1 "Aghano ghagho ghamalaghitso, imiko, na malamtsi IMNDEWA, Imulungu wenu ghayanilaghitse niwafunde. Mkaghakinde mna isi yamghenda kuisola iwe yenu, 2 ili mwemwe, na wana wenu na watsukulu wenu, wadahe kumpfuka IMNDEWA, Imulungu wenu matsuwa ghose, kwa kukinda ghamalaghitso ghake na imiko yake yose, ili mkale matsuwa mengi. 3 Lelo, mtegheletse mwemwe Waisiraeli, mwalangitse kughakinda ghamalaghitso ili mkamotetsighwe na mwongetseke muwe wengi mna isi ayo ine lidongo linoghile kwa kulima na kufughila wanyama, ka IMNDEWA, Imulungu wa iwahenga wenu pfayelaghane namwe."

4 "Tegheletseni mwemwe Waisiraeli, IMNDEWA, Imulungu wetu, yeye ka IMNDEWA yaliyeka. 5 Mumkunde IMNDEWA, Imulungu wenu kwa ghumoyo ghwenu ghwose, na kwa ghumuhe ghwenu ghwose, na kwa tsingupfu tsenu tsose. 6 Mleke kwisemwa ghamalonga aghano ghanimlaghitsani leloli, ila mgheke mmoyo mwenu. 7 Muwafunde iwana wenu, muwapetele hamkala mkaye mwenu, na hamghenda mnzila, hamuwasa na hamlamka. 8 Mghohe mmoko mwenu, na mghapfale mchihanga mwenu ka msipi ili mghakumbukeghe. 9 Mghandike mna imilango yenu na mna ghamalango gha imiji yenu."

10 "IMNDEWA, Imulungu wenu hayatsowaghala mna isi iyelahile kwa iwahenga wenu Aburahamu, Isaka na Yakobu ka katsoweng'ani isi ina imiji mikulu na inoghile, ing'aitsengighwe baye na mwemwe, 11 na tsing'anda itsimemile pfinu pfinoghile, ing'ampfimemetse baye mwemwe, pfisima pfa matsi ing'ampfihimbile mwemwe, na mighunda ya minzeituni na minzabibu ing'aihandighwe na mwemwe, hamtsakuja na kwighuta, 12 mwalangitse mleke kumsemwa IMNDEWA, iyawalapfile Misiri, isi yamkalile watumwa. 13 Mumpfuke IMNDEWA, Imulungu wenu, mumtumikile yeye yaliyeka, na mwilahe kwa taghwa lyake. 14 Mleke kuitumikila milungu ingi, imilungu ya iwanu iwowatsunguluka, 15 kwaapfila IMNDEWA, Imulungu wenu, iyali haghatighati henu, ka Imulungu yana iwipfu, hela imaya ya IMNDEWA, Imulungu wenu itsowakilani mwemwe na kuwakoma wose mhupe kulawa mna isi."

16 "Mleke kumghetsa IMNDEWA, Imulungu wenu, ka pfamumghetsile akula Masa. 17 Ghakindeni ghoya ghamalaghitso ghose gha IMNDEWA, Imulungu wenu, ghamalamtsi ghake, na imiko yake iyawalaghitse. 18 Namwe mtende aghala ighanoghile hambele ha IMNDEWA, ili mkamotetsighwe, na mdahe kwingila na kuisola iwe yenu, isi inoghile iyelahile kwa iwahenga wenu, 19 ka katsowawinga awala wose iwowehila ka IMNDEWA pfayalongile."

20 "Na matsuwa ighakutsa, iwanenu wang'awaghutsa apfino, ‘Ule IMNDEWA, Imulungu wetu katulaghitsa kughakinda malaghitso, malamtsi na imiko aino?’ 21 Namwe muwedike apfino, ‘Tsatukala watumwa wa Farao ako Misiri, lekeni IMNDEWA katulapfa kulawa Misiri kwa ghumoko ghwake ghune ingupfu. 22 IMNDEWA kalangusa pfitango, pfinzonza, na pfihulo kwa Wamisiri, na kwa Farao, na kwa iwakulu wake, aku twakona kwa tsinenge tsetu wenyegho. 23 Na katulapfa Misiri katughala akuno, na katwing'a isi iyelahile kuweng'a iwahenga wetu. 24 IMNDEWA katulaghitsa kuikinda imiko ino, na kumpfuka IMNDEWA Imulungu, ili matsuwa ghose twibwede na yatwike waghima ka leloli ino. 25 Tung'alangitsa kughakinda ghamalaghitso aghano hambele ha IMNDEWA, Imulungu wetu, ka pfayatulaghitse, tutsotogholighwa hambele hake.’ "