1 Yoshua hayalalile, na miyaka yake kupfosa, IMNDEWA Imulungu kamlongela, "Ghweghwe kulala, na kuna isi ng'ulu ng'ana tsisolighwe baye. 2 Natso tsitso atsino: isi yose ya Wafilisti na isi yose ya Wageshuri. 3 Kulawa ghumto ghwa Shihori ibakana na Misiri mbaka Ekironi yose ili ubali wa kusini, isi ayo tsaimanyika ya Wakanaani. Isi tsose tsa wafalume watano wa Ufilisiti tsitso atsino: Gaza, Ashidodi, Ashikeloni, Gati na Ekironi mbaka isi ya Avi. 4 Ubali wa kusini, isi tsose tsa Wakanani kulawa Ara ya Wasidoni mbaka Afeka kuna ghumbaka ghwa Waamori. 5 Pfipfila na isi ya Gebali na ubali wa mashariki wa Lebanoni yose, kulawa Baali Gadi hasi ha chidunda cha Herimoni mbaka Lebo Hamati. 6 Na iwanu wose iwokala mna ipfidunda kulawa Lebanoni mbaka Misirefoti Maimu, isi yawokala Wasidoni wose. Waisiraeli pfawoghendelela kuseghela hambele mna tsiisi atso, nene mwenyegho nitsowawinga hambele ha Waisiraeli wose. Lekeni ghweghwe uwagholele Waisiraeli isi ayo iwe yawo, ka pfanikulaghitse. 7 Pfipfila ughagholele ghamakabila ghangi tisa na inusu ya likabila lya Manase, nawo wahale isi ayo."

8 Likabila lya Rubeni na Gadi na inusu imwe ya likabila lya Manase wawo wabokela isi iyaweng'ile Musa imtumighwa wa IMNDEWA, ili ubali wa mashariki mwa ghumto Yoridani. 9 Isi ayo yanzila kuna ghumji ghwa Aroeli mmbalimbali mwa ilwanda lwa Arinoni, na ghumji aghula ighuli mlwanda, na isi aila yose ya chiwala iyanzile kuna ghumji ghwa Madeba mbaka Diboni, 10 na imiji yose ya mfalume Sihoni wa Waamori, iyalongotse ako Heshiboni mbaka kwawebakane na Waamoni. 11 Hamwe na isi ya Gileadi, na isi ya Wageshuri na Wamaakati, na chidunda cha Herimoni na isi yose ya Bashani mbaka isi ya Saleka. 12 Na isi yose iyalongotse mfalume Ogi, yumwe wa Warefai iyakalile mghima, iyailongotse Ashitaroti na Edirei mna isi ya Bashani. Musa tsakawatowa na kasola isi tsawo. 13 Hata apfo Waisiraeli ng'awawawingile baye iwanu wa Geshuri na Wamaaka, ila waghendelela kukala na Waisiraeli mbaka leloli aino. 14 Musa ng'aweng'ile baye iwanu wa likabila la Lawi isi yoyose iwe yawo, ila wawo tsawamlapfila nambiko tsa ukulakatsighwa IMNDEWA Imulungu wa Isiraeli, atso tsitso tsiisi tsaweng'ighwe, ka IMNDEWA pfayawalongele.

15 Atsino tsitso tsiisi Musa tsayaweng'ile iwanu wa likabila lya Rubeni, kwa kulola tsikolo tsawo pfatsili: 16 tsawebakana kulawa ghumji ghwa Aroeli mmbalimbali mwa ilwanda lwa Arinoni na ghumji ighukalile mna ilwanda alwo, na isi yose ya ichiwala cha Madeba, 17 mbaka Heshiboni na imiji yake yose ikalile mna ichiwala, ghumji ghwa Diboni, ghumji ghwa Bamoti Baali, ghumji ghwa Betibaali Meoni, 18 ghumji ghwa Jahasa, ghumji ghwa Kedemoti na Mefaati, 19 ghumji ghwa Kiriatimu, ghumji ghwa Sibima, ghumji ghwa Seleti Shahari ighuli mna ichidunda ichili mna ilwanda alwo, 20 Beti Peori, na mihulumko ya ichidunda cha Pisiga, Beti Yeshimoti, 21 na imiji yose aila ya ichiwala, na isi yose ya mfalume Sihoni wa Waamori iyalongotse ako Heshiboni. Musa tsakamtowa mfalume ayuno Sihoni na wafalume wose wa isi ya Midiani, isi ya Evi, isi ya Rekemu, isi ya Suri, isi ya Huri na isi ya Reba iwamlongotsele isi atso mfalume Sihoni. 22 Baalamu, imwana wa Beori iyakalile mghanga, yumwe iyakomighwe na Waisiraeli. 23 Na ghumbaka ghwa isi ya likabila lya Rubeni tsa ubali wa maghalibi wa ghumto ghwa Yoridani. Imiji aino hamwe na pfijiji pfake iyo yaweng'ighwe iwana wa Rubeni.

24 Atsino tsitso tsiisi Musa tsayaweng'ile iwanu wa likabila lya Gadi, kwa kulola tsikolo tsawo pfatsili.

25 Isi yao tsaibakana na isi ya Yazeri na imiji yose ya Gileadi na inusu ya isi ya Waamoni mbaka Aroeli ikalile Raba ubali wa mashariki, 26 na kulawa kuna ghumji ghwa Heshiboni mbaka kuna ghumji ghwa Ramati Mizipa, na kuna ghumji ghwa Betonimu, na kulawa kuna ghumji ghwa Mahanaimu mbaka kuna ghumbaka ghwa ghumji ghwa Debiri. 27 Pfipfila mna imiji ikalile mna ulwanda lwa ghumji ghwa Beti Haramu, ghumji ghwa Beti Nimra, ghumji ghwa Sukoti na ghumji ghwa Zafoni na isi yose ikalile ya mfalume Sihoni wa Heshiboni. Ghumbaka ghwao ghwa ubali wa maghalibi ghughendelela kuna litsimbu lya Galilaya, mbaka kuna ghumto ghwa Yoridani na kwibakana na ubali wa kusini wa bahari ya Kinereti. 28 Aino iyo imiji na ipfijiji pfaweng'ighwe iwanu wa likabila lya Gadi kwa kulola tsikolo tsawo pfatsili.

29 Kuya Musa tsakaweng'a inusu ya likabila lya iwanu wa Manase isi iwe yawo, tsaweng'ighwa kwa kulola tsikolo tsawo pfatsili. 30 Isi yawo yanzila kuna ghumji ghwa Mahanaimu ipfika mbaka mna isi iyailongotse mfalume Ogu ikalile mna isi ya Bashani, hamwe na imiji sitini ya Yairi. 31 Na inusu ya isi ya Gileadi, Ashitaroti, Edirei, imiji iyang'ali yoilongotsa mfalume Ogu wa Bashani. Isi aino tsaweng'ighwa nusu ya iwana wa Makiri iyali mwana wa Manase kwa kulola tsikolo tsawo pfatsili. 32 Musa kaweng'a tsiisi atso itsikalile ubali wa mashariki ya Yeriko kumwambu mwa ghumto Yoridani tsiwe tsawo, hayang'ali kamna ichiwala cha Moabu. 33 Lekeni likabila lya Lawi Musa ng'aweng'ile baye isi yoyose aila, kwaapfila IMNDEWA Imulungu kawalongela wawo watsopata ipfinu apfila ipfilapfighwa na iwanu kwa IMNDEWA Imulungu wa Isiraeli.