1 Kuya Yoshua mwana wa Nuni, kawatuma chinyelenyele wanu weli kulawa Shitimu, waghende wakaipelembe isi ya Kanaani, hasa ghumji ghwa Yeriko. Waghenda wapfika ukaye kwa pinga yumwe chiweghe iyakemighwe Rahabu, na wakala baho. 2 Imfalume wa ghumji ghwa Yeriko kalongelighwa apfino, "Lola! Waisiraeli weli watsa chilo chino kuipelemba isi yetu." 3 Imfalume wa Yeriko kawatuma wasenga waghende kwa Rahabu, kalonga, "Walapfe kunze iwanu iwengile mng'anda mwako, kwaapfila watsa kuipelemba isi." 4 Lekeni ipinga ayo tsakawasola iwapelembi awala weli, kawapfisa, kuya kawalongela iwasenga wa mfalume wa Yeriko, "Ona, iwanu awo wanitsila, lekeni simanyile baye ka wolawila kwani. 5 Ichilo hachingile na lilango lya ghumji haling'ali habehi kuhindighwa, iwanu awo weli woka, na siimanyile baye nzila yachi yawang'ile. Muwawinze sambi namwe mtsowona." 6 Lekeni yeye tsakawadinitsa mkano, na kawapfisa kwa mibeleghe iitumika kutengenetsa maghwanda matselu, iyaitandatse mchanya mwa ikano. 7 Apfo iwanu awala iwatumighwe na mfalume, wawawinza Waisiraeli awo weli kwa nzila ighenda Yoridani, hanu hawalokelagha iwanu, baho iwanu iwawawinzile hawalawile kunze mwa ghumji, lilango lihindighwa. 8 Ng'ana iwapelembi awo wawase baye, Rahabu kawadinila mkano, 9 kawalongela, "Nene nomanya ka IMNDEWA kamwing'ani isi aino, mwemwe mtutenda twingilighwe na wogha, na iwanu wose iwokala muisi amno wowapfukani sideke. 10 Tuhulika IMNDEWA pfayaghatendile ghamatsi ghanyale mna ibahari ya Shamu hamng'ali mwolawa Misiri, na pfamuwatendele wafalume weli wa Waamori, Sihoni na Ogu, iwang'ali wokala kumwambu mwa ghumto Yoridani, yamuwakomile ghendo. 11 Baho hatuhulike agho, imimoyo yetu tsaitenyuka ghendo, tukala twahela ngupfu, kwaapfila IMNDEWA Imulungu wenu, yuyo Imulungu wa kuchanya kulanga na hasi muisi. 12 Apfo lelo nowalomba mwilahe kwa taghwa lya IMNDEWA ka mtsombonela libatsi nene na iwanu wa ikaye yangu, kwaapfila nene tsanimwonelani libatsi, mnanguse chitango ili niwatoghole. 13 Mwilahe ka ng'amtsowakoma baye aba wangu na mai wangu, ndughu tsangu wamale na wapinga na wose iwali mkaye mwawo na kutukombola tuleke ukufa."

14 Iwamale awala wamlongela, "Ughima wenu uwo ughima wetu! Ka ng'ulonga baye achila chatutenda, tutsokutendela pfinoghile na kwa uluso, IMNDEWA wetu hayatsotwing'a isi aino."

15 Apfo Rahabu kawahulumsa iwanu awo kwa lutsabi kubitila mdilisha, kwaapfila ing'anda yake tsaitsengighwa mna ubanda wa ghumji ghwa Yeriko. 16 Ipinga ayo kawalongela, "Mghende kuchidunda mkepfise, ili awala iwowawinza waleke kuwona. Kaleni kuko kwa matsuwa madatu mbaka woye, kuya mlawe mke." 17 Iwamale awala wamlongela Rahabu, "Achila chatwilahile kuna ghweghwe tutsochitenda ghendo. 18 Hatutsakwingila mna isi aino, wohe lutsabi ludung'u mna lidilisha lyautuhulumsile, uwatinganitse hamwe mng'anda mwako aba wako, mai wako, na lumbu tsako, na wose iwali mkaye mwako. 19 Munu wowose iyatsolawa kunze na kughenda mnzila yang'akomighwa alwo lwake, na twetwe ng'atutsakuwa na totso baye. Lekeni munu wowose iyatsokala mng'anda mwako yang'akomighwa, ghweghwe utughoghe twetwe. 20 Lekeni ung'amlongela munu wowose kwa achino chatutenda, ukwilaha akuno kwatwilahile kutsakuwa hela." 21 Naye kawalongela, "Iwe pfipfo ka pfamlongile." Apfo kawalapfa kunze, nawo woka. Naye koha lutsabi lundung'u mna ilidilisha.

22 Hawokile, waghenda kuchidunda na wakala kuko matsuwa madatu, mbaka awala iwang'ali iwowabama hawoyile Yeriko, na wawawinza nzila yose na ng'awawonile baye. 23 Kuya iwamale awala weli tsawoya wahulumka kulawa akula kuchidunda, waloka ghumto ghwa Yoridani na wapfika kwa Yoshua mwana wa Nuni, na wamlongela chila chinu ichiwalawile. 24 Wamlongela Yoshua, "IMNDEWA katwing'a ghendo isi yose mna ghamwoko ghetu, iwanu wose iwokala amwo wotupfuka twetwe."