1 Kuya IMNDEWA kamlongela Yoshua, "Uleke kupfuka wala kutenyuka ghumoyo, wasole iwanu wako wa ing'ondo wose waghende naghwe, mkaghutowe ghumji ghwa Ai, kwaapfila nikwing'a mmoko mwako imfalume wa Ai na iwanu wake, na ghumji ghwake, na isi yake. 2 Mtsoghuhinya ghendo ghumji ghwa Ai na imfalume wake ka pfamghuhinyile ghumji ghwa Yeriko na imfalume wake. Pfinu pfake na wanyama wake hamuwasola watsakuwa wenu. Mghende mkaghutowe ghumji kulawa ubali wa kuchughu."

3 Apfo Yoshua na iwanu wake wose wa ing'ondo waghenda kughutowa ghumji ghwa Ai. Kawasaghula iwanu elufu salasini wana libapfu lya ukwitowa na kawatuma nechilo. 4 Kawalaghitsa, kalonga, "Tegheletseni ghoya, mwipfise ubali wa kuchughu wa ghumji, mleke kughenda kutali nagho, ila wose mkale ghoya kwa ukwitowa. 5 Nene na iwanu wose iwali hamwe na nene, tutsoghuseghelela habehi kughutowa, na iwanu hawatsolawa kwitowa na twetwe, ka pfawatendile aho mwanduso, twetwe tutsotsuma hambele hawo. 6 Nawo watsotuwinza mbaka tuwaghale kutali na ghumji ghwawo, kwaapfila watsolonga watuwinga ka pfawatuwingile aho mwanduso. Na twetwe twowaleka watuwinge. 7 Kuya mwemwe mtsolawa aho hamwipfisile, na kughusola ghumji. IMNDEWA Imulungu katsomwing'ani mmoko mwenu ghumji aghwo. 8 Hamtsoghusola ghumji, mghulakatse, mtende ka IMNDEWA pfayatulaghitse. Mlole nene nowalaghitsani."

9 Apfo Yoshua kawatuma waghenda mbaka hanu aho hawatsepfisa, wakala haghati ha ghumji ghwa Ai na Beteli ubali wa maghalibi mwa ghumji ghwa Ai. Lekeni Yoshua ichilo acho tsakawasa hamwe na iwanu wa Isiraeli. 10 Nemitondotondo Yoshua kalamka kawakema iwanu hamwe, kuya kawalongolela kagheluka, kaghenda Ai aku kelongotsa na iwanzehe wa Isiraeli. 11 Iwanu wose wa ing'ondo, awala iwelongotse naye, waghenda waghuseghelela habehi ghumji aghwo, weka indalo ubali wa kasikazini wa ghumji ghwa Ai, aho tsa hana lwanda haghati hawo na ghumji ghwa Ai. 12 Yoshua kasola wanu wamale elufu tano, kawaghala wakepfise mna lwanda iuli haghati ha Beteli na Ai ubali wa maghalibi wa Ai. 13 Wanu wengi wa ing'ondo tsawakala ubali wa kasikazini, na wamwenga wang'ali wowapfisila ubali wa maghalibi. Ichilo acho Yoshua kawasa kulwanda. 14 Imfalume wa Ai hayonile apfo, yeye na iwamale wose wa ghumji aghwo nemitondotondo wasumka waghenda kwitowa na Waisiraeli mna mhulumko ighughenda Araba. Lekeni ng'amanyile baye ka tsahana Waisiraeli wamwenga wakala kuchughu kwa ghumji wepfisa. 15 Yoshua na Waisiraeli wose wetenda ka wakuya kuchughu, na watsumila kunyika. 16 Iwanu wose iwang'ali wokala Ai, wakemighwa hamwe wawawinze Waisiraeli, na hawang'ali womuwinza Yoshua waghenda na waghuleka kutali ghumji ghwawo. 17 Kuduhu munu hata yumwe mna ghumji ghwa Ai, au ghwa Beteli, yang'aghendile kuwawinza Waisiraeli. Apfo waghuleka ghumji ghwawo mwatsi na kuwawinza Waisiraeli.

18 Kuya IMNDEWA kamlongela Yoshua, "Ughwinule ghumgoha ighuli mmoko mwako, ghulolese Ai, kwaapfila nokwing'a ghumji aghwo mmwoko mwako." Naye Yoshua kagholosa ghumgoha kulolesa ghumji ghwa Ai. 19 Baho Yoshua hayagholose ghumoko ghwake, iwanu iwang'ali wepfisa wasumka ukwinuka, watsumila mna ghumji, wengila na waghusola, baho waghulakatsa kwa moto. 20 Kuya iwanu wa Ai hawalolile kuchughu, wona liyosi mlanga, nawo ng'awadahile baye kutsumila aku au akula, na Waisiraeli awala iwatsumile kunyika wahunduka na wawoyila awala iwang'ali wowawinza. 21 Yoshua na Waisiraeli wose hawonile iwanu iwang'ali wepfisa waghusola ghumji na liyosi lyodimkila kulanga, wahunduka na kuwakoma iwanu wa Ai. 22 Waisiraeli iwengile mna ghumji ghwa Ai nawo walawa na wahulumka kuwawinza iwanu wa Ai. Apfo iwanu wa Ai watsungulukighwa na Waisiraeli chila ubali. Waisiraeli wawakoma wose na ng'awamlekile mghima munu wowose baye. 23 Lekeni imfalume wa Ai wamghogha na wamleka mghima, na wamsola wamghala kwa Yoshua. 24 Waisiraeli hawamalitse ukuwakoma iwanu wa Ai iwakalile kunyika kwawawawingile, woya mna ghumji ghwa Ai na kukoma chila munu iyakalile mumo. 25 Iwanu wose wa ghumji ghwa Ai iwafile mna litsuwa alyo wamale na wapinga tsawapetighwa wapfika elufu kumi na mbili. 26 Yoshua ng'ahulumse baye ghumoko ghwake ighukindile ghumgoha, ighugholoke kulolesa Ai, mbaka hayamalitse ukuwakoma iwanu wose wa Ai. 27 Waisiraeli wesolela wenyegho ipfinu na wanyama ka IMNDEWA pfayamlaghitse Yoshua. 28 Apfo Yoshua kaghulakatsa ghumji ghwa Ai na kaghutenda ghuwe mahame mbaka leloli aino. 29 Kuya wamkondeka imfalume wa Ai mna ghumbiki mbaka nemihe. Litsuwa haliswele, Yoshua kalaghitsa, nawo waluhulumsa ilukuli lwake walwasa hana lilango lya ukwingilila ghumji. Weka lundo kulu lya mabwe mchanya mwa ilukuli lwake, na lilundo alyo lyabaho mbaka leloli aino.

30 Kuya Yoshua kamtsengela matsabahu IMNDEWA Imulungu wa Isiraeli kuna ichidunda cha Ebali, 31 ka Musa imtumwa wa IMNDEWA pfayawalaghitse Waisiraeli. Katsenga kwa kuwinza achila ichandikighwe mna ichitabu cha malaghitso gha Musa, imatsabahu itsotsengighwa kwa mabwe ing'aghasongolighwe na chinu cha chuma. Na mchanya mwa imatsabahu ayo wamlapfila IMNDEWA nambiko tsa ukulakatsighwa na nambiko tsa ukukala tseghamba. 32 Na baho, aku Waisiraeli wose wolola, Yoshua kaghandika keli ghamalaghitso gha Musa mchanya mwa mabwe. 33 Waisiraeli wose, iwanzehe wose, iwagheni wose, iwakulu wawo na walamlitsi tsawema chila ubali wa lisanduku lya lilaghano lya IMNDEWA hambele ha iwatambika Walawi iwadutile lisanduku lya lilaghano lya IMNDEWA. Wamwenga tsawema hambele ha ichidunda cha Gerizimu na wangi tsawema hambele ha chidunda cha Ebali, ka Musa imtumighwa wa IMNDEWA pfayawalaghitse aho mwanduso Waisiraeli pfawatsobalikighwa. 34 Kuya Yoshua kawasomela ghose ighali mna ghamalaghitso, tsibalaka na malighito, ka pfayandikighwe mna ichitabu cha malaghitso. 35 Chila laghitso lyayalaghitse Musa, Yoshua kawasomela Waisiraeli wose iwetingane hamwe, iwapinga, iwana na iwagheni iwakalile nawo.