1 Iwanu wose hawamalitse kuloka ghumto Yoridani, IMNDEWA kamlongela Yoshua, 2 "Wasaghule wanu kumi na weli kulawa mna Waisiraeli awo, chila kabila munu yumwe, 3 Walongele wasole mabwe kumi na meli ighali haghatighati mwa ghumto Yoridani, aho haghemile ghamaghulu gha iwatambika na mghasole mkagheke hanu hamtsowasa leloli." 4 Apfo Yoshua kawakema iwanu awo kumi na weli iyawasaghule, chila kabila munu yumwe, 5 kawalongela, "Mlilongolele lisanduku lya laghano lya IMNDEWA Imulungu wenu, mghende mbaka haghatighati ha ghumto Yoridani, chila munu yakasole libwe mmayegha mwake, libwe limwe kwa chila kabila lya Isiraeli. 6 Mwotenda apfo ili chiwe chitango mna mwemwe, na wanenu hawatsowaghutsa mna matsuwa ighakutsa, ‘Hebali ghamabwe aghano ghali ahano?’ 7 Muwalongele apfino, ‘Lisanduku lya laghano lya IMNDEWA Imulungu haling'ali lyobita mna ghumto Yoridani, ghamatsi gha ghumto aghwo tsaghakimighwa ghaleke kuhulumka.’ Ghamabwe aghano ghatsowatenda Waisiraeli waleke kwisemwa achila ichilawile ahano mna ghamatsuwa ghawo ghose." 8 Apfo Waisiraeli watenda ka Yoshua pfayawalaghitse. Wasola ghamabwe agho kumi na meli, chila kabila lya Waisiraeli libwe limwe, ka Imulungu pfayamlaghitse Yoshua, na waghaduta mbaka kuna tsindalo tsawo, aho waghatula hasi. 9 Kuya Yoshua kahimika mabwe ghangi kumi na meli haghati ha ghumto Yoridani, hanu hawemile iwatambika iwadutile lisanduku lya laghano. Na ghamabwe agho ghabaho mbaka leloli aino. 10 Iwatambika awala iwadutile lisanduku lya laghano tsawema haghati ha ghumto Yoridani mbaka iwanu hawamalitse kutenda ghose ka IMNDEWA Imulungu pfayamlaghitse Yoshua. Naye Yoshua tsakatenda ghose ka pfayalaghitsighwe na Musa, apfo iwanu tsawasumka kuloka ghumto. 11 Iwanu wose hawamalile kuloka, iwatambika awala waloka na lisanduku lya laghano lya IMNDEWA na wapfika kumwambu, aku iwanu wose wolola. 12 Iwanu wa kabila lya Rubeni na Wagadi na nusu ya likabila lya Manase, nawo waloka wawalongolela Waisiraeli aku wakinda tsisilaha, ka Musa pfayawalaghitse. 13 Iwanu iwopfika elufu alubaini aku wakinda tsisilaha tsawo wapfosa hambele ha IMNDEWA waghenda kuna lwanda lwa ghumji ghwa Yeriko kwa kwitowa. 14 Mna litsuwa alyo IMNDEWA Imulungu kamtenda Yoshua yatunyighwe na Waisiraeli wose, nawo wamtegheletsa matsuwa ghawo ghose gha ughima wawo, ka pfawamtegheletse Musa.

15 Kuya IMNDEWA kamlongela Yoshua, 16 "Walaghitse iwatambika iwadutile lisanduku lya laghano walawe kuna ghumto Yoridani." 17 Apfo Yoshua kawalaghitsa iwatambika awala kalonga, "Laweni mna ghumto Yoridani." 18 Iwatambika awala iwadutile lisanduku lya lilaghano lya IMNDEWA Imulungu hawalawile haghatighati ha ghumto Yoridani na kukanyagha mmbalimbali mwa ghumto, ghamatsi gha ghumto Yoridani ghandusa kuhulumka na kumema keli ka tsapfaili mwanduso. 19 Waisiraeli tsawaloka ghumto Yoridani mna litsuwa lya kumi lya mwetsi ghwa kwanza, na wakala mna ghumji ghwa Giligali, mashaliki ya ghumji ghwa Yeriko. 20 Na ako Giligali Yoshua kaghemitsa ghamabwe aghala kumi na meli ighasolighwe kuna ghumto Yoridani. 21 Kuya Yoshua kawalongela Waisiraeli, "Mna ghamatsuwa ighakutsa watsukulu wenu wang'awaghutsa aba tsawo, ‘Hebali ghamabwe aghano ghali ahano?’ 22 Mtsowalongela apfino, ‘Waisiraeli tsawaloka ghumto Yoridani ighunyalile.’ 23 Kwaapfila IMNDEWA, Imulungu wenu kaghanyatsa ghamatsi ighali mna ghumto Yoridani ili mwemwe mdahe kuloka, ka pfayaghatendile ghamatsi gha ibahari ya Shamu ghanyale, ili twetwe tuloke. 24 IMNDEWA Imulungu katenda apfo ili iwanu wose iwali muisi wadahe kumanya ka ghumoko ghwake ghuna ngupfu ng'ulu, ili namwe mghendelele kumtunya IMNDEWA Imulungu wenu matsua ghenu ghose."