1 Ako Shilo mna isi ya Kanaani, iwakulu wa kolo tsa Walawi waghenda kwa Eleazari, imtambika mkulu na kwa Yoshua, mwana wa Nuni na waghenda kwa iwakulu wa kolo tsa ghamakabila gha Isiraeli, 2 wawalongela, "IMNDEWA tsakalaghitsa kubitila Musa twing'ighwe isi ya ukukala, na mighunda ya ukudimila wanyama wetu." 3 Apfo, Waisiraeli waweng'a Walawi imiji aino hamwe na imighunda ya ukudimila wanyama wawo, ka IMNDEWA pfayalaghitse. 4 Tsawasa tsisimbi tsilamle, na isimbi ya kwanza iwaghwila iwanu wa lukolo lwa Kohati. Walawi iwali watsukulu wa Aruni imtambika, wawo tsaweng'ighwa miji kumi na midatu kulawa mna isi yaweng'ighwe likabila lya Yuda na mna isi ya likabila lya Simioni na mna isi ya likabila lya Benjamini. 5 Lwakeli, isimbi iwaghwila Walawi wangi wa lukolo lwa Wakohati. Wawo tsaweng'ighwa miji kumi kulawa mna isi tsaweng'ighwe iwanu wa likabila lya Efuraimu, na lya Dani na nusu ya likabila lya Manase. 6 Lwakadatu, isimbi iwaghwila Walawi wa lukolo lwa Gerishoni, wawo tsaweng'ighwa miji kumi na midatu kulawa mna tsiisi tsaweng'ighwe likabila lya Isakari na Asheri na Nafutali na nusu ya isi ya likabila lya Manase ako Bashani. 7 Iwanu wa lukolo lwa Merali tsaweng'ighwa miji kumi na mili mna isi yaweng'ighwe kabila lya Rubeni, kabila lya Gadi na kabila lya Zabuloni. 8 Waisiraeli tsawaweng'a Walawi imiji aino hamwe na mighunda ya ukudimila iwanyama wawo ka IMNDEWA pfayamlaghitse Musa.

9 Aghano ghagho mataghwa gha imiji ibaghulighwe kulawa mna isi yawokala kabila lya Yuda na Simioni. 10 Wanza kubaghula imiji iwe ya iwanu wa lukolo lwa Kohati iwawile watsukulu wa Aruni, kwaapfila isimbi yanza kuwaghwila wawo. 11 Weng'ighwa Kiriati Ariba ghumji ighumanyika ka Heburoni mna ipfidunda pfa isi ya Yuda hamwe na mighunda ya ukudimila itsinguluke isi yose. Ariba tsa aba wake Anaki. 12 Lekeni imighunda ya imiji ayo na ipfijiji ipfili habehi, tsakeng'ighwa Kalebu mwana wa Yefune pfiwe pfake. 13 Apfo watsukulu wa Aruni, imtambika, weng'ighwa ghumji ghwa Heburoni, ghuwe ghumji ghwa ukutsumila kwa munu wowose iyakomile. Pfipfila weng'ighwa ghumji ghwa Libina hamwe na mighunda yake ya ukudimila. 14 Kuya tsaweng'ighwa ghumji ghwa Yatiri hamwe na imighunda yake ya ukudimila, na ghumji ghwa Eshitemoa hamwe na imighuda yake. 15 Pfipfila tsaweng'ighwa ghumji ghwa Holoni hamwe na imighunda ya ukudimila na ghumji ghwa Debiri hamwe na imighunda yake ya ukudimila. 16 Pfipfila weng'ighwa ghumji ghwa Aini na ghumji ghwa Yuta na ghumji ghwa Beti Shemeshi, chila mji hamwe na imighunda yake ya ukudimila. Imiji yose tsaipfika tisa mna isi yaweng'ighwe ghamakabila agho meli.

17 Mna isi ya likabila lya Benjamini tsaweng'ighwa ghumji ghwa Gibeoni, ghumji ghwa Geba, 18 ghumji ghwa Anatoti na ghumji ghwa Alimoni, imiji ayo yose tsa ina imighunda ya ukudimila, imiji yose yaweng'ighwe tsa mine. 19 Imiji yose yaweng'ighwe watsukulu wa Aruni, iwatambika, tsa kumi na midatu hamwe na mighunda yawo ya ukudimila. 20 Kolo tsikalile tsa Wakohati, nawo pfipfila tsa Walawi, tsaweng'ighwa imiji yawo mna isi ya likabila lya Efuraimu. 21 Tsaweng'ighwa ghumji ghwa Shekemu, nagho ghuwe ghumji ghwa ukutsumila imunu iyakomile, hamwe na imighunda ya ukudimila mna isi ya ipfidunda ya Efuraimu, na ghumji ghwa Gezeri hamwe na imighunda yake ya ukudimila, 22 na weng'ighwa ghumji ghwa Kibizaimu na ghumji ghwa Beti Holoni, hamwe na mighunda yawo ya ukudimila, imiji yose yaweng'ighwe tsa mine. 23 Pfipfila kulawa mna isi ya likabila lya Dani tsaweng'ighwa ghumji ghwa Eliteke na ghumji ghwa Gibetoni, hamwe na imighunda yawo ya ukudimila, 24 ghumji ghwa Aiyaloni na ghumji ghwa Gati Rimoni, hamwe na mighunda yawo ya ukudimila, miji yose yaweng'ighwe tsa mine. 25 Inusu ya likabila lya Manase tsaweng'ighwa ghumji ghwa Taanaki na ghumji ghwa Gati Rimoni hamwe na imighunda yawo ya ukudimila. Imiji yose yaweng'ighwe tsa mili. 26 Imiji yose yaweng'ighwe tsikolo tsikalile tsa Wakohati tsaipfika kumi hamwe na imighunda yawo ya ukudimila.

27 Walawi wamwenga, wa ilukolo lwa Gerishoni wawo tsaweng'ighwa miji mili kulawa mna inusu ya likabila lya Manase. Ghumji ghumwe tsa Golani ighuli Bashani, ghumji ghwa ukutsumila imunu iyakomile, na ghumji ghungi tsa Beeshi Tera hamwe na mighunda yawo ya ukudimila. 28 Kulawa mna isi ya likabila lya Isakari, weng'ighwa ghumji ghwa Kishioni na ghumji ghwa Daberati hamwe na imighunda yawo ya ukudimila, 29 kuya weng'ighwa ghumji ghwa Yarimuti na Eni Ganimu hamwe na mighunda yawo ya ukudimila. Imiji yose yaweng'ighwe tsa mine. 30 Kulawa mna isi ya kabila lya Asheri, tsaweng'ighwa ghumji ghwa Mishali na ghumji ghwa Abidoni hamwe na mighunda yawo ya ukudimila, 31 kuya weng'ighwa ghumji ghwa Helikati hamwe na imighunda yake ya ukudimila, na ghumji ghwa Rehobu hamwe na imighunda yake ya ukudimila. Imiji yose yaweng'ighwe tsa mine. 32 Kulawa mna isi ya likabila lya Nafutali tsaweng'ighwa ghumji ghwa Kadeshi ighuli Galilaya, ghumji ghumwe ghwa ukutsumila, hamwe na imighunda yake ya ukudimila, na ghumji ghwa Hamoti Dori hamwe na imighunda yake ya ukudimila, na ghumji ghwa Karitani hamwe na imighunda yake ya ukudimila. Imiji yose yaweng'ighwe tsa midatu. 33 Imiji yose yaweng'ighwe tsikolo tsa Wagerishoni tsaipfika kumi na midatu hamwe na imighunda yake ya ukudimila. 34 Walawi wamwenga iwasighale, awala wa ilukolo lwa Merari, tsaweng'ighwa miji mna isi ya Zabuloni. Ghumji ghwa Yokineamu hamwe na mighunda yake ya ukudimila, ghumji ghwa Karita hamwe na mighunda yake ya ukudimila, 35 kuya tsaweng'ighwa ghumji ghwa Dimna hamwe na mighunda yake ya ukudimila, na ghumji ghwa Nahalali hamwe na mighunda yake ya ukudimila. Imiji yose tsa mine. 36 Kulawa mna isi ya likabila lya Rubeni tsaweng'ighwa, ghumji ghwa Bezeri hamwe na mighunda yake ya ukudimila, na ghumji ghwa Yahazi hamwe na mighunda yake ya ukudimila, 37 pfipfila tsaweng'ighwa ghumji ghwa Kedemoti hamwe na mighunda yake ya ukudimila na ghumji ghwa Mefaati hamwe na imighunda yake ya ukudimila. 38 Kulawa mna isi ya likabila lya Gadi tsaweng'ighwa ghumji ghwa Ramoti ighuli Gileadi, ghumji ghwa ukutsumila hamwe na imighunda yake ya ukudimila, na ghumji ghwa Mahanaimu hamwe na mighunda yake ya ukudimila, 39 kuya weng'ighwa ghumji ghwa Heshiboni hamwe na imighunda yake ya ukudimila na ghumji ghwa Yazeri hamwe na imighunda yake ya ukudimila. Imiji yose yaweng'ighwe tsa mine. 40 Imiji yose yaweng'ighwe tsikolo tsa Wamerari, tsikolo itsisighale tsa Walawi, tsa kumi na mili hamwe na imighunda yake ya ukudimila. 41 Imiji yose yaweng'ighwe Walawi kulawa mna isi ya Waisiraeli tsa alubaini na nane hamwe na imighunda yawo ya ukudimila. 42 Imighunda ya ukudimila wanyama tsaitsunguluka mna chila mji ghwa imiji ayo.

43 Apfo IMNDEWA tsakaweng'a Waisiraeli isi yose iyelahile kwa iwahenga wawo ka katsoweng'a. Nawo waisola iwa yawo na wakala mumo. 44 Kuya IMNDEWA kawatenda wakale tseghamba mna chila ubali wa isi ayo, ka apfila pfayelahile kwa iwahenga wawo, kwaapfila IMNDEWA tsakawapfila Waisiraeli wawatowe awala wose iwowehila. 45 Kuduhu chinu chochose chinoghile IMNDEWA chayelaghane na Waisiraeli ing'achilawile baye. Chila chinu chayelaghane nawo tsachilawila.