1 "Tegheletsa, ghwe lilanga, agha ghanilonga,

hulika, ghwe isi, agha ghanilonga umlomo mwangu,

2 Malangulitso ghangu ghahulumke ka mvula,

ghanilonga ghawe ka tungwe,

ka mawagha mna mitsani mibisi,

ka imvula ndodo mna mitsani ikota sambi.

3 Nitsolikemelela litaghwa lya IMNDEWA,

namwe mlonge, ‘Mulungu wetu mkulu.’

4 Yeye kabambalawe, sang'ano tsake tsitimilika,

nzila tsake tsose tsinogha.

Imulungu iyotogholighwa, iyalihela totso,

yeye kotenda aghala ighanoghile na ighagholoke.

5 Lekeni mwemwe mumtendela pfihile yeye,

mwighuma chinyala muwenyegho, na ng'amli wanaghe keli baye,

mwemwe mwa lweleko lwihile na ilwaghile.

6 Apfi mwobama kumliha apfino IMNDEWA,

mwemwe wanu wabotsi na mlihela tsimbutsi?

Angu yeye si aba wenu baye, Maumba wenu,

iyawaumbile na kuweka muwe na tsingupfu?

7 Mkumbuke matsuwa gha ghumwande,

mwalangule ipfeleko ipfihupile,

waghutseni aba tsenu nawo watsowalongela,

waghutseni iwanzehe wenu, nawo watsowapetela.

8 Imulungu iyali kuchanya ng'ani hayawagholele iwanu isi tsawo,

hayawabaghulile iwanu isi tsawatsokala,

kawekela imibaka chila wanu, kwa ukulola iwana wa Isiraeli wali wangapi.

9 Kwa apfila kesaghulila iwanu wa Yakobu wawe wake,

na tuwe mali yake.

10 Kawona mna isi ya inyika,

mna isi ya nyika ng'ulu ighuma wogha, ina beho kulu iliduma,

kawakinga na kawalela, kawatunza ka imunu pfayochitunza ghoya ichiluli cha inenge yake.

11 Ka apfila magengele pfayochifumula ichibali chake,

koghuluka mchanya mwa iwanaghe,

kopamanyala ghamabawa ghake yawakindilise,

kowaduta mchanya mwa ghamabawa ghake.

12 Yeye IMNDEWA yaliyeka yuyo iyawalongotse,

tsakuduhu mulungu yungi iyamwapfile.

13 Kawabititsa mna isi tsili mpfidando,

nawo waja pfijo pfa kumghunda,

kaweng'a uki ulawile mna mabambalawe walambite,

na waja ghamapfuta ighalawile mna lidongo lya mabwemabwe.

14 Kaweng'a ijibini, na matsiwa gha wanyama wanwe,

ghamapfuta gha wang'olo na wamene wanenehe,

na wang'olo wamale wa Bashani na wamene,

kaweng'a ingano inoghile ghendo waje, na dipfai inoghile wanwe.

15 Waisiraeli tsawaneneha na wamlema,

tsawaneneya na wadegheta,

kuya wamleka Imulungu iyawaumbile,

walibetsa Libambalawe liwakombole.

16 Wamtemda yayonele wipfu milingu ingi,

wamtenda yone maya kwa ipfinu pfa ukudesa pfawatendile.

17 Wapfitambikila pfinyamkela, ipfili si milungu baye,

imilungu aila ing'ana imanyike baye,

imilungu itsile sambi,

imilungu aila ng'ana wahenga wawo waipfuke baye.

18 Mumleka Bambalawe iyaweng'ile ugima,

mumsemwa Imulungu iyaweleke.

19 IMNDEWA kona alino, naye kawalema iwanaghe wamale na wapinga,

kwaapfila iwanaghe wenyegho wamtenda yaghudubuke.

20 Kalonga, ‘Nitsopfisa chihanga changu, ndeke kuwapfila,’

ndole watsotsighila kwani,

kwaapfila wawo wawa lweleko lwihile,

iwana ing'awotogholighwa baye.

21 Wanenda nene mbone wipfu kwa achila ichili si mulungu baye,

wanenda nene mbone maya kwa pfinyagho pfawo,

na nene nitsowatenda wawe na wipfu kwa iwanu awala iwali si wanu baye,

nitsowatenda wone maya kubitila isi ya iwanu wabotsi.

22 Imaya yangu itsokoletsa moto,

yolakatsa mbaka hasi kutsimu,

yolakatsa isi na chila chinu chili mumo,

yolakatsa misingi ya ipfidunda.

23 Nitsolunditsa ghamaghayo mna mwemwe,

nitsowatowa na mishale yangu mbaka yose imale.

24 Watsosoka kwa nzala,

matamu makulu ghatsowakoma,

nitsowaghalila wanyama wa kubagho wawaghoghe,

na wanzoka wana isumu iwotambala hasi wawalume.

25 Ing'ondo itsoghala ukufa kunze mwa tsikaye tsenu,

wogha utsakwingila mghati mwa tsing'anda tsenu,

iwasongolo na iwandele watsokomighwa,

iwana iwakong'a na iwanzehe nawo watsokomighwa.

26 Tsanonga nitsowahonda wawe timbwisi,

iwanu wawasemwe ghendo.

27 Lekeni sibamile baye awala iwowehila weghode,

walonge, ‘Twetwe yatuwatowile,

na si MNDEWA baye iyawatendile agha ghose.’

28 Waisiraeli wawanu walihela tsimbutsi,

na wahela ghamahala ghendo.

29 Wang'awile na tsimbutsi wang'amanyile hebali tsawatowighwa,

na wang'atangile choni chitsowalawila.

30 Angu munu yumwe tsayodahatse kuwatowa wanu elufu imwe,

na wanu weli tsawodahatse kuwawinga wanu elufu kumi?

Kwaapfila iyali Bambalawe lyao kawasa,

na iyali IMNDEWA wawo kawalapfa watowighwe.

31 Hata awala iwotuhila womanya ghendo,

ka bambalawe wawo si ka Bambalawe wetu baye.

32 Wawo ka minzabibu ya Sodoma,

ilawa mna mighunda ya Gomola,

tsinzabibu tsake tsimema sumu,

pfikungwi pfake pfimema usungu.

33 Dipfai yake sumu ya nzoka,

ka sumu ya moma.

34 IMNDEWA kolonga, ‘Angu nene sighekile akiba baye agha ghose,

na kughahindila mna ihatsina yangu?

35 Nene nitsowoyitsila chawatendile, nitsowaliha chicho,

maghulu ghawo haghatsotelebuka,

matsuwa ghawo gha ukughaya gha habehi ghendo,

na ukutsigha kwawo kwa habehi.’

36 IMNDEWA katsowahigha na kuwona iwanu wake wahela matotso,

na kuwonela libatsi iwatumwa wake,

ahala hayowona wahela ngupfu,

na kuduhu munu iyatsolekighwa, imtumwa wala ayula iyali si mtumwa baye.

37 Naye IMNDEWA katsoghutsa, ‘Lelo milungu yenu ilikwani?

Ayo ng'ambe mibambalawe yenu yamtsumilile kwipfisa.

38 Imilungu ijile ghamapfuta gha tsinambiko tsenu,

inwele idipfai ye nzabibu yamlapfile nambiko,

lelo inuke imwapfileni,

lelo iweng'eni hanu ha ukwipfisa.

39 Lelo sambi mlole, nene na Imulungu,

wala kuduhu Imulungu yungi ila nene niliyeka,

nene nokoma na nakwing'a ugima,

nene nolagha na nohonetsa,

na kuduhu munu iyodaha kumkombola yoyose mna ghumoko ghwangu.

40 Nakwinula ghumoko wangu kulanga na nelaha,

ka nene pfanikala mgima matsuwa ghose,

41 haninola limaghe lyangu ilimelemeta,

na hanigholosa ghumoko ghwangu nihighe,

nitsowoyitsila ghaghala ghawonendela iwonihila,

na kuwakoma awala iwonihila nene.

42 Mishale yangu itsakunwa idamu mbaka ipatike,

limaghe lyangu litseghuta inyama,

na kunwa idamu ya awala iwakomighwe na iwaghoghighwe,

na kunwa idamu ya pfilongotsi wawo.

43 Deng'eleleni mwe wanu wa tsiisi,

hamwe na iwanu wake, kwaapfila kowoyitsila ghaghala ghawawatendele iwatumwa wake,

kowatendela ghaghala awala iwomwihila,

koitenda isi yele, hamwe na iwanu wake.’"

44 Musa na Yoshuwa mwana wa Nuni walonga ghamalonga ghose gha wila uno aku Waisiraeli woutegheletsa mmaghutwi mwawo.

45 Musa hayamalitse kuwembila malonga aghano Waisiraeli, 46 kawalongela, "Ghekeni mmoyo malonga aghano ghose ghaniwalongele leloli aino, namwe mdahe kuwafunda wanenu waghakinde ghendo ghose ighali mna malaghitso aghano. 47 Kwaapfila ighali mumo simalonga hela baye, lekeni ghana ugima wenu, ghakindeni namwe mtsokala matsuwa mengi mna isi yamghenda kuisola iwe yenu kumwambu mwa ghumto Yoridani." 48 Litsuwa lilila IMNDEWA kamlongela Musa, 49 "Ghenda kuna ipfidunda pfa Abarimu ipfili mna isi ya Moabu, ilolesa na ghumji ghwa Yeriko, ukagheluke chidunda cha Nebo na uilole isi ya Kanaani yaniweng'a Waisiraeli iwe yawo. 50 Kutsakufila kuko kuna ichidunda acho chaugheluka, naghwe kutsoghenda akula kwawali iwahenga wako, ka pfayafile ndughu yako Aruni mna chidunda cha Holi, na kughenda kwawali iwahenga wake. 51 Kwaapfila mwemwe mwose weli tsamnitendela matotso hambele ha Waisiraeli ahala hamkalile hana ghamatsi gha Meriba, habehi na ghumji ghwa Kadeshi mna inyika ya Sini, mwemwe ng'amnitendile baye nyoneke nienzeluka mna Waisiraeli. 52 Apfo, kutsoyona isi kwa kutali, lekeni ghweghwe ng'utsakwingila baye mna isi yaniweng'a iwanu wa Isiraeli."