1 Wafalume wose wa Waamori, iwang'ali wokala kumwambu mwa maghalibi ya ghumto ghwa Yoridani, na wafalume wose wa Wakanaani, iwakalile kumwani mwa ibahari ya Mediteraniya, hawahulike ka IMNDEWA Imulungu kaghanyatsa ghamatsi mbaka Waisiraeli waloka, tsawapfuka na kwingilighwa na wogha kwitowa na Waisiraeli.

2 Matsuwa agho IMNDEWA kamlongela Yoshua, "Usongole mabwe makomu ghawe mimaghe, na uwengitse ngoma Waisiraeli." 3 Apfo Yoshua kasongola ghamabwe agho ghawa mimaghe, na kawengitsa ngoma Waisiraeli ako Gibea Haaraloti. 4 Yoshua kawengitsa ngoma kwaapfila iwamale wose iwalawile Misiri, wana imiyaka ya ukughenda kwitowa, tsawafa mnzila kunyika hawang'ali wolawa Misiri. 5 Iwamale wose iwalawile Misiri tsawengila ngoma, lekeni iwanu wose iwelekighwe mnyika hawali mna ghumwanza kulawa Misiri ng'awengile ngoma baye. 6 Waisiraeli tsawakala mna ghumwanza kwa miyaka alubaini kunyika mbaka iwamale wose iwakalile na miyaka ya ukughenda kung'ondo wafa kwaapfila ng'awamtegheletse baye IMNDEWA. IMNDEWA tsakelaha kuna wawo ka ng'awatsoyona baye isi aila inoghile kwa ukufugha na ukulima iyelahile kwa iwahenga wawo ka katsotwing'a twetwe. 7 Apfo iwana iyawenule IMNDEWA, iwoneke na iwanu awala iwalemile kumtegheletsa IMNDEWA, awo wawo Yoshua iyawengitse ngoma. Tsawang'ali kwingila ngoma kwaapfila ng'awengile ngoma baye hawang'ali mna ghumwanza. 8 Iwamale wose hawamalile kwingila ngoma, wakala mna indalo mbaka wahona. 9 IMNDEWA kamlongela Yoshua, "Leloli aino niwalapfila ichinyala cha Misiri." Apfo hanu aho hakemighwa Giligali mbaka leloli aino. 10 Nemihe ya litsuwa lya kumi na nne, Waisiraeli wadeng'elela ichihungo cha Pasaka ako Giligali mna ichiwala cha Yeriko kwawatsengile tsindalo tsawo. 11 Ilupfi yake, Pasaka haimalile, tsawaja pfighate ipfilihela hamila, na madanu, ipfijo ipfilawile mna isi ayo. 12 Apfo kulawa litsuwa alyo hawajile ipfijo pfa isi ayo, Waisiraeli ng'awapatile keli baye ichijo ichikemighwe mana, lekeni mna ghumwaka aghwo tsawaja ipfijo pfa isi ya Kanaani.

13 Yoshua hayang'ali habehi na Yeriko, baho kwona munu yumwe iyemile hambele hake kakinda limaghe mmoko mwake. Yoshua kamghendela kamghutsa, "Pfii ghweghwe kwa miyetu, au kwa yumwe wa awala iwotuhila?" 14 Naye kamwidika, "Aka, nene sili miyenu baye, wala sili yumwe baye wa awala iwowahila, ila nene na mkulu wa lijeshi lya IMNDEWA." Kuya Yoshua kenama ichihanga chake hasi, kamtamanila, na kamghutsa, "Angu IMNDEWA yana mbuli yachi kuna nene imtumighwa wake?" 15 Imkulu ayo wa lijeshi lya IMNDEWA kamlongela, "Tsula imikwabatsa yako, kwaapfila hanu hawimile haenzeluka." Na Yoshua katenda pfipfo.