1 Iwanu wa likabila lya Manase iyakalile mwana chaudele wa Yosefu, pfipfila tsaweng'ighwa isi yawo kwa kutowa simbi, isimbi imghwila Makiri mwana chaudele wa Manase. Ayo Makiri aba wake Gileadi, iyamanyile kwitowa pfinoghile, ma tsakeng'ighwa imiji ya Gileadi na Bashani kwa kutowa simbi, kwaapfila tsakadaha ukwitowa pfinoghile kung'ondo. 2 Iwanu wangi wa kabila lya Manase tsaweng'ighwa isi yawo kwa kutowa simbi kwa kulola tsikolo tsawo pfatsili. Tsikolo atso tsitso atsino: kolo tsa Abiezeri, Heleki, Asirieli, Shekemu, Heferi na Shemida. Awano iwo iwatsukulu wamale wa Manase, imwana wa Yosefu. 3 Lekeni Selofehadi mwana Heferi, mwana wa Gileadi, mwana wa Makiri, mwana wa Manase, yeye tsakahela wana wamale, ila tsakana wana wapinga waliyeka. Iwana awo wawo awano: Mahila, Noa, Hogila, Milika na Tiriza. 4 Iwana awo wapinga tsawamghendela imtambika Eleazeari na Yoshua, mwana wa Nuni na pfilongotsi wamwenga, walonga, "IMNDEWA tsakamlaghitsa Musa utugholele isi ka pfauwagholele iwamale wa likabila lyetu." Apfo Yoshua kaweng'a isi yawo ka pfayaweng'ile iwamale wa likabila lyawo ka IMNDEWA pfayalaghitse. 5 Apfo likabila lya Manase libokela isi kumi, bila kupeta isi atsino mbili itsongetsighwe, isi ya Gileadi na ya Bashani itsili mashariki mwa ghumto Yoridani, 6 kwaapfila iwana wapinga wa Manase tsaweng'ighwa isi tsawo ka pfaweng'ighwe iwamale wa likabila lyawo. Na isi ya Gileadi tsaweng'ighwa watsukulu wangi wamale wa Manase. 7 Isi ya likabila lya Manase tsayanzila Asheri, na ighenda mbaka Mikimetati ubali wa mashariki wa ghumji ghwa Shekemu, na ghumbaka ghwawo ghughendelelela mbaka kusini kuna isi yawokala iwanu wa Eni Tapua. 8 Isi ya Tapua tsa yake Manase, lekeni ghumji aghula ghwa Tapua ighukalile mna ghumbaka ghwa Manase, tsaghuwa ghwa iwana wa Efulemu. 9 Ghumbaka aghwo ghughendelela mbaka kuna ichikolongo cha Kana. Na imiji ikalile kusini mwa chikolongo cha Kana, tsa iwa ya iwanu wa kabila lya Efulemu hata ka tsa yamna isi ya kabila lya Manase. Kuya ghumbaka ghwa Manase tsaghubita kasikazini ya ichikolongo cha Kana na ghutsighila kuna ibahari ya Mediteraniya. 10 Isi ya kusini tsa ya iwanu wa kabila lya Efulemu na isi ya kasikazini tsa ya wanu wa kabila lya Manase. Kwa ubali wa maghalibi tsawebakanila ibahari ya Mediteraniya na ghupfika Asheri ubali wa Kasikazini, na ghumbaka ghwa ubali wa mashariki ghupfika kuna isi ya likabila lya Isakari. 11 Pfipfila mna isi iweng'ighwe likabila lya Isakari na likabila lya Asheri, kabila lya Manase ling'ighwa miji ya Batisheani, miji ya Ibileamu hamwe na pfijiji pfake, miji ya Dori, miji ya Endori, miji ya Taanaki miji ya Megido hamwe na pfijiji pfake, na selusi imwe ya ghumji ghwa Nafati. 12 Lekeni iwanu wa Manase ng'awadahile baye kuwawinga iwanu wa imiji ayo, apfo Wakanaani waghendelela kukala amwo. 13 Waisiraeli hawawile na ngupfu, ng'awawawingile baye Wakanani, lekeni wawananahitsa wawasang'ane ng'onde tsawo.

14 Wanu wa Likabila lya Yosefu wamlongela Yoshua, "Ule kutugholela isi imwe iliyeka iwe yetu? Twetwe tubalikighwa na IMNDEWA na katutenda twawengi ng'ani." 15 Yoshua kawedika, "Ka mwemwe mwawengi ng'ani na isi ya ipfidunda ya Efulemu ndodo kwa mwemwe ukukala amwo, mgheluke mghende kumuhulo kuna isi ya Waperizi na ya Warefai, mkaghane imibiki na kuko kuwe ukaye yenu." 16 Iwanu wa likabila lya Yosefu wamwidika, "Isi ya ipfidunda ndodo ukukala twetwe, na Wakanaani wose iwokala kuchiwala wana mituka ya chuma, pfipfila na awala wose iwokala Beti Shani na pfijiji pfake pfose, wose iwokala mna ulwanda lwa Yazireeli nawo wana mituka ya chuma." 17 Yoshua kawalongela iwatsukulu wa Yosefu, awala wa likabila lya Efulemu na lya Manase, "Ona, mwemwe mwawengi ghendo na mna ngupfu nyingi, ng'apfinoghile baye mpate isi imwe iliyeka. 18 Pfipfila isi ya ipfidunda itsakuwa yenu, hata ka sambi ya muhulo, lelo mghane imibiki ili mumo, na isi ayo yose itsakuwa yenu, namwe mtsowawinga Wakanaani hata ka wana mituka ya chuma na wana ngupfu."