1 Isi yaweng'ighwe iwanu wa likabila lya Yuda kwa kutowa simbi kwa kulola tsikolo tsawo pfatsili, yenela kulawa ubali wa kusini mashariki mbaka kuna ghumbaka ghwa Edomu. Na ghutsighila mna inyika ya Sini ubali wa kusini. 2 Ubali wa kusini ghumbaka ghwawo ghwanzila kwaitsighile ibahari ya Munyu. 3 Ghughendelela ubali wa kusini ghupfika mbaka Akirabimu, ghubita mmbalimbali mwa Sini, na kusini mwa Kadeshi Barinea, kuya ghwang'ila Hesironi, mbaka Adari, na ghutsunguluka Karika. 4 Kuya ghubita habehi na Asimoni, na ghuwinza ghumto ghwa Misiri na ghutsighila kuna ibahari ya Mediteraniya. Aghwo ghugho ghumbaka ghwenu ghwa ubali wa kusini. 5 Ghumbaka ghwa ubali wa mashaliki tsa ghukala ibahari ya Munyu mbaka ahala ghumto Yoridani haghukwingila mna ibahari. Na ghumbaka ghwa ubali wa kasikazini tsaghubita kulawa hana imembe ya bahari ya Munyu ahala haghukwingila ghumto Yoridani mna ibahari. 6 Kuya ghumbaka aghwo ghughendelela Beti Hogila, na ghwang'ila kasikazini mwa Beti Araba mbaka kuna libwe lya Bohani imwana wa Rubeni. 7 Pfipfila ghumbaka ghughendelela mbaka kuna ghumji ghwa Debili, ghutsunguluka mbaka kuna ilwanda lwa Akori, na kasikazini na ghughenda Giligali ghwilolesa na ghumwinuko ghwa Adumimu ighuli kusini mwa ghumto, kuya ghughenda mbaka kuna tsimbwibwi tsa Eni Shemeshi na ghutsighila Eni Rogeli. 8 Kuya ghumbaka aghwo ghupfika mna ilwanda lwa Hinomu, ubali wa kusini wa chidunda cha Wayebusi, ighukemighwe ghumji ghwa Yerusalemu, ghughendelela mbaka hana ihanu ha ukutambikila cha chidunda ichili maghalibi mwa lwanda lwa Hinomu na ghupfika kwalutsighila lwanda lwa Refaimu. 9 Kulawa aho hachidanando, ghutsunguluka kuna tsimbwibwi tsa ghamatsi tsa Nefutoa, kuya ghulawila hana imiji ya chidunda cha Efuroni, kuya ghuhundukila Baala, imanyika ka Kiriati Tearimu. 10 Kuya ghutsunguluka ghughenda Baala mbaka kuna chidunda Seili, ghubitila kasikazini mwa chidunda Yearimu, ighumanyika ka Kesaloni, na ghuhulumkila Beti Shemesi na ghubita habehi na Timna. 11 Kuya ghumbaka aghwo ghughendelela ubali wa kasikasini wa Ekironi, na ghutsunguluka kughenda Shikironi, na ghubita habehi na chindunda cha Baala mbaka Yabineeli na ghutsighila mna ibahari ya Mediteraniya. 12 Ghumbaka ghwa ubali wa maghalibi ghukala mna ibahari ya Mediteraniya. Apfi pfifo pfawabakane iwanu wa likabila lya Yuda ka kolo tsawo pfatsili.

13 Kuya Yoshua kamwing'a Kalebu imwana wa Yefune ingwe mna isi ya Yuda, ka IMNDEWA pfayamlaghitse. Keng'ighwa ghumji ghwa Kiriati Ariba, iyakalile sekulu wake Anaki. Ghumji aghwo sambi ghokemighwa Heburoni. 14 Kalebu katsiwinga kolo ndatu tsa Waanaki, natso tsitso atsino: lukolo lwa Sheshai, lukoko lwa Ahimani, na lukolo lwa Talimai, iwali wana wa Anaki. 15 Kulawa Heburoni kawaghendela kuwatowa iwanu iwokala Debiri, ghumwande tsaghukemighwa Kiriati Seferi. 16 Kalebu kalonga, "Munu wowose iyatsoghutowa na kusola ghumji ghwa Seferi, nene nitsomwing'a Akisa, imwanangu pinga yamkwele, yawe mwehe wake." 17 Otinieli, imwana wa Kenazi, ndughu yake Kalebu, kaghusola ghumji aghwo, apfo Kalebu kamwing'a imwanaghe yawe mwehe wake. 18 Mna litsuwa lyawo lya ukwikwela, Akisa kamlongela Otinieli yamlombe Kalebu mghunda. Akisa tsakadina chihongwe, na hayang'ali yohulumka, Kalebu kamghutsa, "Ubama nikwing'e choni?" 19 Akisa kamlongela, "Unighweke, ungaye isi ina tsimbwibwi tsa ghamatsi kwaapfila ako Negebu kwaungayile kuduhu matsi." Apfo kalebu kamwing'a isi ya kuchanya ina tsimbwibwi na pfipfila kamwing'a isi ya kuisi ina tsimbwibwi. 20 Aino iyo isi yaweng'ighwe iwanu wa likabila lya Yuda, ka tsikolo tsawo pfatsili. 21 Imiji ikalile ubali wa kusini ghendo wa isi ya Wayuda kughenda kuna ghumbaka ghwa Edomu mna isi ya Negebu, iyo aino: ghumji ghwa Kabiseeli, ghwa Ederi, ghwa Yaguri, 22 ghwa Kina, ghwa Dimona, ghwa Adada, 23 ghwa Kedeshi, ghwa Hazori, ghwa Itinani, 24 ghwa Zifu, ghwa Telemu, ghwa Bealoti, 25 ghwa Hazori Hadata, ghwa Kerioti Hezironi, pfipfila ighumanyika Hazori, 26 ghwa Amamu, ghwa Shema, ghwa Molada 27 ghwa Hasali Gada, ghwa Heshimoni, ghwa Beti Peleti, 28 ghwa Hasali Shuali, ghwa Beeri Sheba, ghwa Biziotia, 29 ghwa Baala, ghwa Iyimu, ghwa Esemu, 30 ghwa Elitoladi, ghwa Kesili, ghwa Horima, 31 ghwa Sikilagi, ghwa Madimana, ghwa Sanisana, 32 ghwa Lebaoti, ghwa Shilihimu, ghwa Aini, ghwa Rimoni. Imiji yose yaweng'ighwe tsaipfika ishirini na tisa hamwe na pfijiji pfake. 33 Imiji ili mchiwala iyo aino: Eshitaoli, Sola, Ashina, 34 Zanoa, Enganimu, Tapua, Enamu, 35 Yamuti, Adulamu, Soko, Azeka, 36 Shaarimu, Aditaimu, Gedera, Gederotaimu. Imiji yose yaweng'ighwe tsaipfika kumi na mine hamwe na pfijiji pfake. 37 Pfipfila weng'ighwa imiji ya Senani, Hadasha, Migidali Gadi, 38 Dileani, Mizipa, Yokiteeli, 39 Lakishi, Bosikati, Egiloni, 40 Kaboni, Lahimamu, Kitilishi, 41 Gederoti, Beti Dagoni, Naama na Makeda. Imiji yose yaweng'ighwe tsaipfika kumi na sita hamwe na pfijiji pfake. 42 Kuya weng'ighwa imiji ya Libina, Eteri, Ashani, 43 Ifita, Ashina, Nesibu, 44 Keila, Akizibu, Maresha, imiji yose yaweng'iwe tsa tisa, hamwe na pfijiji pfake. 45 Pfipfila weng'ighwa Ekironi hamwe na imiji yake midodo na pfijiji pfake, 46 imiji yose na pfijiji pfose ipfikalile habehi na Ashidodi haghati ha Ekironi na ibahari ya Mediteraniya. 47 Pfipfila weng'ighwa Ashidodi na Gaza hamwe na imiji yawo na pfijiji pfawo pfose, mbaka hana ichikolongo cha Misiri mbaka kumwani kwa ibahari ya Mediteraniya. 48 Na imiji ikalile mna isi ya ipfidunda iyo aino: ghumji ghwa Shamiri, ghwa Yatiri, ghwa Soko, 49 ghwa Dana, ghwa Kiriati Sana ighumanyika ka Debiri, 50 ghwa Anabu, ghwa Eshitemoa, ghwa Animu, 51 ghwa Gosheni, ghwa Holoni, ghwa Gilo. Imiji yose yaweng'ighwe tsaipfika kumi na ghumwe hamwe na pfijiji pfake. 52 Pfipfila tsaweng'ighwa ghumji ghwa Arabu, ghumji ghwa Duma, ghumji ghwa Eshani, 53 ghumji ghwa Yanimu, ghwa Beti Tapua, ghwa Afeka, 54 ghwa Humta, ghwa Kiriati Ariba, ighumanyika ka Heburoni, ghwa Siori. Imiji yose yaweng'ighwe tsaipfika tisa, hamwe na pfijiji pfake. 55 Iwanu wa likabila lya Yuda pfipfila tsaweng'ighwa ghumji ghwa Maoni, ghwa Karimeli, ghwa Zifu, ghwa Yuta, 56 ghwa Yezireeli, ghwa Yokideamu, ghwa Zanoa, 57 ghwa Kaini, ghwa Gibea, ghwa Timna. Imiji yose yaweng'ighwe tsaipfika kumi, hamwe na pfijiji pfake. 58 Pfipfila tsaweng'ighwa ghumji ghwa Halihuli, ghwa Betisuri, ghwa Gedori, 59 ghwa Maarati, ghwa Beti Anoti, Elitekoni. Imiji yose yaweng'ighwe tsa sita, hamwe na pfijiji pfake. 60 Pfipfila tsaweng'ighwa ghumji ghwa Kiriati Baali, pfipfila ghwokemighwa Kiriati Yearimu, na ghwa Raba. Imiji yose yaweng'ighwe tsa mili hamwe na pfijiji pfake. 61 Na imiji ya kunyika yaweng'ighwe iyo aino: ghumji ghwa Beti Araba, ghwa Midini, ghwa Sekaka, 62 ghwa Nibishani, ghumji ghwa Munyu na Engedi. Imiji yose yaweng'ighwe tsa sita, hamwe na pfijiji pfake. 63 Lekeni iwanu wa likabila lya Yuda ng'awadahile baye kuwawinga Wayebusi iwakalile Yerusalemu, na mbaka leloli Wayebusi wang'ali wokala hamwe na Wayuda ako Yerusalemu.