1 Apfo Yoshua kawekama hamwe iwanu wa likabila lya Rubeni, na lya Gadi na nusu ya likabila lya Manase, 2 kawalongela, "Mwemwe mghawinza aghala ghose Musa imtumighwa wa IMNDEWA, ghayawalaghitse na mghakinda ghose ghaniwalaghitse. 3 Wala ng'amuwalekile waliyeka baye ndughu tsenu kwa matsuwa agho ghose mbaka leloli aino, lekeni mghawinza ghamalaghitso ghayawalongele IMNDEWA, Imulungu wenu. 4 Sambi IMNDEWA Imulungu wenu kawatenda ndughu tsenu wabwihile, ka pfayawalongele, lelo muye mkaye mwenu mna isi iyaweng'ile Musa imtumwa wa Imulungu, ili kumwambu mwa ghumto Yoridani. 5 Mwalangitse kughakinda malaghitso ghayawalongele Musa imtumwa wa IMNDEWA, mumkunde IMNDEWA Imulungu wenu, mtende ghayobama yeye, mkinde malaghitso ghake na mwikinde naye, na mumsang'anile yeye kwa ghumoyo ghwenu ghwose na kwa ghumuhe ghwenu ghwose." 6 Kuya Yoshua kawabaliki na kawaleka woke mmakaye mwawo. 7 Musa tsakaweng'a nusu ya likabila lya Manase isi yawo ako Bashani. Naye Yoshua tsakaweng'a inusu ingi ya likabila lilyo iwe isi yawo ubali wa maghalibi wa ghumto Yoridani. Kuya Yoshua kawabaliki na kawaleka woke. 8 Kawalongela, "Mwemwe mwakuya mna tsikaye tsenu aku mna mali nyingi, mna ng'ombe wengi na fetsa, nzahabu, shaba, chuma na maghwanda mengi ghanoghile. Apfo muwagholele wayenu aghala ghambokile kulawa kwa awala iwowehila."

9 Apfo iwanu wa kabila lya Rubeni, na Wagadi na inusu ya iwanu wa Manase wawaleka Waisiraeli wayawo ako Shilo mna isi ya Kanaani, na woya ukaye yawo mna isi ya Gileadi, isi iweng'ighwe iwe yawo ka IMNDEWA pfayamlaghitse Musa. 10 Hawapfikile mna ghumji ghwa Geliloti ighuli habehi na ghumto Yoridani mna isi ya Kanaani, iwanu wa kabila lya Rubeni na Gadi na inusu ya kabila lya Manase watsenga matsabahu ng'ulu habehi na ghumto aghwo. 11 Apfo Waisiraeli wamwenga tsawahulika ka ghamakabila gha Rubeni na Gadi na inusu ya likabila lya Manase watsenga matsabahu ng'ulu habehi na ghumto Yoridani mna isi ya Kanaani, isi ya wana wa Isiraeli. 12 Waisiraeli hawahulike apfo, wose wetingana hamwe ako Shilo, waghende weketowe na ghamakabila aghwo. 13 Apfo iwanu wa Isiraeli wamtuma Finehasi, imwanaghe Eliazari, iyakalile mtambika mkulu yaghende Gileadi kwa kabila lya Rubeni, na lya Gadi, na inusu ya likabila lya Manase. 14 Pfipfila wawatuma wakulu kumi welongotse naye, chila mkulu kulawa mna chila likabila lya Isiraeli, na chila yumwe yang'ali yolongotsa lukolo mna iwanu wa Isiraeli. 15 Nawo wawaghendela iwanu wa kabila lya Rubeni, Gadi na nusu ya likabila lya Manase ako Gileadi, wawalongela apfino, 16 "Iwanu wose wa IMNDEWA woghutsa apfino, ‘Ule mumtendela Imulungu wa Isiraeli chinu achino chihile? Ule mleka kumuwinza IMNDEWA kwa kutsenga matsabahu aino? 17 Apfi aghala ghehile ghatutendile akula Peori si chidogho baye? Mbaka leloli aino ng'ana twele baye kulawa mna ighehile agho, nagho ghodununza ghumtingano ghwa IMNDEWA. 18 Ule lelo mleka kumuwinza IMNDEWA? Mng'amlema IMNDEWA leloli, ilupfi katsowaghudubukila iwanu wose wa Isiraeli. 19 Lelo ka isi yenu iha, mloke na mwingile mna isi ya IMNDEWA, kwalili Lihema lienzeluke, tukale wose mna isi yetu. Lekeni mleke kumlema Imulungu wala kutulema twetwe, kwa kwitsengela matsabahu ingi, ili si ya IMNDEWA baye, Imulungu wetu. 20 Apfi Akani mwana wa Zera hayatendile ghehile mna ipfinu ipfilapfighwe kwa Imulungu, imaya ng'ambe iwaghwila iwanu wose wa Isiraeli? Akani ng'afile yaliyeka baye kwa inzambi yake.’ " 21 Kuya iwanu wa likabila lya Rubeni, Gadi, na inusu ya likabila lya Manase wawedika iwakulu wa ghamakabila gha Isiraeli, 22 "Imulungu wa milungu yuyo IMNDEWA iyali mkulu! Imulungu wa milungu yuyo IMNDEWA iyali mkulu. Yeye komanya ule tutenda apfo. Na Waisiraeli wose womanya pfipfo. Ka tsa tutotsa au tsa tuleka kumtegheletsa Imulungu, mleke kutuleka waghima. 23 Ka tuleka kumuwinza IMNDEWA na kwitsengela wenyegho matsabahu, ili tulapfe nambiko tsa wanyama, na tsa mapfuno, mleke IMNDEWA yatuhighe. 24 Mbe! Tutenda apfo kwa kupfuka kwaapfila watsukulu wenu watsowalongela watsukulu wetu, ‘Mwemwe mna choni na Imulungu wa Isiraeli? 25 Ng'amkona baye ka IMNDEWA wa Isiraeli keka ghumto Yoridani ghuwe mbaka kuna twetwe na iwanu wa kabila lya Rubeni na Gadi. Mwemwe ng'amwing'ighwe baye isi yoyose na Imulungu.’ Apfo wanenu watsowatenda wanetu waleke kumpfuka IMNDEWA. 26 Tutsenga imatsabahu ayo si kwa kutambikila baye wala kulapfila nambiko, 27 lekeni chiwe chitango kwa iwanu wetu na iwanu wenu na watsukulu wetu ili tumsang'anile IMNDEWA kubitila nambiko tsetu tsa ukulakatsighwa, nambiko tsa ipfijo na nambiko tsa ukukala tseghamba, ili wanenu waleke kuwalongela wanetu ka wahela chochose kwa IMNDEWA. 28 Na tulonga, ‘Ka achino ching'atulawila twetwe au watsukulu wetu, tutsakwidika apfino, mlole wabala wetu watsenga matsabahu si kulapfa nambiko tsa ukulakatsighwa wala nambiko tsingi, lekeni chiwe chitango kwa iwanu wetu na iwanu wenu.’ 29 Twetwe ng'atubama baye kumlema IMNDEWA na kuleka kumuwinza yeye leloli aino na kutsenga matsabahu ya kulapfila nambiko tsa kulakatsila wanyama, tsa usaghe au nambiko. Nang'atubama baye kulapfila hanu hangi ila hana imatsabahu ya IMNDEWA wetu ili hambele hake hanu hayokala yeye."

30 Mtambika Finehasi, na pfilongotsi wa iwanu na iwakulu wa kolo tsa Isiraeli, tsawatoghola ahala hawahulike aghala ghawalongile ghamakabila gha Rubeni, Gadi na Manase. 31 Na Finehasi imwana wa mtambika Eleazari kawalongela iwanu wa likabila lya Rubeni Gadi na Manase, "Leloli twomanya ghendo ka IMNDEWA ka hamwe na twetwe wose, kwaapfila ng'amumlemile baye, apfo muwakombola Waisiraeli waleke kuhighighwa na IMNDEWA."

32 Kuya Finehasi mwana wa mtambika Eliazari na pfilongotsi wayaghe wawaleka iwanu wa likabila lya Rubeni na Gadi mna isi ya Gileadi na woya mna isi ya Kanaani kuwalongela imbuli ayo Waisiraeli. 33 Tsawadeng'elela ukuhulika apfo na wamtunya Imulungu na ng'awalongile keli baye imbuli ya ukughenda kwitowa na kuihinya isi yawakalile iwanu wa likabila lya Rubeni na Gadi.

34 Iwanu wa likabila lya Rubeni na Gadi waikema imatsabahu aila "Mkalangama, kwaapfila itsakuwa ukalangama kuna twetwe wose na kuna mwemwe ka IMNDEWA yuyo Imulungu."