1 Waisraeli hawaisolile isi yose iwe yawo, wose tsawetingana ako Shilo, walimisa Lihema lya ukwitinganila. 2 Lekeni tsahana makabila saba ng'ana ghabokele baye isi tsawo. 3 Apfo Yoshua kawalongela Waisiraeli, "Angu mtsobeta mbaka tsuwachi kughenda kuisola isi aila IMNDEWA Imulungu, Imulungu wa aba tsenu iyaweng'ileni? 4 Muwasaghule wanu wadatu kulawa chila kabila, niwatume wakaipelembe isi ayo ka ina ukulu wachi, na wanyandikile pfaisogholighwa kwa ghamakabila ghawo, kuya watse wanongele pfaili. 5 Nawo watsoighola isi ayo iwe ingwe saba. Wanu wa Yuda watsokala ubali wawo wa kusini na wanu wa Yosefu watsokala ubali wawo wa kasikazini. 6 Namwe hamtsomalitsa ukwandika tsiingwe atso saba tsa isi ayo pfatsili, mndetele acho chamwandike. Na nene nitsakwasa isimbi iwalamlile hambele ha IMNDEWA Imulungu wetu. 7 Lekeni Walawi ng'awotsopata baye ingwe yoyose aila, kwaapfila wawo weng'ighwa ing'onde ya kumtambikila IMNDEWA Imulungu. Ghamakabila gha Gadi, na Rubeni na inusu ya iwanu wa kabila lya Manase wawo ma wabokela isi yawo ikalile ubali wa Mashariki ya ghumto Yoridani. Tsaweng'ighwa isi ayo na Musa imtumwa wa IMNDEWA Imulungu."

8 Apfo iwanu awo wanza ghumwanza waghenda kuipelemba isi ayo. Kuya Yoshua kawalaghitsa apfi kalonga, "Mghende mkaipelembe isi yose ili pfihi na muyandike, kuya mmbuyile nene, na nene nitsakwasa simbi iwalamlile bahano Shilo hambele ha IMNDEWA Imulungu, chila kabila litsobokela ingwe yachi." 9 Apfo iwanu awo waghenda, wanga isi yose, na wandika mbuli tsa ingwe atsila saba hamwe na imiji yake. Kuya woya kwa Yoshua akula Shilo kuna indalo. 10 Kuya Yoshua kawatowela simbi akula Shilo hambele ha IMNDEWA Imulungu, naye kawagholela Waisiraeli isi ayo, chila kabila libokela ingwe yake.

11 Isimbi ya mwanduso iwaghwila iwanu wa Banjamini kwa kulola tsikolo tsake pfatsili. Isi yaweng'ighwe tsaikala haghatighati ha kabila lya Yuda na Yosefu. 12 Ghumbaka ghwake ighuli ubali wa kasikazini tsaghwanzila ghumto ghwa Yoridani na ghwang'ila ubali wa kasikazini mwa Yeriko na isi ya pfidunda ghughenda maghalibi mbaka mna inyika ya Beti Aveni. 13 Kulawa ako, ghumbaka ghughenda kusini kune ghumji ghwa Luzu, sambi ghokemighwa ghumji ghwa Beteli, mbaka Ataroti Adari kuna ichidunda ichili kusini mwa Beti Horoni ya lwehisi. 14 Ghumbaka ighuli ubali wa maghalibi ghwanzila chidunda ichilola Beti Horoni mna ubali wa kusini, ghumbaka ghuhundukila magharibi mbaka ghupfika kuna ghumji ghwa Kiriati Baali, pfipfila ighukemighwa Kiriati Yearimu, ghumji ghwa iwanu wa kabila lya Yuda. 15 Ubali wa kusini ghumbaka ghwake ghwanzila kwaghutsighile ghumji ghwa Kiriati Yearimu, na ghupfika Efroni na kughenda mbaka kuna imbwibwi ya ghamatsi ya Nefutoa. 16 Kuya ghuhulumka lwehisi kubitila mbalimbali mwa chidunda ichilolesa na ulwanda lwa mwana wa Hinomu, uli kasikazini mwa ulwanda lwa Warefai. Pfipfila ghuhulumka mbaka kuna ulwanda lwa Hinomu, kusini mwa chidunda cha Wayebusi, ghughendelela kuhulumka mbaka ghupfika Eni Rogeli. 17 Kuya ghumbaka ghuhulumka mbaka kasikazini ghughenda mbaka En Shemeshi, ghwang'ila Geliloti ing'ali ilolesa na lughongo lwa Adumimu, kuya ghuhulumka kuna libwe lya Bohani mwana wa Rubeni. 18 Kulawa aho, ghumbaka ghutsunguluka kasikazini mmbalimbali mwa Araba na kutsighila kuko Araba.

19 Kuya ghughendelela ubali wa kasikazini wa chidunda cha Beti Hogila na kutsighila ya kasikazini hanu hasakale ha ibahari ya Munyu, haghukwingilila ghumto Yoridani. Aghuno ghugho ghumbaka ghwa ubali wa kusini. 20 Ubali wa mashariki ghumto Yoridani tsaghukala mbaka ghwake. Aino iyo imibaka ikighwe mna isi tsaweng'ighwe kolo tsa likabila lya Benjamini.

21 Imiji ya tsikolo tsa likabila lya Benjamini iyo aino: ghumji ghwa Yeriko, ghumji ghwa Beti Hogila, ghumji ghwa Emeki Kesisi, 22 ghumji ghwa Beti Araba, ghumji ghwa Zemaraimu, ghumji ghwa Beteli, 23 ghumji ghwa Avimu, ghumji ghwa Para, ghumji ghwa Ofira, 24 ghumji ghwa Kefari Amoni, ghumji ghwa Ofini, na ghumji ghwa Geba. Imiji yose yaweng'ighwe tsaipfika kumi na mili, hamwe na pfijiji pfake pfose. 25 Pfipfila likabila lya Benjamini tsaweng'ighwa ghumji ghwa Gibeoni, ghumji ghwa Rama, ghumji ghwa Beeroti, 26 ghumji ghwa Misipa, ghumji ghwa Kefira, ghumji ghwa Moza, 27 ghumji ghwa Rekemu, ghumji ghwa Iripeeli, ghumji ghwa Tarala, 28 ghumji ghwa Zela, ghumji ghwa Haelefu, na ghumji ghwa Yebusi pfipfila ighukemighwe Yerusalemu, na Gibea na ghumji ghwa Kiriati Yearimu. Imiji yose yaweng'ighwe tsaipfika kumi na mine hamwe na pfijiji pfake. Ayo iyo isi yaweng'ighwe iwanu wa kabila lya Benjamini kwa kulola tsikolo tsawo ka pfitsili.