1 "Mwemwe mwa wana wa IMNDEWA, Imulungu wenu, mleke kwisanza, wala kubeya chipala kwa imunu yafile. 2 Kwaapfila mwemwe mwa wanu iwenzeluke wa IMNDEWA, Imulungu wenu. Yeye kawasaghulani muwe wanu wake ghendo kulawa kwe wanu wose iwokala muisi."

3 "Mleke kuja chinu chochose ichimwihila Imulungu. 4 Wanyama wambamighwa ukuja awano hano, mje ing'ombe, ing'olo, imene, 5 funo, mbala, kongoni, mene wa kwibagho, pofu, na mene wa kuchidunda, 6 na mwodaha kuja imnyama wowose yane ng'watwo mbili na iyoselula. 7 Lekeni mleke kuja imnyama yane tsing'wato mbili itsigholeke na ng'oselula baye, mleke kuja ngamiya, isungula na mimbi, woselula lekeni tsing'wato tsawo ng'atsigholeke baye mala mbili, awo weha kuna mwemwe, 8 ingubi naye keha, hata ka kana ng'wato mbili itsigholeke, na ng'oselula baye, mleke kuja inyama yawo wala kukinda mitsogha yawo."

9 "Pfiumbe pfose ipfili mmatsi mwodaha kuja, lekeni pfiwe na mapepe na maghamba. 10 Lekeni chochose achila chilihela mapepe na maghamba, mleke kuja, acho chiha kuna mwemwe."

11 "Mwodaha ukuja pfideghe wose iwelile. 12 Lekeni awano hano mleke ukuja, maghengele, furukombe na chipungu, 13 kengewa, chotsi, na pfitema wose, 14 wabondwa wose, 15 mbuni, dudumitsi, pfimanga wose, 16 chimulu mdodo, chimulu mkulu, na chimulu mtselu, 17 Imwari, inderi, mnandi, 18 imembe, koikoi wose, hudihudi, na popo."

19 "Na wang'onyo wose wane mabawa iwotambala weha kuna mwemwe, mleke kuwaja. 20 Lekeni pfiumbe wose wane mabawa iwelille mwodaha kuja."

21 "Mleke kuja mitsogha, ayo mwodaha kuweng'a iwagheni iwokala mmakaye mwenu, wawo wodaha kuja au muwautsile wanu wa isi ingi. Lekeni mwemwe mwa wanu welile we IMNDEWA. Mleke kumtoghosa mwana mene mna matombo gha mai wake."

22 "Mwike izaka ya ipfijo pfenu pfampfuna kulawa mna imighunda yenu chila mwaka. 23 Namwe mtsakuja izaka yenu, dipfai yenu, mapfuta, na mnyama wenu wa mwanduso wa mifugho yenu hambele ha IMNDEWA, Imulungu wenu hanu hayohasaghula hawe ha ukukala litaghwa lyake. Mtende pfino ili mwifunde kumpfuka IMNDEWA, Imulungu wenu matsuwa ghose. 24 Ka ihanu aho hayahasaghule IMNDEWA, Imulungu wenu kwika litaghwa lyake hatali kulawa mmakaye mwenu, namwe ng'amdaha baye kutsiduta tsizaka atso tse pfijo pfayaweng'ile IMNDEWA, lelo mtende apfi, 25 muutse itsizaka atso na litobole mlighale kwa ghamoko ghenu hanu hayosaghula IMNDEWA, Imulungu wenu. 26 Litobole lyenu mghulile chochose chambama, inyama ye wang'ombe, au wang'olo, dipfai, na imbwali. Mwemwe na iwanu wa tsikaye tsenu mje na mdeng'elele hambele ha IMNDEWA, Imulungu wenu."

27 "Mleke kuwasemwa Walawi iwokala mmakaye mwenu, kwaapfila wahela fungu wala wahela isi iyaweng'ighwe iwe yawo. 28 Chila haghumala ghumwaka ghwa kadatu, mlapfe izaka ya pfijo pfenu pfose, na mwike mna tsikano itsili mmakaye mwenu, 29 ili Walawi iwalihela pfinu, iwagheni, ipfitsuka na iwachuwa iwokala mmakaye mwenu watse waje na kwighuta, naye IMNDEWA, Imulungu wenu katsowatenda mbalikiighwe kwa chila chinu chamsang'ana kwa ghamoko ghenu."