1 Isi yawagholelighwe iwana wa Yosefu kwa kutowa simbi yanzila habehi na ghumto ghwa Yoridani, ubali wa mashariki wa imbwibwi ya Yeriko, ibitila mchiwala mbaka isi ya ipfidunda kupfika Beteli. 2 Kulawa Beteli ghumbaka ghughendelela mbaka Luzu, ghwang'ila mbaka Ataroti Adari kwawakalile Waariki. 3 Kuya ghuhulumkila maghalibi mna isi ya Wayafileti mbaka Beti Horoni ya hasi na Gezeri na ghutsighila mna ibahari ya Mediteraniya. 4 Apfo iwana wa Yosefu, iwali wa kabila lya Manase na Efulemu, weng'ighwa isi ayo iwe yawo.

5 Isi ya iwana wa Efulemu kwa kulola tsikolo tsawo ka pfatsili tsaibakana apfino: ghumbaka ghwao ghwanzila ubali wa mashaliki ghubitila Ataroti Adari mbaka Beti Horoni ya kuchanya, 6 na ghutsighila kuna ibahari ya Mediteraniya. Kwa ubali wa kasikazini ghumbaka ghubita Mikimetati, na ubali wa mashariki ghutsunguluka mbaka Taanati Shilo kuya ghughenda mbaka ubali wa mashariki wa Yanoa. 7 Kuya ghuhulumkila Yanoa mbaka ghupfika kuna ghumji ghwa Ataroti na Naara na kupfika Yeriko, na ghutsighila kuna ghumto ghwa Yoridani. 8 Kulawa Tapua ghumbaka ghughenda magharibi mbaka chikolongo cha Kana na ghutsighila kuna Ibahari ya Mediteraniya. Aino iyo isi yaweng'ighwe kabila lya Waefuraimu kwa kulola tsikolo tsawo ka pfatsili, 9 hamwe na imiji yose na ipfijiji pfawongetsighwe kulawa kuna isi ya likabila lya Manase. 10 Iwanu wa likabila lya Efulemu ng'awawawingile baye Wakanani iwakalile Gezeri, nawo waghendelela kukala na iwanu wa kabila lya Efulemu mbaka leloli aino, na wawananahitsa kuwasang'anila.