, au si kwa kubama baye, au ghomba lyolyose ilighala na agho, ghang'alawila agho, mghende hanu hayohasaghula IMNDEWA, Imulungu wenu. 9 Waghendeleni Walawi iwali watambika, na walamtsi iwosang'ana mna ghamatsuwa agho, na muwaleke wawalamle. 10 Kuya mtsotenda ka apfila pfawatsowalongela ihanu aho hayahasaghule IMNDEWA. Namwe mwalangitse kutenda ghose ghala ghawowalaghitsani. 11 Mtende kwa kuwinza malaghitso ghawowalangulitsa na aghala ghawolamla, mleke kuhunduka aku wala akula mna ghose ghawowalongela. 12 Imunu wowose yane chidandali, iyolema kumtegheletsa imtambika au imlamtsi, iyakwima hanu he IMNDEWA, Imulungu wenu, ayo yakomighwe. Apfi pfipfo pfamtsotenda ighehile agho ghamale mna Isiraeli. 13 Iwanu wose watsohulika na kupfuka, nawo watsoleka ichidandali.

14 "Hamkwingila mna isi iyomwing'ani IMNDEWA, Imulungu wenu iwe yenu na kukala mumo, namwe mng'alonga, ‘Tumwike mfalume yatulongotse, ka pfatsili isi tsingi itsitutsunguluka,’ 15 mwalangitse mmwike imfalume iyosaghulighwa na IMNDEWA, Imulungu wenu, yawe imfalume wenu, naye yawe Muisiraeli miyenu. Mleke kumsaghula imgheni yawe mfalume wenu. 16 Imfalume yaleke kuwa na falasi wengi, wala yaleke kuwatuma iwanu waghende Misiri wakamghulile wafalasi, kwaapfila IMNDEWA tsakawalongela, ‘Mleke kuiwinza keli inzila ayo.’ 17 Imfalume yaleke kuwa na wehe wengi, yang'awa nawo ghumoyo ghwake ghutsakuwa kutali na IMNDEWA, wala yaleke kwiyongetsela fetsa na nzahabu. 18 Hayosaghulighwa yawe imfalume, yaghandike keli ghamalaghitso. Yeyandikile chitabu chingi ka achino cha ghamalaghitso gha IMNDEWA chawalinacho iwatambika Walawi. 19 Na yawe nacho, na yachisome mna matsuwa ghake ghose, ili yadahe kumpfuka IMNDEWA, Imulungu wake na kukinda chila chinu ichili mna ghamalaghitso. 20 Naye hayatsochisoma ng'odaha kwibona ka yeye kanogha kubita Waisiraeli wayaghe, na yaleke kuhunduka akuno wala akula mna ghamalaghitso. Yang'atenda apfo, yeye na watsukulu wake watsotawala kwa matsuwa mengi mna isi ya Isiraeli."