1 "Mmale wowose iyaswayulighwe au iyaghanighwe ulume wake yaleke kukala hamwe na mtingano ghwa iwanu wa IMNDEWA."

2 "Imwana iyelekighwe na mmale wa Isiraeli na pinga wa isi ingi yaleke kwingila mna mtingano ghwe IMNDEWA hata watsukulu wake iwatsakwoneka mbaka mna lweleko lwa kumi. 3 Waamori na Wamoabu waleke kwingila mna mtingano ghwa IMNDEWA, hata iwana wawo iwoweleka mbaka mna lweleko lwa kumi. 4 Kwaapfila tsawalema kuweng'ani ichijo na ghamatsi hamng'ali mwa mnzila kulawa Misiri, na tsawamkema Baalamu mwana wa Beori kulawa mna ghumji ghwa Petori ighuli mna isi ya Mesopotamia, yawalighiteni mwemwe. 5 Lekeni IMNDEWA, Imulungu wenu ng'amtegheletse baye Balaamu, na ukulighita kwake kughalambuka na kuwatenda mwemwe mbalikiighwe, kwaapfila IMNDEWA, Imulungu wenu tsakawakunda mwemwe. 6 Hamtsokala nawo, mleke kutenda chinu chochose ichiwapfila wanu wano, au ichiwatenda webwede."

7 "Mleke kuwahila Waedomu, awo ndughu tsenu, mleke kuwahila Wamisiri, kwaapfila tsamkala muisi mwawo ka wagheni. 8 Iwana wawo iwatsakwelekighwa mna lweleko lwa kadatu, awo Waedomu na Wamisiri, wodaha kwingila mna ghumtingano ghwa IMNDEWA."

9 "Hamghenda kutsenga indalo mwitowe nawo, mwalangitse mleke kuleka chinu chochose chiwatende mleke kutogholighwa hambele ha IMNDEWA. 10 Ka kuna mmale mna mwemwe keha kwa kulawa tsimbeghu nechilo, yalawe kunze kwe ndalo na yakale kuko. 11 Lekeni haipfika nemihe yoghe, na litsuwa ling'aswa yoye kune indalo."

12 "Mwike hanu kunze kwe indalo yenu, ha ukughendela kucholo. 13 Mghale chidugho mna ipfinu pfenu, namwe hambaghuka, mtsohimbila na kusila hasi mipfi tsenu. 14 Indalo yenu yele, kwaapfila IMNDEWA Imulungu wenu kakwanga mna indalo yenu ili yawakinge na yawaghele iwanu iwomwihilani mmoko mwenu. Mleke kutenda chinu cha chinyala mghati mwenu ichimtenda IMNDEWA yahunduke na kuwaleka."

15 "Ka imtumwa kotsumila kuna mwemwe, uleke kumuyitsa kwa imtwa wake. 16 Mumleke yakale namwe mna ikaye yoyose iyobama na iyoisaghula mna ghumji ghwenu, mleke kumtendela pfihile."

17 "Muisiraeli wowose, yawe mmale au pinga, yaleke kuwasa ne pfiweghe wa hanu ha ukutambikila. 18 Tobole lyolyose ililawa mna sang'ano tsa uweghe tsa hanu aho, mleke kughala mng'anda mwe IMNDEWA, Imulungu wenu kulihila natsili, kwaapfila ipinga au immale chiweghe we ng'anda ya ukutambikila IMNDEWA kowahila."

19 "Haumwatsima Muisiraeli miyagho ilitobole, ichijo au chinu chochose chila, uleke kumbama nyongetsa mna chinu chila chaumwatsime. 20 Kodaha kubama nyongetsa haumwatsima imgheni, lekeni si kwa Muisiraeli miyagho baye, naye IMNDEWA, Imulungu wenu katsowabaliki kwa chila chinu chamsang'ana mna isi yamghenda kuisola iwe yenu. 21 Hawilaha kumlapfila ichinu Imulungu, uleke kukawa kulapfa, kwaapfila IMNDEWA, Imulungu wako kokubama ghweghwe utende apfo, lekeni ka ng'utenda apfo baye, kutsakuwa kotenda nzambi. 22 Ung'aleka kwilaha, ng'utsakuwa na nzambi baye, 23 lekeni chochose ichilawa mna imilomo yenu mchitende, kwaapfila mwilaha kwa IMNDEWA, Imulungu wenu kwa milomo yenu wenyegho."

24 "Haubita mna mghunda ghwa miyagho ghwa mitsabibu, kodaha kuja nzabibu na kwighuta, lekeni uleke kughondola na kwika mna ichiseghe chako. 25 Haubita mna mghunda ghwa miyagho ghwa uhemba, kodaha kukwanyula mikungwi na ukuja, lekeni uleke kusola isengo na kughana uhemba wake."