1 "Mghukumbukeghe ghumwetsi ghwa Abibu kwa kudeng'elela ichihungo cha Ipasaka kwe IMNDEWA, Imulungu wenu, kwaapfila mna ghumwetsi ghugho ghwa Abibu, IMNDEWA Imulungu wenu tsakalawapfa Misiri nechilo. 2 Mumsubutulile IMNDEWA, Imulungu wenu imnyama yumwe yawe nambiko ya Pasaka kulawa mna wang'olo au wang'ombe wenu, hanu hayosaghula IMNDEWA hawe ha ukukala litaghwa lyake. 3 Mleke kumja hamwe na pfighate pfikighwe ihamila, kwa matsuwa saba mtsakuja pfighate ipfilihela ihamila, pfighate pfa maghayo, kwaapfila tsamsumka kuka kulawa Misiri, ili mkumbuke litsuwa lyamlawile Misiri, mna ghamaghayo gha utumwa, mna ghamatsuwa ghenu ghose ghamkala. 4 Mleke kukala na ihamila mmakaye mwenu kwa ghamatsuwa saba, na nyama ye imnyama iyochinjighwa nemihe mna litsuwa lya mwanduso lye ipasaka, ijighwe chilo chicho, mleke kuileka ikale mbaka nemitondo."

5 "Mleke kumchinja imnyama wa pasaka mna tsikaye tsenu tsayomwing'ani IMNDEWA Imulungu wenu, 6 lekeni mwodaha kumchinja hanu hala IMNDEWA Imulungu wenu hayowasaghulila likale taghwa lyake. Mumchinje ahala litsuwa halikuswa, kwaapfila litsuwa haliswele, iwahenga wenu tsawanza ukulawa Misiri. 7 Muitoghose inyama ayo na muije hanu hala IMNDEWA, Imulungu wenu hayohasaghula, kuya nemitondo muye mmakaye mwenu. 8 Matsuwa sita mtsakuja pfighate pfilihela ihamila na mna tsuwa lya saba ghuwe mtingano ghwo kumtambikila IMNDEWA, Imulungu wenu na mleke kusang'ana ng'onde yoyose ila."

9 "Mtsopeta majuma saba kulawa hamkwanza ukupfuna ipfijo pfenu, 10 namwe mumtendele chihungo cha majuma IMNDEWA, Imulungu wenu kwa kulapfa nambiko ya hiyali kulawa mna ghose ghayamwing'ileni IMNDEWA, Imulungu wenu. 11 Namwe mtsodeng'alela hambele ha IMNDEWA hamwe ne iwana wenu, ne iwatumwa wenu wamale ne wapinga, ne walawi iwokala mmakaye mwenu, ne iwagheni, ne wachuwa ne pfitsuka wamkala nawo, mtende apfi hanu hala IMNDEWA, Imulungu wenu hayohasaghula likale taghwa lyake. 12 Mkumbuke mwemwe tsamkala watumwa akula Misiri na muikinde imiko ino pfinoghile."

13 "Mtende chihungo cha pfibumbulika kwa ghamatsuwa saba ahala hammalitsa ukubeta ipfijo pfenu kulawa hane ichibwalu cha ukubetela na hammalitsa ukukama tsinzabibu tsenu. 14 Namwe mtsodeng'elela mna ichihungo hamwe ne iwana wenu, ne iwatumwa wenu wamale ne wapinga, ne walawi, ne iwagheni, ne wachuwa ne pfitsuka wamkala nawo. 15 Kwa matsuwa saba, mumtendele chihungo IMNDEWA, Imulungu wenu, hanu hala IMNDEWA hayohasaghula, kwaapfila IMNDEWA, Imulungu wenu katsowabaliki mna mapfuno ghenu ghose na mna tsisang'ano tsa ghamoko ghenu namwe mtsodeng'elela."

16 "Iwamale wose iwali muisi mwenu watse hambele ha IMNDEWA, Imulungu wenu mala ndatu chila mwaka, hanu hayohasaghula, watse mna ichihungo cha Pasaka, na mna ichihungo cha majuma, na mna ichihungo cha pfibumbulika. Chila mmale wa Isiraeli yakinde chinu hayoghenda hambele ha Imulungu. 17 Chila mmale yalapfe ka pfayodaha, kwa kulola chayamwing'ile IMNDEWA, Imulungu wenu."

18 "Muwasaghule walamtsi na wanu wakulu kulawa mna ghmakabila ghenu mna imiji yenu iyomwing'ani IMNDEWA, Imulungu wenu, nawo watsowahigha iwanu ka pfaibamighwa. 19 Mleke kuhigha pfihile wala mleke kulolesa chihanga cha munu hamuhigha, wala mleke kubokela hongo, kwaapfila hongo yopofula tsinenge tsa iwanu iwakengele, na yowatenda iwalamtsi walamule pfihile. 20 Mkindilitse ihaki iliyeka ghendo, ili mdahe kukala na kuisola isi iyomwing'ani IMNDEWA, Imulungu wenu."

21 Mleke kwika mbiki ghwoghwose ghuwe ngutso ya Ashera, habehi na hanu ha ukulapfila nambiko hamtsomtsengela IMNDEWA, Imulungu wenu. 22 Wala mleke kwimitsa ingutso ye ghamabwe iwe chinyagho mchitambikile, kwaapfila IMNDEWA, Imulungu wenu agho koghahila.