1 Lekeni Waisiraeli tsawatenda nzambi mna ipfinu ipfighomighwe ukusolighwa, kwaapfila Akani, mwana wa Karimi, na iyali mtsukukulu wa Zabidi, iyolawila mlukolo lwa Zera mna likabila lya Yuda tsakasola pfinu mna ipfinu ipfilapfighwe pfiwe pfa IMNDEWA. Apfo IMNDEWA kawaghudubukila iwanu wa Isiraeli.

2 Kuya Yoshua kawatuma iwanu kulawa Yeriko wagheluke waghende kuna ghumji ghwa Ai, ighuli habehi na Beti Aveni, mashariki mwa Beteli, kawalongela, "Mghende na mkaghupelembe ghumji aghwo." Apfo iwanu waghenda na waghupelemba ghumji aghwo. 3 Hawoyile kwa Yoshua, walonga, "Waleke kughenda iwanu wose kughutowa ghumji ghwa Ai. Leka kuwadununza iwanu wose kwaapfila iwanu iwokala amwo wachidogho, lelo watume wanu elufu mbili au elufu ndatu." 4 Apfo wanu elufu ndatu waghenda kwitowa na iwanu wa Ai, lekeni iwanu wa Ai wawawinga. 5 Iwanu wa Ai wawakoma Waisiraeli salasini na sita, na wawawinga walawe mna lilango lya ghumji, mbaka Shebarimu, wawakomela mna ghumhulumko. Waisiraeli waghwa chighudemo, na imimoyo yawo itenyuka ghendo. 6 Kuya Yoshua kadegha ghamaghwanda ghake, keghwisa hasi hambele ha lisanduku lya IMNDEWA, kakala baho mbaka nemihe, yeye na iwakulu wa Waisiraeli nawo watenda pfipfo, wose wemwaghila litimbwisi mna ghamatwi ghawo. 7 Yoshua kalonga, "Ghwe IMNDEWA Imulungu, hebali uwaghalile iwanu awano waloke ghumto ghwa Yoridani kuya utwike mna ghamoko gha Waamori watukome? Ng'apfu tung'akalile kumwambu mwa ghumto Yoridani! 8 Ghwe IMNDEWA, lelo nonge choni, Waisiraeli sambi wawingighwa na awala iwowehila! 9 Wakanani na iwanu wose wa isi aino hawatsohulika achino ichilawile, watsotutsila na kuleghusa litaghwa lyetu muisi lihupe. Lelo litaghwa lyako kulu utsolitendatse?"

10 IMNDEWA kamlongela Yoshua, "Winuke! Heule wighwisile hasi apfino? 11 Waisiraeli watenda nzambi, ng'awakindile baye lilaghano lyangu lyaniwalaghitse walikinde, wasola pfinu mna ipfinu ipfighomighwe ukusolighwa, wapfiba na waghutsuka, wapfipfisa na wapfihanganya hamwe na ipfinu pfawo. 12 Apfo Waisiraeli ng'awodaha baye kwitowa na iwanu awala iwowehila, wohunduka na kutsuma kwaapfila wawo wenyegho wahighighwa wakomighwe. Nene sitsokala namwe keli baye mbaka mchihinye ichinu achila chaniwaghomile mleke kuchisola. 13 Lelo winuke! Uwatende iwanu wele, uwalongele wetende wele iwenyegho, na wakale ghoya kwa ilupfi, kwaapfila IMNDEWA, Imulungu wawo, Imulungu wa Isiraeli kolonga, ‘Mna ipfinu pfenu mna pfinu ipfighomighwe ukusolighwa. Apfo ng'amdaha ghendo baye ukuwatowa iwanu iwowehila mbaka mpfilapfe. 14 Nemitondo wose mtsakutsa hambele hangu kabila kwa kabila, likabila ilisaghulighwa na IMNDEWA litsoseghela hambele, mtsakutsa lukolo kwa lukolo, na ilukolo ilutsosaghulighwa na IMNDEWA lutsoseghela hambele kaye imweimwe, na ikaye itsosaghulighwa na IMNDEWA iseghele hambele munu yumwe yumwe. 15 Imunu ayula iyoghoghighwa na ipfinu ipfighomighwe ukusolighwa, ayo yalakatsighwe mbaka yafe, na ipfinu pfake pfose pfayali napfo, kwaapfila ng'alikindile baye lilaghano lya IMNDEWA, na katenda chinu ichighuma chinyala mna iwanu wa Isiraeli.’ "

16 Nemitondotondo Yoshua kalamka, kawaghala Waisiraeli hambele kabila kwa kabila, na likabila lya Yuda lighoghighwa. 17 Katsighala kolo tsa Yuda hambele lukolo kwa lukolo, na ilukolo lwa Wazera lughoghighwa. Kuya katsighala tsikaye tsa Wazera hambele, kaye kwa kaye, na ikaye ya Zabudi ighoghighwa. 18 Kuya Yoshua kaiseghetsa hambele ikaye ya Zabudi munu yumwe yumwe, na Akani imwana wa Karimi, imwana wa Zabudi, imwana wa Zera, wa likabila lya Yuda kaghoghighwa. 19 Yoshua kamlongela Akani, "Mwanangu, haulonga ulongese hambele ha IMNDEWA, Imulungu wa Isiraeli, umtunye kuya unongele aghala ghautendile, uleke kunipfisa." 20 Akani kamwidika, "Nolongesa ghendo, nene nimtendela nzambi IMNDEWA, Imulungu wa Isiraeli, na achino chicho chanendile: 21 Hambonile ghwanda linoghile ililawile Babeli, na pfihande miya mbili pfa fetsa, na mche ghwa nzahabu utito wake pfihande hamsini, nipfisulukila na kupfisola, nipfihimbila na kupfipfisa hasi mna ichibumbulika changu, na ifetsa ya hasi ghendo ha ipfinu apfo." 22 Apfo Yoshua katuma wanu, nawo watsuma mbaka kuna ichimbumbulika cha Akani, na wapfona ipfinu apfo pfipfisighwa mna ichibumbulika chake, na ifetsa ikala hasi ghendo. 23 Wapfisola ipfinu apfo wamghalila Yoshua, na iwanu wose wa Isiraeli nawo wapfika hasi hambele ha IMNDEWA. 24 Kuya Yoshua, na Waisiraeli wose wamsola Akani mwana Zera, ifetsa aila, lighwanda alila ililawile Babeli, inzahabu aila, iwanaghe wose wamale na wapinga, wang'ombe wake, wang'olo wake, pfihongwe wake, ichibumbulika chake, na ipfinu pfake pfose pfayakalile napfo, wawaghala kuna lwanda lwa Akori. 25 Yoshua kalonga, "Ule ghweghwe utughalile maghayo aghano ghose? IMNDEWA katsokughalila maghayo na ghweghwe leloli aino." Na iwanu wose wamtowa na ghamabwe Akani mbaka kafa. Pfipfila wawatowa iwanu wake wose mbaka wafa na wawalakatsa kwa moto. 26 Kuya walunditsa mabwe mchanya mwake, na lilundo alyo lya ghamabwe lyabaho mbaka leloli aino. Baho ukughudubuka kwa IMNDEWA kuhola, na ihanu aho mbaka leloli aino hokemighwa Lwanda lwa Akori.