1 Waisiraeli wamtendela keli ghehile IMNDEWA, naye kawaleka watawalighwe na Wafilisti kwa miyaka alubaini.

2 Mna matsuwa agho tsahana munu yumwe taghwa lyake Manoa. Imunu ayo tsakalawa mna ghumji ghwa Sola, na kolawila mna likabila lya Dani. Mwehe wake ng'eleke iwana baye kwaapfila tsamgumba. 3 Tsuwa limwe Malaika wa Imulungu kamlawila ipinga ayula, kamlongela, "Ghweghwe sambi ng'udaha kweleka wana baye kwaapfila kwa mgumba. Lekeni sambi kutsakuwa na inda, na kutsomweleka mwana mmale. 4 Lelo walangitse, uleke kunwa dipfai wala mbwali, wala uleke ukuja chijo chochose ichikutenda uleke kutogholighwa na Imulungu. 5 Kwaapfila kutsakuwa na inda na kutsakweleka mwana mmale. Tsimvili tsa imwana ayo tsileke kubehighwa, kwaapfila katsolapfighwa yawe mnatsili wa Imulungu kulawa kwelekighwa kwake, naye katsakwanza kuwakombola Waisiraeli kulawa kwa Wafilisti."

6 Ipinga ayo kaghenda kumlongela mmale wake, "Munu wa Imulungu kanitsila, na chihanga chake chiwa ka malaika wa Imulungu, na chihanga chake cha kukangawatsa. Simghutsile yolawila kwani wala ng'anongele baye taghwa lyake nani. 7 Lekeni kanongela ‘Kutsakuwa na inda na kutsakweleka mwana mmale. Lelo uleke kunwa dipfai wala mbwali wala uleke ukuja chijo ichikutenda uleke kutoghologhwa na Imulungu, kwaapfila imwana ayo katsolapfighwa yawe mnatsili wa Imulungu kulawa kwelekighwa kwake.’ "

8 Kuya Manoa kamlomba IMNDEWA, kalonga, "Ghwe IMNDEWA, umtume keli imunu wako yaumtumile yatse yatufunde aghala ghatubamighwa kumtendela imwana ayo iyatsakoneka."

9 IMNDEWA kamhulika Manoa, na imalaika wa IMNDEWA kamtsila keli ipinga ayo hayang'ali kakumghunda, lekeni Manoa immale wake ng'akalile hamwe naye baye. 10 Ipinga ayula katsuma himahima, kaghenda kumlongela immale wake, "Lola! Imunu ayula iyanitsile litsuwa alila kandawila keli."

11 Manoa kelongotsa na mwehe wake mbaka wapfika kwa imunu ayo, kamghutsa, "Angu ghweghwe kwa imunu ayula yaulongile na mwehe wangu?" Imunu ayo kalonga, "Ona nene."

12 Kuya Manoa kamghutsa, "Agho ghaulongile haghatsolawila, imwana ayo tutsomtendela choni? Naye yatsotenda ng'onde yachi?"

13 Imalaika wa IMNDEWA kamwidika, "Mwehe wako yakinde aghala ghose ghanimlongele. 14 Yaleke ukuja chinu chochose ichilawa mna mitsabibu, wala yaleke kunwa dipfai, wala kunwa mbwali, wala yaleke ukuja chinu chochose ichimtenda yaleke kutogholighwa na Imulungu. Na ghose ghanimlongele yaghakinde."

15 Manoa kamlongela imalaika ayo wa IMNDEWA, "Twokulomba ukale chidogho tukuchinjile mwana wa imene."

16 Imalaika ayo wa MNDEWA kamlongela, "Hata ka mwoninanahitsa kukala chidogho, nene sitsakuja baye ichijo chenu. Lekeni ung'abama kulapfa nambiko ya ukulakatsighwa, inambiko ayo mlapfile IMNDEWA." Manoa tsang'atangile baye ka ayo tsa malaika wa IMNDEWA. 17 Baho Manoa kamlongela imalaika ayo wa IMNDEWA, "Taghwa lyako nani, ili haghatsotendeka aghala ghaulongile twetwe tukutunye." 18 Naye kamwidika, "Heule kongutsa taghwa lyangu? Taghwa lyangu lya ukukangawatsa." 19 Kuya Manoa kamsola mwana mene, na nambiko ya usaghe, keka mchanya mwa limbambalawe kamlapfila IMNDEWA. Na imalaika wa IMNDEWA katenda chinu cha ukukangawatsa aku Manoa na mwehe wake wolola. 20 Apfo Manoa na mwehe wake hawang'ali wolola lilambi lya ghumoto pfalighenda kulanga kulawa ahala hanu ha ukulapfila inambiko, wamwona imalaika wa IMNDEWA koghenda kulanga mna lilambi alyo. Baho Manoa na mwehe wake wenama wamfughamila. 21 Manoa kamanya ka ayo tsa malaika wa IMNDEWA. Imalaika wa IMNDEWA ng'amlawile keli baye Manoa wala mwehe wake.

22 Baho Manoa kamlongela mwehe wake, "Twetwe twakufa ghendo kwaapfila tumwona Imulungu."

23 Lekeni mwehe wake kamwidika, "Ka IMNDEWA Imulungu yang'abamile kutukoma, yang'alekile kuitoghola inambiko yetu ya ukulakatsighwa na ya usaghe, na yang'alekile kutulangusa aghano ghose na kutulongela malaghitso aghano."

24 Kuya mwehe wake Manoa keleka mwana mmale na kamkema Samsoni. Imwana ayo kakula, naye IMNDEWA kambaliki. 25 Ghumuhe ghwa IMNDEWA Imulungu ghwanza kusang'ana mghati mwake hayakalile ako Mahane Dani haghati ha Sola na Eshitaoli.