1 Awano wawo iwafalume wa isi iwatowighwe na Waisiraeli na kusola isi tsawo itsikalile kumwambu mwa ghumto Yoridani ubali wa mashariki, kulawa lwanda lwa ghumto ghwa Arinoni mbaka chidunda cha Herimoni na isi yose ya Araba ubali wa mashariki. 2 Mfalume Sihoni wa Waamori, iyakalile Heshiboni, iyalongotse kulawa isi ya Aroeri, isi ikalile mmbalimbali mwa lwanda lwa Arinoni. Tsakalongotsa kulawa haghatighati ha lwanda lwa Arinoni mbaka ghumto ghwa Yaboki ighuli mbaka ghwa isi ya Waamoni, inusu ya isi ya Gileadi. 3 Pfipfila tsakalongotsa isi yose ya Araba, kulawa bahari ya Kinereti, ubali wa mashaliki, mbaka Beti Yeshimoti kuna ibahari ya Munyu, ighendelela mbaka kuna ichidunda cha Pisiga. 4 Pfipfila tsakamtowa mfalume wa Ogi wa isi ya Bashani, yumwe wa Warefai iyakalile mghima, iyalongotse ghumji ghwa Ashitaroti na ghumji ghwa Edirei. 5 Yeye tsakalongotsa mna ichidunda cha Herimoni, na ghumji ghwa Saleka, Bashani yose mbaka kuna iwanu wa ghumji ghwa Geshuri na ghumji ghwa Wamaaka, na inusu ya Gileadi mbaka kwaibakane na isi ya mfalume Sihoni wa Heshiboni. 6 Musa imtumwa wa IMNDEWA, na Waisiraeli tsawawatowa wafalume awo. Musa imtumwa wa IMNDEWA kaweng'a isi tsawo tsiwe tsa Warubeni, Wagadi na inusu ya likabila lya Manase.

7 Awano wawo iwafalume wa isi iwawatowighwe na Yoshua na Waisiraeli, iwakalile ubali wa maghalibi wa ghumto Yoridani, kulawa Baali Gadi mna ilwanda lwa Lebanoni mbaka chidunda cha Halaki ichili habehi na Seiri. Yoshua kawagholela ghamakabila gha Isiraeli isi atso tsiwe tsawo ghendo. 8 Isi atso tsimwenga tsa isi tsa pfidunda, tsa pfiwala, tsa Araba, na tsa mihulumko ya ipfidunda na atsila itsikalile mna inyika, Negebu, isi tsa Wahiti, Waamori, Wakanaani, Waperizi, Wahivi na Wayebusi. 9 Wafalume iwatowighwe na Waisiraeli iwo wano: mfalume wa Yeriko, mfalume wa Ai, ghumji aghwo ghwa habehi na Beteli, 10 mfalume wa Yerusalemu, mfalume wa Heburoni, 11 mfalume wa Yarimuti, mfalume wa Lakishi, 12 mfalume wa Egiloni, mfalume wa Gezeri, 13 mfalume wa Debili, mfalume wa Gederi, 14 mfalume wa Horima, mfalume wa Aradi, 15 mfalume wa Libina, mfalume wa Adulamu, 16 mfalume wa Makeda, mfalume wa Beteli, 17 mfalume wa Tapua, mfalume wa Heferi, 18 mfalume wa Afeka, mfalume wa Lasharoni, 19 mfalume wa Madoni, mfalume wa Hazori, 20 mfalume wa Shimroni Meroni, mfalume wa Akishafu, 21 mfalume wa Taanaki, mfalume wa Megido, 22 mfalume wa Kadeshi, mfalume wa Yokineamu, ghumji aghwo tsa ghwa mna ichidunda cha Karimeli, 23 mfalume wa Dori, ghumji ighuli mna isi ya Nafati Dori, mfalume wa Goiimu ako Giligali, na 24 mfalume wa Tiriza. Wafalume awo wose tsawapfika salasini na yumwe.