1 Kuya IMNDEWA kamlongela Yoshua, 2 "Walongele Waisiraeli wabaghule imiji ya ukutsumila wanu, ka pfanimlaghitse Musa yakulongele, 3 ili munu yang'amkoma miyaghe aku ng'abamile kumkoma baye, yadahe kutsumila kuko, na kumhepa imunu ayula iyobama kumkoma imunu iyamkomile ndughu yake. 4 Naye katsotsumila mna ghumji ghumwe ghwa imiji ayo, na yeme hana lilango lya ghumji na yawalongele iwakulu wa ghumji aghwo achila chayatendile, nawo womwingitsa mghati na womwing'a hanu ha ukukala nawo. 5 Ka imunu ayula iyobama kumkoma imunu iyamkomile miyaghe komuwinza mbaka kuna ghumji, iwakulu wa ghumji waleke kumlapfa imunu iyakomile, kwaapfila kamkoma miyaghe aku ng'abamile kumkoma baye kwaapfila tsang'amwihile baye. 6 Imunu iyakomile miyaghe katsokala mna ghumji aghwo mbaka hayatsakwima yahighighwe hambele ha ghumtingano ghwa iwalamtsi wa Isiraeli na pfipfila katsokala mbaka imtambika mkulu wa ghamatsuwa agho yafe. Kuya yoye kuna isi yake iyalawile."

7 Apfo wabaghula ghumji ghwa Kadeshi ighuli Galilaya kuna ichidunda cha Nafutali na ghumji ghwa Shekemu, ighuli mna ipfidunda pfa Efuraimu, na ghumji ghwa Kiriati Ariba, pfipfila ighumanyika ka Heburoni mna isi ya pfidunda ya Yuda. 8 Kumwambu mwa ghumto Yoridani, mashariki mwa ghumji ghwa Yeriko, wabaghula ghumji ghwa Bezeli ighuli mna inyika ya chiwala ya likabila lya Rubeni. Pfipfila wabaghula ghumji ghwa Ramoti ako Gileadi, nagho pfipfila tsa ghumji ghwa likabila lya Wagadi na wabaghula ghumji ghwa Golani ako Bashani mna isi ya likabila lya Manase. 9 Munu wowose wa Isiraeli au imgheni iyokala nawo, yang'amkoma munu aku ng'abamile kumkoma baye, kodaha kutsumila kuna imiji ayo ibaghulighwe, ili yaleke kukomighwa na imunu ayula iyobama kumkoma imunu ayula iyamkomile miyaghe.