1 Matsuwa mengi haghamalile, IMNDEWA kawatenda Waisiraeli wabwihile mna ukwitowa na iwanu iwowehila iwang'ali wowatsunguluka. Matsuwa agho Yoshua tsakalala na miyaka yake ipfosa ghendo. 2 Yoshua kawakema Waisiraeli wose, iwanzehe wawo, pfilolongotsi wawo, iwakulu wawo na iwalamtsi, kawalongela, "Nene sambi nilala ghendo, 3 mwemwe wenyegho mwona aghala ghose IMNDEWA, Imulungu wenu ghayatendile kwa iwanu wose wa tsiisi tsose atsino kuna mwemwe. IMNDEWA Imulungu wenu yuyo iyawatowele. 4 Mkumbuke pfaniwagholele tsiisi atsila ng'ana nitsitowe baye, na atsila tsose tsanitsitowile tsiwe tsa ghamakabila ghenu kulawa ghumto Yoridani ighuli ubali wa mashariki mbaka kuna ibahari ya Meditaraniya ikalile ubali wa magharibi. 5 Yeye IMNDEWA, Imulungu wenu, katsowalapfa aku mwolola na katsowawinga ghendo mleke kuwona keli, namwe mtsosola isi tsawo, ka IMNDEWA, Imulungu pfayelaghane namwe. 6 Apfo mwalangitse na mghatende ghose ighandikighwe mna ichitabu cha ghamalaghitso gha Musa. Mleke kubetsa chinu chochose ichili mumo. 7 Mleke kwihanganya na iwanu wa tsiisi iwasighale mna mwemwe, mleke kukema gha mataghwa gha imilungu yawo na mleke kwilahila ghagho, mleke kuisang'anila wala mleke kwinama muitambikile. 8 Lekeni mumnanahile ghendo IMNDEWA, Imulungu wenu ka pfamlongole kutenda mbaka leloli aino. 9 Kwaapfila IMNDEWA wenu kawawinga iwanu wakulu na wana ingupfu aku mwemwe wenyegho mwolola, mbaka leloli aino kuduhu munu iyodaha kwima yetowe na mwemwe. 10 Munu yumwe iyali mna mwemwe kodaha kuwawinga iwanu elufu imwe, kwaapfila IMNDEWA, Imulungu wenu kowatowela mwemwe, ka pfayalongile. 11 Apfo mwalangitse ghendo kumkunda IMNDEWA, Imulungu wenu. 12 Lekeni mng'amleka Imulungu na kwihanganya na iwanu iwalekighwe waghima wa tsiisi atso, nawo wang'akwela iwana wenu, namwe mng'akwela iwana wawo, 13 mmanye ghendo ka IMNDEWA, Imulungu wenu, ng'atsowawinga keli baye iwanu awano wa tsiisi itsili hambele henu, lekeni wawo watsakuwa mtegho na nyang'o kuna mwemwe. Kuna mwemwe watsakuwa mbalati ya kuwafapula mna imighongo yenu na mihonga ihoma mnange mwenu. Agha ghatsoghendelela kulawila mbaka mwemwe mhupe ghendo mna isi inoghile iyamwing'ileni IMNDEWA, Imulungu."

14 "Matsuwa ghangu gha ukuhupa ghapfika. Mwemwe mwose mwomanya ghendo mna imimoyo yenu na mna tsimuhe tsenu, ka ghose ighanoghile IMNDEWA, Imulungu wenu ghayelaghane na mwemwe ghalawila. Chila chinu chayelaghane na mwemwe chilawila, kuduhu hata chinu chimwe ing'ana chilawile baye. 15 Lekeni ka apfila IMNDEWA, Imulungu wenu, pfayatendile ghose ighanoghile ghayelaghane na mwemwe ghalawile, pfipfila kodaha kuwaghalila ghehile mbaka yawakomeni ghendo kulawa mna isi inoghile iyaweng'ile. 16 Agho ghatsolawila ka mwoleka kulikinda lilaghano lyake IMNDEWA, Imulungu wenu, iyawalaghitse mlikinde, na ka mwoghenda kuisang'anila milungu ingi, na kuitambikila, baho imaya ye IMNDEWA, itsomwakilani mwemwe, na mtsohupa ghendo mna isi iyaweng'ileni."