1 Hayafile Musa, imtumighwa wa IMNDEWA Imulungu, IMNDEWA kamlongela Yoshua mwana wa Nuni, iyali mtumighwa wa Musa, 2 "Imtumighwa wangu Musa kafa. Lelo ghweghwe na Waisiraeli wose mwisafulule mloke ghumto ghwa Yoridani, mghende mna isi yanibama kuweng'a. 3 Nitsomwing'ani chila hanu hambita, ka pfanilaghane na Musa. 4 Imibaka ya isi yenu itsakuwa apfino, ubali wa kusini mtsebakana na inyika, ubali wa kasikazini mtsebakana na pfidunda pfa Lebanoni, ubali wa mashaliki mtsebakana na ghumto aghula mkulu ghwa Efurati, na ubali wa maghalibi mtsebakana na isi yose ya Wahiti mbaka kuna ibahari ya Mediteraniya. 5 Haduhu munu iyatsakwima yetowe na ghweghwe mna ghamatsuwa ghose gha ughima wako, ka pfanimwapfile Musa, naghwe nitsokwapfila pfipfo. Nitsokala naghwe na wala sitsokuleka baye. 6 Ughangamale na uleke kutenyuka, kwaapfila kutsowalongotsa iwanu awano kuihala isi yanilahile kuweng'a iwahenga wawo iwalongole. 7 Ughangamale na uleke kutenyuka, walangitse kughakinda malaghitso ghose ghayakwing'ile mtumighwa wangu Musa. Uleke kughabetsa ghamalaghitso agho, naghwe kutsobweda kwokwose kwaughenda. 8 Walangitse uleke kwisemwa ukusoma ichitabu achino cha ghamalaghitso, ughalangule ghose ighandikighwe mumo chilo na misi, ili udahe kughawinza pfinoghile ghose ighali mumo, naghwe kutsobweda na kupata ghose. 9 Apfi si nene baye yanikulaghitse? Ughangamale na uleke kutenyuka. Uleke kupfuka wala kuya kuchughu, kwaapfila IMNDEWA, Imulungu kahamwe naghwe kwokwose kwaughenda."

10 Apfo Yoshua kawalaghitsa pfilongotsi wa Waisiraeli kalonga, 11 "Mbite mna tsindalo tsa iwanu na muwalongele apfino, ‘Mwike ipfijo pfiwe pfingi, kwaapfila matsuwa madatu haghomala mtsoloka ghumto Yoridani, kughenda kuisola isi iyaweng'ile IMNDEWA iwe yenu.’ "

12 Kuya Yoshua kawalongela iwanu wa kabila lya Rubeni na Gadi na nusu ya kabila lya wanu wa Manase kalonga, 13 "Mleke kwisemwa laghitso lya Musa imtumighwa wa IMNDEWA Imulungu lyamwing'ileni ahala hayalongile, ‘IMNDEWA, Imulungu wenu katsomwing'ani hanu ha ukubwihila, na katsomwing'ani isi aino.’ 14 Wehe wenu, iwana wenu, na imifugho yenu, ikale mna isi iyamwing'ileni Musa, kumwambu akuno kwa ghumto Yoridani, lekeni iwamale wose iwodaha kwitowa watsoloka ghumto aku wakinda tsisilaha, kuwalongolela wandughu tsenu. 15 Mtsowapfila mbaka IMNDEWA hayatsoweng'a hanu ha ukukala tseghamba, ka pfayawatendele mwemwe, nawo waisole isi ayo iwe yawo, iyoweng'a IMNDEWA, Imulungu wenu. Kuya muye mna isi yenu wenyegho, isi iyaweng'ile Musa imtumighwa wa IMNDEWA ili kumwambu mwa Yoridani, kwalilawila litsua."

16 Wamwidika Yoshua walonga, "Ghose agho ghautulaghitse tutsotenda, na kwokwose kwaututuma tutsoghenda. 17 Ka pfatumtegheletse Musa mna ghose ghayatulaghitse, naghwe tutsokutegheletsa pfipfo. IMNDEWA, Imulungu wako yakale naghwe ka pfayakalile na Musa. 18 Imunu wowose iyolema kukinda laghitso lyako, au iyolema kukinda malonga ghako, na chochose chaulaghitsa, katsokomighwa. Lekeni ghweghwe ughangamale na uleke kutenyuka."