1 Yoshuwa hayafile, Waisiraeli wamghutsa IMNDEWA, "Kabila lyachi litsolongola kughenda kuwatowa Wakanaani?"

2 IMNDEWA kawedika, "Likabila lya Yuda litsolongola, kwaapfila niweng'a isi ayo ya Wakanaani mmoko mwawo". 3 Iwanu wa Yuda wawalongela ndughu tsawo, iwanu wa Simeoni, "Mwilongotse na twetwe hatughenda kuisola isi ayo yatwing'ighwe, twihangile ukuwatowa Wakanaani, na twetwe tutsomwapfilani hamghenda kuisola isi yamwing'ighwe iwe yenu". Apfo Wasimeoni watoghola na waghenda hamwe nawo.

4 Iwanu wa likabila lya Yuda waghenda kuwatowa Wakanaani na Waperizi, naye IMNDEWA kawapfila, kawatenda wawahume, nawo wawakoma wamale elufu kumi kuna ghumji ghwa Bezeki. 5 Kuko Bezeki wampfika mfalume Adoni Bezeki, wetowa naye, nawo wawatowa Wakanaani na Waperizi. 6 Lekeni Adoni Bezeki katsuma, nawo wamuwinga mbaka wamghogha, wamdumla ipfidole ghumba ipfili mmoko na mmaghulu. 7 Adoni Bezeki kalonga, "Wafalume sabini yaniwadumule ipfidole ghumba pfili mmoko na mmaghulu tsawang'ali wodondola ipfijo ipfilaghale mmetsa mwangu, lelo Imulungu kaniliha chichila chanendile nene." Wamghala Yerusalemu, naye kafila kuko.

8 Kuya iwanu wa Yuda wawatowa iwanu wa ghumji ghwa Yerusalemu na waghusola ghumji aghwo, wawakoma iwanu wake kwa mimaghe, kuya ghumji aghwo waghulakatsa kwa moto. 9 Hambele, iwanu wa kabila lya Yuda waghenda kwitowa na Wakanaani iwakalile mna isi ya ipfidunda, na mna isi ya Negebu, na mna isi ya ichiwala. 10 Pfipfila iwanu wa likabila lya Yuda wawatowa Wakanaani iwang'ali wokala Heburoni, aho ghumwande ghumji agho tsaghumanyika ka Kiriati Ariba, nawo wawatowa mfalume Sheshai, mfalume Ahimani, na mfalume Talimai.

11 Kulawa kuko waghenda kuwatowa iwanu iwang'ali wokala Debiri, aho ghumwande ghumji aghwo tsaghumanyika ka Kiriati Seferi. 12 Kalebu kalonga, "Munu wowose iyatsodaha kughutowa ghumji ghwa Kiriati Seferi na kughusola, nitsomwing'a imwanangu Akisa yawe mwehe wake." 13 Naye Otinieli, imwana wa Kenazi, mdodo wake Kalebu, kaghusola ghumji agho, apfo Kalebu kamlapfa imwanaghe Akisa yakwelighwe na Otinieli. 14 Akisa hayakwelighwe na Otinieli, tsuwa limwe kamlongela Otinieli, "Ulombe mghunda kwa aba wangu." Akisa tsakadina chihongwe, na hayahulumke hasi Kalebu kamghutsa, "Ubama nikwing'e choni?"

15 Naye kamwidika kalonga, "Ungaye nzawadi! Kwaapfila ghweghwe kunyika mna isi ya Negebu ili hela matsi, nokulomba lelo ungaye isi ina tsimbwibwi tsa ghamatsi." Naye Kalebu kamwing'a tsimbwibwi tsa ghamatsi atsila itsili kuchanya, na atsila itsili kuisi.

16 Nawo iwatsukulu wa Keni, iyakalile aba mkwe wake Musa, tsawagheluka kulawa hana ghumji ghwa imitende, ighukemighwe Yeriko, hamwe na iwanu wa likabila lya Yuda, wengila mna inyika ya Yuda, ili kusini habehi na isi ya Aradi, nawo wakala hamwe nawo. 17 Kuya iwanu awano wa Yuda tsawelongotsa na ndughu tsawo, iwanu wa Simeoni, na wawatowa Wakanaani iwang'ali wokala Sefati, waghuhinya ghendo ghumji aghwo, apfo litaghwa lyake ghumji aghwo waghukema Horima. 18 Pfipfila iwanu wa kabila lya Yuda tsawaghusola ghumji ghwa Gaza na ghumji ghwa Ashikeloni na ghumji ghwa Ekironi na pfijiji pfose ipfitsunguluke imiji ayo.

19 IMNDEWA tsakawapfila iwanu wa kabila lya Yuda, nawo wawawinga iwanu iwang'ali wokala mna isi ya ipfidunda, lekeni ng'awadahile baye ukuwawinga iwanu iwakalile mchiwala, kwaapfila mituka yawo ya ukwitowela ng'ondo tsa ya chuma.

20 Kuya Kalebu keng'ighwa ghumji ghwa Heburoni, ka pfayalongile Musa, naye kawawinga iwana awala wadatu wa Anaki iwakalile mumo.

21 Lekeni iwanu wa Benjamini ng'awawawingile baye Wayebusi iwakalile Yerusalemu, na mbaka leloli aino Wayebusi wokala Yerusalemu hamwe na iwanu wa Benjamini.

22 Iwanu wa ghamakabila gha Yosefu nawo, tsawagheluka kughenda kughutowa ghumji ghwa Beteli, naye IMNDEWA tsakawapfila. 23 Kuya iwanu wa Yusufu watuma wanu waghende kughupelemba ghumji ghwa Beteli. Litaghwa lyake ghumji agho ghumwande tsaghung'ali ghukemighwa Luzu.

24 Iwapelembi awo wamwona munu kolawa mna ghumji aghwo, nawo wamlongela, "Tulanguse inzila ya ukwingilila ghumji aghuno, na twetwe ng'atutsokukoma baye." 25 Na imunu ayo kawalangusa inzila, nawo waghwingila ghumji na kumkoma kwa panga chila munu iyali mumo, lekeni yeye wamleka yoke na iwanu wa ikaye yake yose. 26 Kuya imunu ayo kahamila isi ya Wahiti, kuko katsenga mji, na kaghukema litaghwa lyake Luzu, na ghumji aghwo ghokemighwa pfipfo mbaka leloli aino.

27 Lekeni iwanu wa likabila lya Manase ng'awawawingile baye iwanu iwakalile mna ghumji ghwa Beti Sheani na pfijiji pfake, na ghumji ghwa Taanaki na pfijiji pfake, na ghumji ghwa Dori na pfijiji pfake, na ghumji ghwa Ibileamu na pfijiji pfake, wala awala iwakalile mna ghumji ghwa Megido na pfijiji pfake, kwa apfila Wakanaani tsawananahila ukukala kuko. 28 Waisiraeli hawapatile keli ngupfu wawananahitsa Wakanaani wawasang'anile ng'onde ng'omu, lekeni ng'awawawingile woke baye.

29 Pfipfila, iwanu wa kabila lya Efuraimu nawo ng'awawawingile baye Wakanaani iwang'ali wokala Gezeri, apfo Wakanaani waghendelela kukala kuko hamwe na iwanu wa Efuraimu.

30 Na wanu wa kabila lya Zabuloni ng'awawawingile baye iwanu iwakalile mna ghumji ghwa Kitironi, wala awala iwakalile Nahalali, lekeni Wakanaani waghendelela kukala nawo aku wawananahitsa kusang'ana ng'onde ng'omu.

31 Wanu wa kabila lya Asheri nawo ng'awawawingile baye iwanu awala iwakalile mna imiji ya Ako, Sidoni, Alabu, Akizibu, Heliba, Afeka, na Rehobu. 32 Apfo iwanu wa kabila lya Asheri tsawakala hamwe na Wakanaani, iwenyekaye wa isi ayo, kwaapfila ng'awawawingile baye.

33 Wanu wa kabila lya Nafutali nawo ng'awawawingile baye iwanu iwakalile Beti Shemeshi, au iwanu iwakalile Beti Anati, lekeni tsawakala hamwe nawo. Hata apfo, wawananahitsa iwenyekaye wa imiji ayo mili wawasang'anile ng'onde ng'omu Waisiraeli.

34 Waamori tsawawawinga iwanu wa likabila lya Dani woke kupfidunda, ng'awawalekile watse wakale mna isi ya ichiwala baye. 35 Waamori pfipfila tsa wananahila ukukala mna imiji ikalile mna ichidunda cha Heresi, Aiyaloni, na Shaalibimu. Lekeni iwanu wa ghamakabila gha Manase na Efuraimu tsawawatawala Waamori na wawananahitsa wasang'ane ng'onde ng'omu. 36 Ghumbaka ghwa Waamori tsaghwandusila kuna ing'alo ya Akirabimu mbaka Sela na kughendelela.