1 "Chila haghumala ghumwaka ghwa saba, mwobamighwa mleke kuwadai keli wayenu. 2 Mtende apfi, chila munu iyamwatsime Muisiraeli miyaghe, yaleke kumdai, wala yaleke kumkomangitsa yoitse, kwaapfila ghumwaka saba ghwa IMNDEWA ghwa ukuwalekelela iwanu iwodaighwa ma ghupfika. 3 Mwodaha kumdai imgheni yawalihe, lekeni achila chayatsime ndughu yako uleke kumdai."

4 "IMNDEWA, Imulungu wenu katsowabaliki mna isi iyoweng'a iwe yenu, na mna mwemwe ng'akutsakuwa na munu wowose iyali muhingwa, 5 mtsobokela agho ka mwomtegheletsa IMNDEWA Imulungu wenu na kughakinda pfinoghile ghamalaghitso ghake ghanimwing'ani leloli. 6 Agho ghatsolawila kwaapfila IMNDEWA Imulungu wenu katsowabaliki, ka pfayalongile. Namwe mtsowakopesha wanu wa isi tsingi, lekeni ng'amtsokopa baye, mtsotawala wanu wa isi tsingi, lekeni ng'amtsotawalighwa baye."

7 "Ka mwokala na Muisiraeli muhingwa mna tsikaye tsenu mna isi iyomwing'ani IMNDEWA, Imulungu wenu, mleke kuwa na misi kwe munu ayo wala kulema kumwapfila. 8 Lekeni muwe na ghamoko gha uluso kwe munu ayo, mumkopeshe chochose chayobama. 9 Walangitse uleke kwalangula pfihile mmoyo mwako, kolonga, ‘Ghumwaka ghwa saba ghwa ukuleka kudai ghwa habehi,’ Naghwe komlola Muisiraeli miyagho kwa nenge ihile na kolema kumwing'a chochose, yeye kodaha kumlilila IMNDEWA, naghwe kutsakwoneka ka kuna nzambi. 10 Umwing'e miyagho kwa uluso na uleke kulongeleka mmoyo kwaapfila IMNDEWA Imulungu wako katsokubaliki mna tsing'onde tsako tsose na mna chila chinu chautenda. 11 Kwaapfila iwahingwa mtsokala nawo matsuwa ghose mna isi yenu. Apfo nowalaghitsa muwe waluso kwa ndughu tsenu iwolomba na iwahingwa iwokala muisi mwenu."

12 "Ka ndughu yako Muebrania, yawe ipinga au mmale, yang'autsighwa kuna ghweghwe naye yang'akusang'anila kwa miyaka sita, mna ghumwaka ghwa saba umlekelele yoke. 13 Hautsomlekelela yoke, uleke kumleka yoke ghamoko ghaliyeka. 14 Umwing'e kwa uluso kulawa mna ipfinu pfayakwing'ile IMNDEWA Imulungu wako. Kodaha kumwinga ing'olo, ipfijo, na dipfai 15 Mkumbuke ka mwemwe tsa mwawatumwa mna isi ya Misiri, na IMNDEWA Imulungu wenu kawakombola, apfo leloli nomwing'ani laghitso lino."

16 "Lekeni imtumwa wako yang'akulongela, ‘Nene sibama kuka baye,’ kwaapfila yeye kokukunda ghweghwe na iwanu iwali hakaye yako, naye kokala naghwe pfinoghile, 17 usole sanzia na utobole lighutwi lyake mbaka lingile mna ghumlango ghwako naye kakuwa mtumighwa wako wa matsuwa ghose, na mtendele pfipfo mtumwa wako pinga. 18 Mleke kona usungu haumlekelela imtumwa wako yoke. Kwaapfila tsing'onde tsayakusang'anile kwa miyaka sita tsongetseka mala mbili kubita tsisang'ano tsa imtumwa iyakutsa na kuka, na IMNDEWA Imulungu wako katsokumotetsa kwa ghose ghoutenda."

19 "Mlapfileni IMNDEWA Imulungu wenu iwana wose wamale we iwanyama wenu iwanzile koneka kulawa kune wang'ombe wenu, wamene na iwang'olo wenu. Mleke kuwaleka iwana awo we ng'ombe wawasang'anile ng'onde tsenu, wala mleke kuwagheta imighala wang'olo. 20 Chila mwaka, ghweghwe ne wanu wali akaye yako, muwaje iwanyama awo hambele he IMNDEWA, Imulungu wenu, hanu hayosaghula IMNDEWA. 21 Lekeni imnyama ayo yang'awa na chilema, chiwe cha kudeng'uka, cha nenge au chilema chochose chikulu, uleke kumlapfa yawe nambiko kwa IMNDEWA Imulungu wako. 22 Iwanyama awo muwaje mmakaye mwenu, iwanu wose iwelile na iwehile, mwodaha kuwaja ka pfamuwaja idondolo na indetsi. 23 Lekeni mleke kuja idamu, muimwaghe hasi ka ghamatsi."