1 "Ka kolawila nabii au munu iyolota tsindoto mna mwemwe, na kuwalapfila pfitango au pfihulo, 2 kuya ipfitango na ipfihulo apfo pfing'alawila, naye kolonga, ‘Tuiwinze milungu ingi na kuitambikila, milungu ing'amuimanyile baye,’ 3 mleke kughategheletsa aghala ghayolonga inabii ayula, au imunu ayula iyolota tsindoto. Kwaapfila IMNDEWA, Imulungu wenu komghetsani ili yone ka mwomkunda yeye kwa ghumoyo ghwenu ghwose na ghumuhe ghwenu ghwose. 4 Mwemwe mumuwinze na mumpfuke IMNDEWA, Imulungu wenu, mghakinde malaghitso ghake, na aghala ghayolonga, mumtumikile na mumnanahile yeye. 5 Inabii au imunu ayo iyolota tsindoto kobamighwa yakomighwe, kwaapfila kawalongela mleke kumtegheletsa IMNDEWA, Imulungu wenu, iyawalapfile Misiri na iyawakombole mna isi ya utumwa. Imunu ayo kobama yawaghise na kuwatenda mleke kuwinza aghala ghayawalaghitse IMNDEWA. Apfi pfipfo pfamtsotenda ighehile ghamale mna mwemwe."

6 "Ka ndughu yako wa tombo limwe, au lumbu wako, au mwanagho, au mwehe wako yumkunda sideke, au sale yako mkulu yang'akulongela chinyelenyele, ‘Tuke takaitambikile milungu ingi.’ Mwemwe wala wahenga wenu ng'ana waimanye baye milungu ayo, 7 milungu ya iwanu iwali habehi na mwemwe au iwali kutali, kulawa utsigho auno mbaka ungi. 8 Lekeni uleke kutoghola, wala kumtegheletsa, uleke kumwonela libatsi, wala uleke kumleka, wala uleke kumpfisa, 9 umkome ghendo, ghweghwe wanduse kumtowa kuya wanu wangi nawo wamtowe. 10 Mtoweni na ghamabwe mbaka yafe, kwaapfila tsakabama yakutende uleke kumtegheletsa IMNDEWA, Imulungu wako, iyakukombole kulawa Misiri, mna isi ya utumwa. 11 Hamtenda apfo, Waisiraeli wose watsohulika na kupfuka, na haduhu munu wowose iyatsotenda keli chinu chihile ka acho."

12 "Mng'ahulika mna ghumji ghumwe mna imiji iyomwing'ani IMNDEWA, Imulungu wenu, 13 ka wanu wehile wolawila mna mwemwe, wowaghisa iwanu wa imiji ayo, wolonga, ‘Tuke tukaitambikile milungu ingi,’ namwe ng'amuimanyile baye, 14 Hamtsohulika imbuli ayo, muipelembe na mghutseghutse, ka ghatendeka ghehile mna mwemwe, 15 wakomeni kwa imimaghe iwanu wose iwokala mna ghumji aghwo na iwanyama wawo. Na ghumji ghwawo mghuhinye ghendo. 16 Mkunge pfinu pfose pfa iwanu iwokala mna imiji ayo na mpfike hamwe mna ichibwalu na mpfilakatse pfiwe nambiko kwa IMNDEWA, Imulungu wenu, na ghumji aghwo ghutsohinyika matsuwa ghose na ng'aghutsotsengighwa keli baye. 17 Chinu chochose ichilighitighwe mleke kuchisola chiwe chenu, ili IMNDEWA wenu yaleke kwona maya, ila yawonele libatsi, na kuwatenda mwemwe mwongetseke ka pfayelaghane na iwahenga wenu, 18 ka mwomtegheletsa IMNDEWA, Imulungu wenu, kwa kukinda malaghitso ghake ghanimwing'ani leloli ino, na kutenda aghala ghanoghile hambele hake."