1 Immale yang'akwela pinga na hambele ng'omkunda baye kwaapfila kona chinu chihile cha chinyala, na yang'amwandikila ibaluwa yo kumleka, na kumwing'a ipinga ayo yoke. 2 Na ka ipinga ayo kakwelighwa na mmale yungi, 3 naye pfipfila ng'omkunda baye, apfo komwandikila ibaluwa ya ukumleka, yamwing'e na yamleke yoke hakaye yake. Au ka immale wake wa keli yang'afa, 4 immale yalongole kumkwela na kumleka ng'obamighwa baye kumkwela keli kwaapfila ipinga ayo keha hambele ha IMNDEWA. Ichinu acho chomwihila IMNDEWA. Mleke kutenda inzambi ka aino mna isi iyomwing'ani IMNDEWA, Imulungu wenu iwe yenu.

5 "Imunu iyakwelile sambi yaleke kughenda kwitowa kung'ondo, wala kwing'ighwa ng'onde yoyose, yakale hela kwa mwaka ghumwe ili yebwede hamwe na imwehe wake iyamkwelile."

6 "Ung'amwatsima imunu chinu chako, uleke kumlongela yeke poni libwe lyake lya ukusaghila ipfijo, liwe lya hasi au lya mchanya, ung'atenda apfo kowika poni ughima wake."

7 "Munu wowose yang'amghogha Mwisiraeli miyaghe na kumtenda mtumwa na kumuutsa, ayo iyamghoghile miyaghe yakomighwe. Apfi pfipfo pfamtsotenda ghehile ghamale mna mwemwe."

8 "Imunu yang'awa na utamu wihile wa ngotsi, mwalangitse ghendo kutenda aghala ghawowalongela Walawi iwatambika. Mghakinde ghoya aghala ghose ghaniwalaghitse. 9 Mkumbuke achila IMNDEWA Imulungu chayamtendile Miriamu hamng'ali mwa mnzila kulawa Misiri."

10 "Ung'amwatsima chinu chochose miyagho, uleke kwingila mng'anda mwake na kusola ghwanda lyake liwe poni, 11 ila umbete kunze na umleke yeye mwenyegho yakughalile lighwanda alyo. 12 Yang'awa mhingwa uleke kukala na lighwanda lyake chilo chose, 13 umuyitsile nemihe ili yeghubike nechilo, naye katsolonga mighede kuna ghweghwe. Na chautendile chitsakoneka chinogha hambele ha IMNDEWA, Imulungu wenu."

14 "Mleke kumbunza imunu yamumkema yawasang'anile kwa misi imwe, iyali mhingwa na iyalihela chinu, yawe Muisiraeli miyagho au yawe mgheni iyokala mna imiji yenu. 15 Mumlihe litobole lyake chila haipfika nemihe, kwaapfila yeye kamhingwa na ghumoyo ghwake ghohuwila kubokela maliho agho. Lekeni ka ng'amumliha baye, yeye katsomlilila IMNDEWA, naghwe kutsakoneka kuna nzambi. 16 Tsina aba waleke kukomighwa kwa nzambi tsawatendile iwana wawo, na iwana pfipfila waleke kukomighwa kwa tsinzambi tsawatendile aba tsawo. Chila munu yakomighwe kwa nzambi iyatendile imwenyegho."

17 "Mleke kuwema aghala ghose ghawobamighwa weng'ighwe iwagheni na wana iwachuwa, na ung'amwatsima ichinu ipinga chitsuka, uleke kumlekela yeke poni lighwanda lyake. 18 Mkumbuke ghendo ka mwemwe namwe tsa mwa watumwa mna isi ya Misiri na IMNDEWA, Imulungu wenu kawakombola kulawa ako. Apfo nowalaghitsa mwemwe mtende apfo. 19 Hampfuna ipfijo pfenu kumghunda namwe mwisemwa makinza ghe pfijo, mleke kuya na kusalalitsa, apfo muwalekele iwagheni, ipfitsuka na iwachuwa, naye IMNDEWA, Imulungu wenu katsowatenda mwemwe mmbalikiighwe mna chila chinu chamtenda. 20 Hambawa matunda ghe mitseituni mna mibiki yenu, mleke kuya na kusalalitsa, matunda ghakalile muwalekele iwagheni, iwachuwa na ipfitsuka. 21 Hamghondola tsinzabibu mna mighunda yenu mleke kuya na kusalalitsa, agho ighakalile walekeleni iwagheni, ipfitsuka na iwachuwa. 22 Mleke kwisemwa ka mwemwe tsamwa watumwa akula Misiri. Apfo nowalaghitsa kutenda aghano."