1 Atsino tsitso tsibalaka Musa imunu wa Imulungu tsayawabaliki Waisiraeli ahala ng'ana yafe baye. 2 Naye kalonga,

"IMNDEWA katsa kulawa ichidunda cha Sinai

katutsila kulawa chidunda cha Seiri,

kalangatsa kulawa chidunda cha Parani,

kalawila na wamalaika makumi elufu

na ghumoto ghwakwaka mna ghumoko ghwake ghwa kujilo.

3 IMNDEWA kowakunda iwanu wake,

katsowalolesa iwanu wake iwenzeluke,

nawo wotowa mapfindi hana ghamaghulu ghake,

wobokela malaghitso kulawa kuna ghweghwe.

4 Musa katulaghitsa kughakinda ghamalaghitso,

ghatwing'ighwe twetwe ghawe ghetu, wana wa Isiraeli.

5 IMNDEWA kawa mfalume wa Waisiraeli,

ahala pfilongotsi wa iwanu hawetingane,

hamwe na ghamakabila gha Isiraeli."

6 "Iwanu wa likabila lya Rubeni wakale wagima na wala waleke ukufa,

na waleke kuwa chidogho."

7 Likabila lya Yuda kalilonga apfino,

"Ghwe IMNDEWA, tegheletsa ichililo cha likabila lya Yuda,

uwoyitse keli kwa wandughu tsawo,

uwatowele kwa ghamoko ghako,

uwapfile ahala hawetowa na awala iwowehila."

8 Na likabila lya wanu wa Lawi, kalilonga apfino,

"Ghamabwe gha Thumimu na Urimu, keng'ighwa imunu wako iyenzeluke,

yumghetsile ako Masa,

yung'ali uhila naye hana ghamatsi ako Meriba.

9 Walawi wawabela aba tsawo na mai tsawo

wawasemwa ghendo ndughu tsawo,

ng'awawatangile baye hata iwana wawo,

lekeni waghakinda ghamalaghitso ghako,

na kukinda lilaghano lyako.

10 Walawi watsowafunda iwana wa Yakobo kughakinda ghamalaghitso ghako,

watsowafunda iwanu wa Isiraeli isheria yako,

watsodusula upfumba hambele hako,

na watsolapfa nambiko tsa kulakatsighwa mchanya mwa imatsabahu yako.

11 Ghwe IMNDEWA tsibaliki tsingupfu tsao,

utsibokele tsing'onde tsawotenda kwa ghamoko ghawo,

upfighojole ipfighudi pfa awala iwowehila,

na utsihinye tsingupfu tsao na waleke kwinuka keli."

12 Likabila lya wanu wa Benjamini kalilonga apfino,

"Likabila lyenu IMNDEWA kolikunda na kolikinga,

kolilolesa misi yose,

naye kolihabatila mmambagha mwake."

13 Likabila lya iwanu wa Yosefu kalilonga apfino,

"IMNDEWA yaibaliki isi yawo iwe na litungwe linoghile kulawa kulanga,

na ghamatsi igholawa hasi ha lidongo.

14 Isi yawo imele ghamatunda ghanoghile ighakwipfa kwa litsuwa,

iwe na ghamatunda mengi ighanoghile gha chila msimu.

15 Na ipfidunda pfake pfa ghumwande pfimele ghamatunda ghanoghile,

na ing'aghohupa baye igholawa mna ipfidunda pfa ghamatsuwa ghose.

16 Isi yake imeme ghose ighanoghile,

ibwede kwa ghose ighanoghile gha IMNDEWA,

iyakalile akula kuna ichibagho ichikwaka,

ukubweda akuno kuwaghendele iwanu wa likabila lya Yosefu,

yeye iyali mbala wa wandughu tsake.

17 Yosefu kana ngupfu ka ng'ombe mmale iyalongole koneka,

membe tsake tsa nyati,

kwa tsimembe atso katsokunughitsa iwanu wa tsiisi mbaka kuna tsimembe tsa isi,

nawo watsakuwa wanu makumi elufu wa Efuremu,

na wanu maelufu wa Manase."

18 Na likabila lya Zabuloni na lya Isakari kaghalonga apfino,

"Deng'eleleni mwemwe wa zabuloni, hamghenda mna ghumwanza,

na mwemwe wa Isakari, mbwede imkala mna ipfibumbulika pfenu.

19 Mwemwe mtsowakema iwanu waghende kupfidunda,

na kuko mtsolapfa nambiko itsibamighwa,

namwe mtsopata pfinu bwelele kulawa mbahari,

na aghala ighapfisike mna ghumsanga."

20 Likabila lya Gadi kalilonga apfino.

"Yabalikighwe Imulungu iyoyongetsa isi ya Gadi iwe ng'ulu.

Wanu wa Gadi wokala ka simba iyotsaula ghumoko ghwa imnyama iyamghoghile, na lilotsi lya litwi."

21 Kesaghulila imwenyegho isi ina lidongo linoghile kubita tsose,

hanu hasaghulighwe hawe ha chilongotsi,

pfilongotsi wa iwanu hawetingane hamwe,

watenda aghala ghose ghaoyobama IMNDEWA,

katenda chayabamile Imulungu kwa Isiraeli.

22 Na likabila lya Dani kalilonga,

"Dani ka mwana simba

iyoghuluka kulawa Bashani." 23 Likabila lya Nafutali kalilonga,

"Wanafutali webweda ighanoghile na tsibalaka tsa IMNDEWA,

isi yako ya kusini na maghalibi mwa litsiwa lya Galilaya."

24 Na likabila lya Asheri kalilonga apfino,

"Likabila lya Asheri libwede kubita makabila ghose gha Isiraeli,

yatogholighwe na ndughu tsake,

yapfabike mghulu ghwake mna ghamapfuta."

25 Ghamalango ghako kutsoghahindila komeo tsa chuma na tsa shaba,

namwe mtsokala na ngupfu matsuwa ghose.

26 Musa kamalitsa kwa ukulonga, "Kuduhu yungi iyali ka Imulungu wa Isiraeli,

yeye koghuluka kulawa kulanga yatse kukwapfila,

naye koghuluka kulanga mna ukulu wake.

27 Imulungu wa matsuwa ghose yuyo wa ukumtsumila mwemwe,

na ghamoko ghake ghatsokukinga matsuwa ghose,

kowawinga iwanu iwowehila hambele henu,

kolonga, ‘Wakomeni.’ "

28 Apfo Waisiraeli watsokala tseghamba waliyeka,

watsukulu wa Yakobo waliyeka,

mna isi ina ingano na idipfai,

na mlanga mwake mwolaghala mawagho.

29 Mbweda mwemwe, Waisiraeli,

nani iyali ka mwemwe,

iwanu iwakombolighwe na IMNDEWA,

yeye ka ngao yenu na komwapfilani,

na limaghe iliwatenda muhume,

na awala iwowehila watseghala wenyegho kuna mwemwe,

namwe mtsohabajugha hanu hawo henulighwe.