1 Kuya Yoshua kaghakema hamwe ghamakabila ghose gha Isiraeli akula Shekemu, kawakema iwanzehe, pfilongotsi, walamutsi, na iwakulu wa Isiraeli. Nawo waghenda hambele ha Imulungu. 2 Yoshua kawalongela iwanu wose, "Achino chicho chayolonga IMNDEWA, Imulungu wa Isiraeli, wabala tsenu aho ghumwande tsawakala kumwambu kwa ghumto Eufurate, waitambikila milungu ingi. Imbala yumwe wa iwabala awo tsakakemighwa Tera, aba wawo Abrahamu na Nahori. 3 Nene Imulungu nimlapfa aba wenu Abrahamu kulawa ako kumwambu mwa ghumto Efurate, nimghala akuno Kanaani, aku nimwing'a iwatsukulu wengi. Nimwing'a Isaka, 4 naye Isaka nimwing'a wana weli wamale, Yakobo na Esau. Nimwing'a Esau isi ya pfidunda ya Seiri iwe yake, lekeni yeye Yakobo na iwanaghe wahulumka Misiri. 5 Kuya niwatuma Musa na Aruni, niwatenda iwanu wa isi ya Misiri waghaye kwa aghala ghaniwatendele, kuya niwalapfa mwemwe mna isi ayo. 6 Niwalapfa iwahenga wenu ako Misiri, namwe mpfika mbaka kuna ibahari ya Shamu. Wamisiri tsawawawinza aku wadina mituka yawo na asikali iwadinile wafalasi. 7 Waisiraeli hawandilile nene IMNDEWA, nene Imulungu, nyika chisi haghati hawo na Wamisiri, na niitenda ibahari iwaghubike Wamisiri. Mwemwe muwenyegho tsamwona kwa tsinenge tsenu wenyegho achila chaniwatendele Wamisiri."

"Kuya mwemwe mkala mnyika kwa matsuwa mengi. 8 Kuya niwaghala kuna isi ya Waamori ikalile kumwambu mwa ghumto Yoridani. Tsawetowa na mwemwe, lekeni nene niweka mna ghamoko ghenu, niwakoma hambele henu, namwe muisola isi yawo na iwa yenu. 9 Naye Balaki mwana wa Sipori, imfalume wa Moabu, tsakatsa kwitowa namwe. Kamkema Balaamu, imwana wa Beori yatse yawalighite. 10 Lekeni nene Imulungu simtegheletse baye Balaamu, apfo yeye kongetsa kuwabaliki, na nene niwalapfa mna ghamoko gha Balaki. 11 Kuya mloka ghumto Yoridani na mpfika mna isi ya Yeriko. Iwanu wa Yeriko tsawetowa namwe ka pfawatendile Waamori, Waperizi, Wakanaani, Wahiti, Wagirigashi, Wahivi na Wayebusi. Lekeni nene nimwapfilani na muwatowa wose. 12 Tsanituma malondola ghawalongolele, wawawinga iwafalume weli wa Waamori. Namwe ng'amuwawingile baye kwa mimaghe wala kwa mighoha yenu. 13 Tsanimwing'ani imighunda, ng'amuilimile baye, na nimwing'ani imiji aila ing'amuitsengile, lekeni sambi mwokala mna imiji ayo na mwakuja mitsabibu na mitseituni aila ing'amuihandandile. 14 Lelo mpfukeni IMNDEWA, msang'anileni yeye kwa ghumoyo ghunoghile na kwa kutogholighwa, ilekeni ghendo imilungu aila yawaitambikile iwahenga wenu akula kumwambu mwa ghumto Eufurate na akula mna isi ya Misiri, msang'anileni IMNDEWA yaliyeka. 15 Ka ng'ambama baye kumsang'anila IMNDEWA, lelo leloli aino msaghule yuhi yamutsomsang'anila, ka imilungu aila iwaisang'anile wahenga wenu akula kumwambu mwa ghumto Efurate, au imilungu ya Waamori mwamkala sambi mna isi yawo, lekeni nene na ng'anda yangu twomsang'anila IMNDEWA."

16 Baho iwanu wamwidika, "Ng'atutsomleka baye IMNDEWA wetu na kuisang'anila milungu ingi! 17 Kwaapfila IMNDEWA, Imulungu wetu yuyo iyatulapfile twetwe na iwahenga wetu Misiri, kulawa mna isi ya utumwa, twona kwa tsinenge tsetu ipfinu pfa kukangawatsa pfayatendile. Katukinga mnzila mwose mwatwang'ile na mna isi tsa iwanu mwatubitile. 18 Na Imulungu tsakatuwingila iwanu wa isi tsose, awo Waamori iwakalile mna isi aino. Apfo twetwe pfipfila tutsomsang'anila IMNDEWA, kwaapfila yeye ka Imulungu wetu."

19 Lekeni Yoshua kawedika, "Mwemwe ng'amdaha baye kumsang'anila IMNDEWA, kwaapfila Yeye ka Imulungu yenzeluke, ka Imulungu iyana gele, yeye ng'atsoghalekelela baye ighehile ghenu na matotso ghenu. 20 Mng'amleka Imulungu, na kuisang'anila milungu ingi, katsowahundukila na kuwaghalila maghayo na kuwakomani ghendo, hata ka yeye tsakawatendela ghanoghile."

21 Lekeni iwanu wamwidika Yoshua, "Mbe! Twetwe tutsomsang'anila IMNDEWA yaliyeka."

22 Baho Yoshua kawedika, "Mwemwe wenyegho mwolonga ichili mmoyo mwenu ka mwosaghula kumsang'anila IMNDEWA." Nawo wamwidika, "Ona twetwe yatulonga apfo."

23 Naye kawedika, "Muyase milungu migheni yamli nayo na mumuwinze IMNDEWA, Imulungu wa Isiraeli kwa ghumoyo ghwenu ghwose."

24 Iwanu wamlongela Yoshua, "Tutsomsang'anila IMNDEWA, Imulungu wetu na kumtegheletsa yeye."

25 Apfo tsuwa alyo Yoshua keka laghano na Waisiraeli ako Shekemu, kaweng'a imiko ya ukukinda na malaghitso gha kughawinza. 26 Yoshua kaghandika agha ghose mna ichitabu cha Imulungu cha malaghitso, kuya kasola libwe kulu na kulimitsa hasi ha ghumbiki ghwa mwaloni habehi na hanu haenzeluke ha IMNDEWA. 27 Yoshua kawalongela iwanu wose, "Mlole! Libwe alino lihulika chatulongile wose. Lihulika ghose ghayalongile Imulungu kuna twetwe, litsolonga ka mtsombela Imulungu wenu." 28 Kuya Yoshua kawaleka iwanu woke, chila munu koka ukaye yake.

29 Haghamalile agho, Yoshua mwana wa Nuni, imtumighwa wa Imulungu kafa aku kana miyaka miya imwe na kumi. 30 Apfo Wamtsika mna isi iyagholighwe iwe yake, ako Timati Sela ili mna ipfidunda pfa Efuraimu, kasikazini mwa ichidunda cha Gaashi. 31 Waisiraeli wamsang'anila IMNDEWA matsuwa ghose Yoshua hayakalile mghima, na ahala hayafile waghendelela kumsang'anila IMNDEWA kwa matsuwa ghose ghawakalile waghima iwabala awala iwonile kwa tsinenge tsawo pfinu pfikulu pfayatendile IMNDEWA kwa Waisiraeli. 32 Imipate ya Yosefu yawaidutile Waisiraeli kulawa Misiri, itsikighwa akula Shekemu hana ingwe iyaghulile Yakobu kulawa kwa mwana wa Hamori, aba wake Shekemu, kwa tobole miya imwe. Ingwe ayo iwa mali ya iwana wa Yosefu. 33 Naye Eleazari Mwana wa Aruni, kafa na katsikighwa Gibea, ghumji ghwayeng'ighwe imwanaghe Finehasi mna isi ya ipfidunda pfa Efuraimu.