1 Atsi tsitso isi tsaweng'ighwe Waisiraeli tsiwe tsawo mna isi yose ya Kanaani. Imtambika Eleazari na Yoshua mwanaghe Nuni, na wakulu wa kolo tsa ghamakabila gha Waisiraeli, wawagholela Waisiraeli. 2 Isi ayo tsawagholighwa kwa kwasa simbi mchanya tsilamle ka apfila IMNDEWA pfayamlaghitse Musa yaweng'e ghamakabila aghala tisa na nusu. 3 Musa tsakagheng'a ghamakabila aghala meli na nusu isi yawo ikalile kumwambu kwa ghumto ghwa Yoridani, lekeni Musa ng'aweng'ile baye Walawi hanu hohose hawe hawo mna isi ayo. 4 Yosefu tsakana wana weli, Manase na Efulemu, apfo tsaghalawila makabila meli. Lekeni Walawi ng'aweng'ighwe baye isi ayo, lekeni weng'ighwa imiji ya ukukala na mighunda ya ukudimila wanyama wawo. 5 Apfo Waisiraeli waighola isi ayo ka apfila IMNDEWA pfayamlaghitse Musa.

6 Litsuwa limwe iwanu iwolawa mna ilukulo lwa Yuda wamghendela Yoshua ako Giligali, na Kalebu mwana wa Yefune iyakalile Mkenisiti, kamlongela Yoshua, "Ghweghwe kwomanya imbuli aila IMNDEWA iyamlongele Musa, imunu wa Imulungu, imbuli inonga nene na ikulonga ghweghwe hatukalile akula Kadeshi Barineya. 7 Tsanina miyaka alubaini ahala Musa imtumighwa wa IMNDEWA hayanitumile kulawa Kadeshi Barinea ng'ende nikaipelembe isi ayo. Hambuyile, nimlongela aghala ghose ghambonile ka ghumoyo ghwangu pfaghutoghole. 8 Lekeni wayangu wangeluke nawo wawatenda iwanu wapfuke, ila nene tsanimtegheletsa IMNDEWA, iyali Mulungu wangu. 9 Naye Musa kanilahila nene mna litsuwa alyo, kalonga, ‘Isi yawang'ile kwa maghulu ghako itsakuwa yako na watsukulu wako matsuwa ghose ghawatsokala, kwaapfila ghweghwe kumuwinza IMNDEWA, Imulungu wako kwa ghumoyo ghwako ghwose.’ 10 Lekeni lelo ulole, sambi miyaka alubaini na tano kulawa IMNDEWA hayalongile na Musa, mna ghamatsuwa aghala Waisiraeli hawang'ali wopfosa mnyika. Kulawa matsuwa agho IMNDEWA kanyika mghima na sambi nina miyaka samanini na tano. 11 Leloli aino ning'ali nina ngupfu ka ghamatsuwa aghala Musa hayanitumile. Na hata sambi nina ngupfu ya kughenda kwitowa na kusang'ana ng'onde yoyose aila. 12 Lelo ungaye isi aino ya ipfidunda IMNDEWA iyalongile na nene mna litsuwa alyo. Gweghwe ghumwenyegho kuhulika ka Waanaki tsawakala mna isi ayo ng'ulu ina imibanda, songaha IMNDEWA katsonyapfila, na nene nitsowawinga ka yeye pfayalongile." 13 Yoshua kambaliki Kalebu mwana wa Yefune na kamwing'a ghumji ghwa Heburoni ghuwe ghwake. 14 Apfo ghumji ghwa Heburoni ghuwa ghwa watsukulu wa Kalebu, mwana wa Yefune, imunu wa Kenizi mbaka leloli aino, kwaapfila yeye tsakamtegheletsa IMNDEWA, Imulungu wa Isiraeli kwa ghumoyo ghwake ghwose. 15 Ghumwande ghumji ghwa Heburoni ghung'ali ghukemighwa Kiriati Ariba. Ariba tsakamanyika sideke kwa iwanu wa Anaki. Na isi yose tsaikala bila ukwitowa.