1 "Apfo lelo mumkunde IMNDEWA, Imulungu wenu na ghakindeni ghose ghayobama na ghamalaghitso ghake, na imiko yake, na ghamalamtsi ghake. 2 Leloli mtange ghendo, ka nene nolonga na mwemwe yamwonile na yammanyile ukuhigha kwe IMNDEWA, Imulungu wenu pfakuli, wala silonga na iwana wenu baye, wawo ng'awonile baye ukulu wake, wala ghumoko ghwake ghune ngupfu, na ighugholoke. 3 Mwona pfitango na pfinu pfayatendile mna isi ya Misiri, na mwona achila chayamtendile Farao, imfalume wa Misiri na isi yake yose. 4 Pfipfia mwona achila chayatendile kwa lijeshi lya Misiri, na iwafalasi na imituka yawo, na mwona pfayaghatendile ghamatsi gha Bahali ya Shamu ghawaghubike ahala hawang'ali wowawinza, na apfila pfayawakomile mbaka leloli ino. 5 Na mwona aghala ghayawatendele akula kunyika ng'ana mwemwe mpfike baye hano. 6 Pfipfila mwona aghala ghayawatendile Datani, na Abiramu, iwana wa Eliabu, yeye Eliabu tsa mwana wa Rubeni. Lidongo litulika na kuwamesta wose na wanu wa kaye tsawo, na tsing'anda tsawo, na iwatumwa wawo, na iwanyama wawo. 7 Kwa tsinenge tsenu wenyegho mwona ghendo pfinu pfikulu IMNDEWA pfayatendile."

8 "Apfo mghakinde malaghitso ghose ghanimlaghitsani leloli, ili muwe na ngupfu yo kughenda na kuisola isi ayo yambama kuilokela ghumto, 9 ili mkakale matsuwa mengi mna isi ine lidongo linoghile kwa ukulima na ukufughila iyawalongele iwahenga wenu, iyatsoweng'a wawo na watsukulu wawo. 10 Isi yamghenda kuisola si ka isi ya Misiri baye, iyamlawile. Ako mhanda mbeghu tsenu, na mtsighelela ghamatsi ka mghunda ghwa mbogha. 11 Lekeni isi yamghendela kuisola ina pfidunda na pfiwala, na ghamatsi ghake gha mvula, igholawa mlanga. 12 IMNDEWA, Imulungu wenu yuyo iyoibetetsa isi ayo, na tsinenge tsa IMNDEWA wenu tsoilolesa bila kwipfa kulawa haghukwanza ghumwaka mbaka haghumala."

13 "Apfo ka mwoghakinda ghamalaghitso ghanimwing'ani leloli, mwomkunda IMNDEWA, Imulungu wenu na kumtumikila yeye kwa ghumoyo ghwenu ghwose, 14 yeye katsowaghalila imvula ya chila msimu mna isi yenu, imvula ya masika na mvula ya minga ili mpfune pfijo pfingi na dipfai ya sambi, na ghamapfuta. 15 Katsoyotetsa imitsani ya ukuja iwanyama wenu mna mighunda yenu, namwe mtsakuja na kwighuta. 16 Mwalangitse, imimoyo yenu ileke kubughighwa na kuitegheletsa milungu ingi na kuitambikila. 17 Mng'atenda apfo, IMNDEWA, Imulungu wenu katsowonela maya, katsodiwa kulanga imvula ileke kutowa, na lidongo lyenu ng'alitsomela ipfijo baye, na baho ng'amtsokawa kuhupa mna isi inoghile iyomwing'ani IMNDEWA. 18 Aghano ghanilonga ghekeni mmoyo mwenu na mwitwi mwenu, ghoweni mmoko mwenu ka chitango, na mghabandike mchihanga. 19 Muwafunde iwana wenu aghano ghanilonga, muwalongele hamkala akaye na hamkwanga mnzila, hamuwasa na hamlamka. 20 Mghandike mna imilango ya tsing'anda tsenu na mna ghamalango gha imiji yenu, 21 ili matsuwa ghenu na ghamatsuwa ghe iwana wenu ghongetseke mna isi iyelahile IMNDEWA kuweng'a iwahenga wenu, ka pfapfili kwa lilanga pfalikala matsuwa mengi mchanya mwa isi."

22 "Mng'aghakinda ghamalaghitso ghose ghanimwing'ani, ka mwomkunda IMNDEWA, Imulungu wenu, mwakwanga mna tsinzila tsake, na mwomnanahila yeye, 23 naye IMNDEWA katsowawinga iwanu wa isi atso hambele yenu, namwe mtsotsiboka isi tse wanu isi tsine wanu wakulu, na wane ngupfu kubita mwemwe. 24 Chila hanu hamkanyagha hatsakuwa henu, ukulu wa isi yenu utsakwanzila inyika ihili ubali wa kusini mbaka mna pfidunda pfa Lebanoni, ubali wa kasikazini, na kulawa ghumto ghwa Efulati mbaka kune ibahali ya Mediterania ubali wa maghalibi. 25 Kutsakuwa kuduhu munu iyodaha kuwatowa, kwokwose kula kwamghenda IMNDEWA, Imulungu wenu katsowatenda iwanu wone wogha, nawo watsowapfuka ka pfayalongile."

26 "Mlole, leloli nowabama msaghule chinu chimwe, ukubalikighwa au ukulighitighwa. 27 Mtsobalikighwa ka mng'aghakinda ghamalaghitso ghe IMNDEWA, Imulungu wenu, aghala ghanimwing'ani leloli. 28 Lekeni mtsolighitighwa mng'alema kughakinda ghamalaghitso ghano, na kughaleka aghala ghaniwalaghitse, na kuitambikila milungu ingi aila ng'ana muimanye baye. 29 IMNDEWA, Imulungu wenu hayatsowaghala mna isi yamghenda kuisola iwe yenu, mkeme mna chidunda cha Gerizimu mkemelele tsibalaka, na mkeme mna chidunda cha Ebali mkemelele malighito. 30 Ka pfammanya pfidunda pfino pfibili pfa kumwambu mwa ghumto ghwa Yoridani, pfelolesa na ubali wa kwalikuswela litsuwa, mna isi ya Wakanani iwokala Arabu, isi iilolesa na ghumji ghwa Giligali. 31 Mwobamighwa mloke ghumto ghwa Yoridani, kuisola isi iyomwing'ani IMNDEWA, Imulungu wenu. Hamtsoisola na kukala mumo, 32 mwalangitse kughakinda ghamalaghitso ghose ghanimwing'ani leloli."