1 Musa kawakema hamwe wanu wose wa Isiraeli, kawalongela, "Mwemwe Isiraeli, tegheletseni malaghitso na mahigho ghaniwalongela leloli. Mwilangulitse na mwalangitse ukughakinda ghoya. 2 IMNDEWA, Imulungu wetu tsakeka laghano na twetwe ako Horebu. 3 Ng'ekile lilaghano alyo na iwahenga wetu waliyeka baye, lekeni keka na twetwe, twose ituli waghima leloli. 4 Yeye tsakalonga na mwemwe akula kuchidunda kulawa mna ghumoto ka imunu pfayolonga na miyaghe chihanga kwa chihanga. 5 Matsuwa aghala nene tsanyima haghati henu na IMNDEWA, kuwalongela achila chayalongile, kwaapfila tsampfuka ghumoto aghula, wala ng'amgheluke baye kuchidunda, naye kalonga, 6 ‘Nene na IMNDEWA, Imulungu wenu yaniwalapfile isi ya Misiri, kwamkalile watumwa.’ "

7 "Mleke kuwa na milungu ingi, ila nene niliyeka."

8 "Mleke kwisongolela chinyagho, ichighala na chinu chochose chili kulanga au chili muisi wala chili mmatsi hasi ha isi."

9 "Mleke kwinama na kupfitumikila, kwaapfila nene IMNDEWA, Imulungu wenu, na Imulungu yane wipfu, nowahigha iwana kwa aghala ghehile gha iwahenga wawo, mbaka mweleko ghwa kadatu na ghwa kane ghwa awala iwonihila. 10 Lekeni nowonela libatsi iwanu wa lweleko elufu iwonikunda, na iwokinda malaghitso ghangu."

11 "Mleke kulikema hela taghwa lya IMNDEWA, Imulungu wenu, kwaapfila IMNDEWA ng'atsoleka baye ukumuhigha munu wowose iyolikema hela litaghwa lyake."

12 "Mlikinde litsuwa lya Sabato, na mlike lienzeluke, ka IMNDEWA, Imulungu wenu pfayawalaghitse. 13 Matsuwa sita msang'ane, mtende sang'ano tsenu tsose, 14 lekeni tsuwa lya saba tsuwa lya Sabato, alyo libaghulighwa liwe lyangu nene. Mna litsuwa alyo mleke kusang'ana, mwemwe wala iwanenu wamale, wala iwanenu wapinga, wala imtumwa wenu mmale au pinga, wala ng'ombe wenu, wala chihongwe wenu, wala iwagheni iwokala mkaye mwenu ili watumwa wenu wapinga na wamale pfipfila wabwihile ka mwemwe. 15 Mkumbuke ka mwemwe tsa mwa watumwa ako Misiri, na ka IMNDEWA, Imulungu wenu kawakombola kwa ghumoko ghwake ghuna ingupfu na ighugholoke, apfo Imulungu wenu kawalaghitsa mlikinde litsuwa lya Sabato."

16 "Muwategheletse aba tsenu na mai tsenu, ka IMNDEWA, Imulungu wenu pfayawalaghitse, ili mkale matsuwa mengi, na mkabalikighwe mna isi iyomwing'ani IMNDEWA, Imulungu wenu."

17 " ‘Mleke kukoma.’ "

18 " ‘Mleke kutenda ughoni.’ "

19 " ‘Mleke kwiba.’ "

20 " ‘Wala mleke kuwabangitsila wayenu.’ "

21 " ‘Mleke kuwasulukila wehe wa wayenu, wala mleke kusulukila ng'anda ya wayenu, mighunda yawo, wala iwatumwa wawo wamale, wala iwatumwa wawo wapinga, wala wang'ombe wawo, wala pfihongwe wawo, wala chinu chochose chayawali nacho wayenu.’ "

22 "Aghano ghagho ghamalaghitso IMNDEWA ghayawalongele mwemwe wose kwa kukemelela akula kuchidunda kulawa mmoto, na libingu, na ichisi chikulu, wala ng'ongetse chinu chingi baye. Kuya kaghandika mna mabamba meli gha ghamabwe kangaya nene."

23 "Namwe hamuhulike litsi kulawa mchisi aku ichidunda chakwaka moto, iwakulu wose wa ghamakabila ghenu na wanzehe wenu wasoghela habehi. 24 Nawo walonga, ‘IMNDEWA, Imulungu wetu katulangusa utunitso wake, na ukulu wake, na tuhulika litsi lyake kulawa mmoto. Na leloli twona ghendo ka yodahika Imulungu kulonga na munu, na imunu ayo yawe mghima. 25 Lekeni lelo, hebali tufe? Ghumoto aghuno mkulu ghutsotukoma ghendo, na tung'ahulika keli litsi lye IMNDEWA, Imulungu wetu, tutsakufa. 26 Angu munu wachi yahulike litsi lya Imulungu yali mghima kolonga kulawa mmoto, ka twetwe pfatumuhulike, kuya yawe mghima? 27 Seghela habehi ghweghwe Musa, ukahulike ghayatsolonga IMNDEWA, Imulungu wetu, kuya uye utulongele ghose ghayokulongela. Twetwe tutsoghahulikitsa na kughakinda.’ "

28 "Naye IMNDEWA kahulika litsi lya ghamalonga ghenu ghamnilongele nene, naye kanongela, ‘Nihulika ghawakulongele iwanu awano, na ghose ghawakulongele ghanogha.’ 29 Wang'awile na ghumoyo ka aghuno matsuwa ghose, ghwa kunipfuka, na kukinda malaghitso ghangu matsuwa ghose, wang'abwedile wawo na wana wawo matsuwa ghose. 30 Lelo uke, uwalongele, ‘Muye kuna ipfibumbulika pfenu. 31 Lekeni ghweghwe Musa wime habehi na nene, nani nitsokulongela imiko yose, mahigho, na malaghitso, ghautsowalangulitsa waghakinde mna isi yaniweng'a iwe yawo.’ "

32 "Apfo mwalangitse, mghatende ghose ka IMNDEWA, Imulungu wenu pfayawalaghitse, ghakindeni ghendo. 33 Muiwinze inzila yose iyawalaghitse IMNDEWA, Imulungu wenu, ili mkale waghima, na kuko mtsobokela ghanoghile, namwe mtsakongetsa matsuwa ghenu ghawe mengi mna isi yamsola iwe yenu."