1 Isimbi ya keli iwaghwila iwanu wa likabila lya Simioni kwa kulola tsikolo tsawo. Isi yawo yaweng'ighwe tsaitsungulukighwa na isi ya kabila lya Yuda. 2 Imiji yawo iyo aino: ghumji ghwa Beeri Sheba, ghumji ghwa Sheba, ghumji ghwa Molada, 3 ghumji ghwa Hasari Shuali, ghumji ghwa Bala, ghumji ghwa Esemu, 4 ghumji ghwa Elitoladi, ghumji ghwa Betuli, ghumji ghwa Horima, 5 ghumji ghwa Sikilagi, ghumji ghwa Beti Marikaboti, ghumji ghwa Hasari Susa, 6 ghumji ghwa Beti Lebaoti, na ghumji ghwa Sharuheni. Imiji yose yaweng'ighwe tsaipfika kumi na midatu, hamwe na pfijiji pfake. 7 Pfipfila tsahana ghumji ghwa Aini, ghumji ghwa Rimoni, ghumji ghwa Eteri, na ghumji ghwa Ashani. Imiji yose yaweng'ighwe tsa mine hamwe na pfijiji pfake. 8 Pfipfila tsaweng'ighwa pfijiji pfose ipfitsunguluke imiji ayo mbaka ghumji ghwa Baalati Beeri au ighukemighwe Rama ya kusini. Ayo yose iyo isi yaweng'ighwe iwanu wa likabila lya Simioni. 9 Kwaapfila isi yaweng'ighwe likabila lya Yuda tsang'ulu kubita aila yawabamile, apfo isi isighale wawagholela likabila lya Simioni. Isi ayo tsaikala haghatighati ha imibaka ya isi ya Yuda.

10 Isimbi ya kadatu iwaghwila likabila lya Zabuloni kwa kulola tsikolo tsawo, isi yawo tsaipfika mbaka kuna ghumji ghwa Saridi. 11 Kulawa ako ghumbaka ghwake ghughenda maghalibi mbaka kuna ghumji ghwa Mareali, ghwang'ila mmbalilmbali mwa ghumji ghwa Debesheti, na ghughenda kuna ichikolongo cha ghamatsi ichilolesa na mashariki ya ghumji ghwa Yokineamu. 12 Kuya ghutsunguluka kulawa Saridi na ghughendelela ubali wa mashariki kwalilawila litsua mbaka ghupfika kuna ghumbaka ghwa Kisiloti Tabori, kuya ghulawilila kuna ghumji ghwa Daberati na ghugheluka mbaka kuna ghumji ghwa Yafia. 13 Kuya ghughendelela mashariki mbaka kuna ghumji ghwa Gati Heferi, na ghupfika kuna ghumji ghwa Eti Kasini kuya ghulawilila kuna ghumji ghwa Rimoni na kupfika kuna ghumji ghwa Nea. 14 Kuya ghumbaka aghwo ghutsunguluka isi ayo ubali wa kasikazini mbaka kuna ghumji ghwa Hanatoni, na ghutsighila mna ilwanda lwa Ifitaheli. 15 Ung'ongetsa ghumji aghuno ghwa Katati, ghumji ghwa Nahalali, ghumji ghwa Shimironi, ghumji ghwa Idala na ghumji ghwa Betilehemu, imiji yose yaweng'ighwe tsaipfika kumi na mili hamwe na pfijiji pfake. 16 Ayo iyo imiji yaweng'ighwe iwanu wa likabila lya Zabuloni na pfijiji pfake kwa ukulola tsikolo tsawo.

17 Isimbi ya kane iwaghwila iwanu wa kabila lya Isakari kwa kulola tsikaye tsake. 18 Isi yawo tsaina miji aino: ghumji ghwa Yezireeli, ghumji ghwa Kesuloti, ghumji ghwa Shunemu, 19 ghumji ghwa Hafaraimu, ghumji ghwa Shioni, ghumji ghwa Anaharati, 20 ghumji ghwa Rabiti, ghumji ghwa Kishioni, ghumji ghwa Ebesi, 21 ghumji ghwa Remeti, ghumji ghwa Eni Ganimu, ghumji ghwa Eni Hada, na ghumji ghwa Beti Pasesi. 22 Na isi yawo ibakana na ghumji ghwa Tabori, ghwa Shahasuma, ghwa Beti Shemeshi, na ghumbaka ghwake ghutsighila kuna ghumto ghwa Yoridani. Imiji yose yaweng'ighwe tsaipfika kumi na sita hamwe na pfijiji pfake. 23 Ayo iyo imiji yaweng'ighwe iwanu wa kabila lya Isakari kwa kolo tsawo, hamwe na pfijiji pfake.

24 Isimbi ya tano iwaghwila kolo tsa kabila lya Asheri na tsikaye tsake. 25 Imiji ya isi iyo aino: ghumji ghwa Helikati, ghumji ghwa Hali, ghumji ghwa Beteni, ghumji ghwa Akishafi, 26 ghumji ghwa Alameleki, ghumji ghwa Amadi na ghumji ghwa Mishali. Ubali wa maghalibi isi ibakana na ichidunda Karimeli na Shihori Libinati. 27 Kuya ghutsunguluka mashariki ghughenda kuna ghumji ghwa Beti Dagoni, ako ghubakana na isi ya Zebuluni na ilwanda lwa Ifitaheli. Kuya ghughendelela kasikazini mbaka kuna ghumji ghwa Beti Emeki, ghwa Neieli na ghulawilila kuna ghumji ghwa Kabuli, 28 ghumji ghwa Eburoni, ghumji ghwa Rehobu, ghumji ghwa Hamoni, ghumji ghwa Kana mbaka kuna ghumji ghwa Sidoni ighuli mkulu. 29 Kuya ghumbaka aghwo ghutsunguluka ghughenda kuna ghumji ghwa Rama, ghupfika mbaka kuna ghumji ghwa Tiro, ghumji ighutsungulukighwe na ubanda, kuya ghwang'ila kuna ghumji ghwa Hosa na kutsighila kuna ibahari ya Mediteraniya. Na imiji imwenga ili mumo iyo aino: Ghumji ghwa Maharabu, ghumji ghwa Akizibu, 30 ghumji ghwa Uma, ghumji ghwa Afeka na ghumji ghwa Rehobu. Imiji yose yaweng'ighwe ipfika ishirini na mili hamwe na pfijiji pfake. 31 Aino iyo imiji yaweng'ighwe iwanu wa likabila lya Asheri kwa kulola tsikolo tsawo, hamwe na pfijiji pfake.

32 Isimbi ya sita iwaghwila iwanu wa likabila lya Nafutali kwa kulola tsikaye tsake pfatsili. 33 Ghumbaka ghwake ghwanzila kuna ghumji ghwa Helefu na kuna mbiki mkulu ighukemighwe mwaloni ighuli mna ghumji ghwa Zaananimu, ghubitila kuna ghumji ghwa Adami Nekebu, ghwa Yabineeli mbaka kuna ghumji ghwa Lakumu na ghutsighila kuna ghumto Yoridani. 34 Kuya ghutsunguluka maghalibi ghubita mbaka kuna ghumji ghwa Azinoti Tabori na ghulawila kuna ghumji ghwa Hukoki, na ghutsigha hana isi ya likabila lya Zabuloni ubali wa kusini, kuya ghwibakana na isi ya likabila lya Asheri ubali wa maghalibi, na ghwibakana na Yuda ubali wa mashaliki hana ghumto Yoridani. 35 Na imiji itsungulusighwe ubanda iyo aino: ghumji ghwa Sidimu, ghumji ghwa Seri, ghumji ghwa Hamati, ghumji ghwa Rakati, ghumji ghwa Kinereti, 36 ghumji ghwa Adama, ghumji ghwa Rama, ghumji ghwa Hazori, 37 ghumji ghwa Kedeshi, ghumji ghwa Edirei, ghumji ghwa Eni Hasori, 38 ghumji ghwa Yironi, ghumji ghwa Migidaleli, ghumji ghwa Horemu, ghumji ghwa Beti Anati na ghumji Beti Shemeshi. Imiji yose yaweng'ighwe tsaipfika kumi na tisa na pfijiji pfake. 39 Aino iyo imiji yaweng'ighwe iwanu wa likabila lya Nafutali hamwe na pfijiji pfake.

40 Isimbi ya saba iwaghwila iwanu wa kabila lya Dani. 41 Isi yawo tsaina miji aino: ghumji ghwa Sora, ghumji ghwa Eshitaoli, ghumji ghwa Irishemeshi, 42 ghumji ghwa Shaalabini, ghumji ghwa Aiyaloni, ghumji ghwa Itila, 43 ghumji ghwa Eloni, ghumji ghwa Timna, ghumji ghwa Ekironi, 44 ghumji ghwa Eliteke, ghumji ghwa Gibetoni, ghumji ghwa Baalati, 45 ghumji ghwa Yehudi, ghumji ghwa Bene Beraki, ghumji ghwa Gati Rimoni, 46 ghumji ghwa Me Yarikoni na Rakoni isi ili habei na ghumji ghwa Yopa. 47 Iwanu wa Likabila lya Dani ng'awadahile kusola isi iyaweng'ighwe. Apfo waghenda na kuwatowa iwanu iwakalile mna ghumji ghwa Leshemu. Wawatowa na wasola ghumji aghwo, na kukala mumo, waghukema ghumji aghwo Dani, taghwa lya mhenga wawo. 48 Aino iyo imiji yaweng'ighwe iwanu wa kabila lya Dani na pfijiji pfake, ka tsikaye tsawo pfatsili.

49 Hawamalitse kwigholela isi yose, Waisiraeli wamwing'a Yoshua, imwana wa Nuni, ingwe yake haghatighati hawo. 50 Ka IMNDEWA Imulungu pfayalaghitse, Waisiraeli tsawamwing'a Yoshua ghumji ghwa Timunati Sela, ghumji ghwayaghusaghule yeye mwenyegho, ghumji ighukalile mna isi ya ipfidunda pfa Efulemu. Naye kaghutsenga keli na kakala mumo. 51 Atsino tsitso tsiisi imtambika Eliazari na Yoshua mwana Nuni, hamwe na pfilongotsi wa ghamakabila gha Waisiraeli tsawagholile kwa kutowa simbi hambele ha IMNDEWA Imulungu hana ghumlango ghwa Lihema lya kwitinganila ako kuna ghumji ghwa Shilo. Apfo pfipfo pfawamalitse isang'ano ya kuighola isi.