1 Agha ghagho ghamalonga gha lilaghano IMNDEWA ghayamlaghitse Musa yeke na iwanu wa Isiraeli mna isi ya Moabu, ghawe nyongetsa mna lilaghano lyayekile nawo mna ichidunda cha Horebu.

2 Musa kawakema hamwe Waisiraeli wose kawalongela, "Mwemwe muwenyegho mwona kwa nenge tsenu aghala ghose IMNDEWA ghayamtendele Farao mna isi ya Misiri, yeye hamwe na watumwa wake na isi yake yose. 3 Tsamwona maghayo makulu, pfihulo na pfinu pfa ukukangawatsa. 4 Lekeni mbaka leloli aino IMNDEWA ng'amwing'ileni baye tsimbutsi tsa ukumanya, na nenge tsa ukulola, na maghutwi gha ukuhulika. 5 Kwa miyaka alubaini IMNDEWA tsakawalongotsa mwemwe mnyika, ghamaghwanda ghenu ghampfalile ng'aghalalile baye wala imikwabatsa yenu ng'ailalile baye mna ghamaghulu ghenu. 6 Ng'amjile baye chighate wala ng'amnwele baye idipfai yoyose aila, katenda apfo ili mmanye ghendo ka yeye IMNDEWA yuyo Imulungu wenu. 7 Na hampfikile hanu ahano, Sihoni mfalume wa Heshiboni na Ogi mfalume wa Bashani watsa kwitowa na twetwe, lekeni tuwatowa, 8 tuisola isi yawo na tuweng'a Warubeni, Wagadi, na nusu ya likabila lya Manese, iwe yawo. 9 Lelo ghakindeni, na mghatende ghamalonga gha lilaghano alino ili mbwede mna ghose ghamtenda. 10 Leloli mwemwe mwose mwima hambele ha IMNDEWA, Imulungu wenu, wapfilongotsi wa ghamakabila, iwanzehe wenu, na iwamale wose wa Isiraeli, 11 hamwe na iwana wenu, na wehe wenu, na iwagheni iwokala mmakaye mwenu iwowatulila tsingodi na iwowadeghela ghamatsi. 12 Leloli aino mwima ahano mwike lilaghano na IMNDEWA Imulungu wenu, laghano lyayakwika na mwemwe leloli kwa ukwilaha, 13 ili yawatoghole mwemwe ka mwa wanu wake, naye yawe Imulungu wenu, ka pfayelaghane namwe, ahala hayelahile na iwahenga wenu Abrahamu, Isaka na Yakobu. 14 Wala lilaghano alino na ukwilaha akuno leloli sikwika na mwemwe yamwimile ahano mliyeka baye, 15 ila nakwika na awala wose iwali baha hambele ha IMNDEWA Imulungu wetu, pfipfila hamwe na awala wose ing'awali baha baye na twetwe. 16 Mwemwe muwenyegho mwomanya pfatukalile akula Misiri na pfatupfosile mna tsiisi. 17 Mwona muwenyegho ipfinyagho pfawo ipfimwihila Imulungu, mwona imilungu ya ghamabwe na imibiki, ya fetsa na nzahabu. 18 Mwalangitse ghendo kuleke kulawila mmale wala pinga, wala lukolo wala likabila mna mwemwe ilimleka IMNDEWA Imulungu wenu na kuitambikila imulungu ya isi atso. Chinu chino chakuwa ka sina mna mwemwe ilikweleka ghamatunda ighali usungu na ghana isumu. 19 Imunu yang'ahulika ghamalonga gha lilaghano alino na apfila pfayelahile, naye yang'atoghola imwenyegho mna ghumoyo ghwake na kolonga, ‘Nitsokala tseghamba, hata ka kowinza ichidandali chake mwenyegho, acho chitsowakoma wose, iwanoghile na iwehile’ 20 IMNDEWA Imulungu ng'atsomleghusila baye totso lyake imunu ayo, imaya ya Imulungu na wipfu wake utsomwakila imunu ayo, malighito ghose ighali mchitabu achino ghatsomlawila, naye Imulungu katsomtenda yahupe ghendo muisi. 21 IMNDEWA katsombaghula kulawa mna ghamakabila ghose gha Isiraeli na katsomghalila ghamalighito gha lilaghano ighandikighwe mna ichitabu achino cha ghamalaghitso.

22 "Iwana wenu iwatsakoneka mna lweleko lwenu lukutsa, na iwagheni iwolawa kutali watsakona apfila IMNDEWA pfayaghalile maghayo na matamu mna isi yenu. 23 Isi yose itsolakala kwa baluti na munyu, kuduhu chinu ichihandighwa wala ichikota, wala mibagho ikota, isi yenu itsakuwa ka isi tsa Sodoma, Gomola, Adima na Seboimu, iyatsihinyile IMNDEWA hayonile maya. 24 Iwanu wose iwali muisi watsoghutsa, ‘Heule Imulungu kaitenda apfi isi aino? Hebali yaghudubuke apfino na maya yake ng'ulu apfino?’ "

25 Iwanu watsakwidika apfino, "Kwaapfila iwanu wa IMNDEWA tsawaleka kuliwinza lilaghano lya IMNDEWA Imulungu wa iwahenga wawo, lyayekile nawo ahala hayawalapfile mna isi ya Misiri. 26 Waghenda kuitumikila na kuitambikila milungu ingi, imilungu ing'awaimanyile baye wala Imulungu mwenyegho ng'aweng'ile baye. 27 Apfo imaya ya IMNDEWA ilakatsa isi aino naye kaghala malighito ghose ighandikighwe mna ichitabu achino. 28 IMNDEWA kona maya ng'ulu, na kwa imaya yake ayo ng'ulu kawabula mna isi yawo na kawasa mna isi ingi, ka pfaili leloli." 29 Aghala ighapfisike ghake yeye IMNDEWA, Imulungu wetu, lekeni aghala ighaghubulighwe ghakwetu na wanetu matsuwa ghose, ili tughakinde aghano ghose ighali mna ghamalaghitso aghano.