1 "Imunu yang'oneka kakomighwa mna mighunda ya isi iyomwing'ani IMNDEWA Imulungu wenu iwe yenu, namwe ng'ammanyile baye imunu yamkomile, 2 iwanzehe na walamulitsi wenu waghende ako kwayakomighwe na walinge utali wa hanu aho mbaka hane imiji ili habehi. 3 Kuya iwanzehe wa ghumji agho ighuli habehi na hanu halwoneke ilukuli, wasole imwana we ng'ombe, ayula ng'ana yasang'ane ng'onde yoyose baye wala ng'ana yakweghe chinu chochose baye. 4 Wamuhulumse kulwanda, hana ilukolongo ing'alunyalagha ghamatsi baye na kulwanda ako ng'akulimighwagha baye wala kuhandighwa mbeghu baye, ako waibobotole isingo ye mwana ayo we ng'ombe. 5 Na iwatambika wa lukolo lwa Lawi nawo wawe baho kwaapfila IMNDEWA Imulungu kawasaghula wamsang'anile yeye, na wamotetse kwa taghwa lyake, na wahighe chila ghomba lya kwisonga na lya kuboka. 6 Kuya wanzehe wose wa ghumji ghuli habehi na hanu hayakomighwe imunu, wahopfughe ghamoko ghawo mchanya mwa imwana ayo we ng'ombe iyabobotolighwe isingo. 7 Nawo walonge, ‘Ng'atumkomile baye imunu ayuno wala ng'atummanyile baye iyamkomile. 8 Ghwee IMNDEWA, walekelele iwanu wako wa Isiraeli yuwakombole kulawa Misiri, wala uleke kuweng'a iwanu wako wa Isiraeli totso lya ukumkoma imunu ayuno, iyalihela totso, naghwe uwaleghusile litotso alyo. 9 Mng'atenda apfo mtsakuwa mwahela totso kwa ukukomighwa kwa imunu ayo, kwaapfila mtenda chayobama IMNDEWA.’ "

10 "Hamghenda kwitowa na wanu iwowehila, na IMNDEWA, Imulungu wenu yang'amwapfilani kuwatowa, na mng'awaghogha na kuka nawo, 11 ka komwona pinga iyanoghile mna iwanu awo wamuwaghoghile, na konoghelwa naye na kobama kumkwela, 12 umsole na uke naye ukaye, umghete mvili tsake na umdumle tsinumba tsake. 13 Umtsule maghwanda ghake ghayang'ali yopfala hamumghoghile na umpfatse ghangi. Na katsokala ukaye yako kwa mwetsi ghumwe, yawalilile aba wake na mai wake. Hayatsomalitsa apfo, naghwe kodaha kumkwela na kuwa mulume wake, naye kakuwa mwehe wako. 14 Ka hambele ng'umkunda keli baye, mleke yoke kwayobama. Uleke kumghutsa wala kumtenda ka mtumwa kwaapfila tsakumkwela kwa kumnanahitsa."

15 "Ka imunu kakwela wehe weli, na komkunda yumwe kubita yungi, na wose weli wamwelekela wana walume, lekeni imwana iyanzile kwoneka wa ayula ipinga ing'ayokundighwa baye, 16 immale ayo hayatsobama kughola ipfinu pfake pfayali napfo kwe wanaghe, yaleke kughola pfinu pfe mwana chaudele kwe mwana yula we pinga iyomnoghela, lekeni yaghole kwe mwana yula we ipinga ing'ayomkunda baye, kwaapfila yeye yuyo mwana chaudele ghendo. 17 Kobamighwa yamtoghole imwana we pinga ing'ayomkunda baye na yamwing'e mafungu meli gha pfinu pfake pfose, Kwaapfila imwana chaudele kolangusa tsingipfu tsa mwanduso tsa ubala wa aba wake, ipfinu pfa mwana chaudele pfakwake."

18 "Ka munu kana mwana mmale msughu na kana chidandali, naye ng'owategheletsa baye aba wake na mai wake hawomkanya, 19 aba wake na mai wake wamghale imwana ayo hambele ha iwakulu wa ghumji ghwayokala, hana lilango lya ghumji. 20 Wawalongele iwakulu awo, ‘Imwanetu ayuno msughu na kana chidandali, ng'obama baye kututegheletsa, kakwasa hela tsisendi na kopatika.’ 21 Kuya iwanu wose iwokala mna ghumji aghwo wamtowe na mabwe mbaka yafe. Mng'atenda apfo mtsoghalapfa ghehile mna mwemwe, na wanu wose wa Isiraeli watsohulika na kupfuka."

22 "Ka munu katenda nzambi ng'ulu imtenda yakomighwe na ilukuli lwake lukondekighwa mna ghumbiki, 23 ilukuli lwake luleke kukala mna ghumbiki chilo chose. Mlutsike misi iyo kwaapfila munu wowose iyakondekighwe kalighitighwa na IMNDEWA, hela mtsoitenda isi iyomwing'ani IMNDEWA Imulungu iwe yenu ihe."