1 Wanu wa Isiraeli tsawelighita ako Mizipa, walonga, "Kuduhu munu wowose mna twetwe iyatsomlapfa mwanaghe yakwelighwe na iwanu wa likabila lya Benjamini." 2 Apfo Waisiraeli waghenda ako Beteli kulomba, wakala kuko mbaka nemihe, wakemelela na wamlilila Imulungu kwa usungu. 3 Walonga, "Ghwe IMNDEWA, Imulungu wa Isiraeli, heule chinu chino chiwalawila Waisiraeli? Heule likabila limwe lyakwagha leloli mna Isiraeli?"

4 Ilupfi iwanu walamka nemitondo tondo, watsenga matsabahu, na baho walapfa nambiko tsa ukulakatsighwa na nambiko tsa ukukala tseghemba. 5 Kuya Waisiraeli weghutsa, "Angu kuna wanu mna ghamakabila gha Isiraeli ng'awaghendile baye kudando kuna ghumtingano ghwe IMNDEWA ako Mizpa?" Kwaapfila tsawelighita ka kuna munu ng'aghendile baye kuna ghumtingano ghwe Imulungu ako Mizpa, ayo katsokomighwa. 6 Lekeni Waisiraeli wawonela libatsi ndughu tsawo Wabenjamini, walonga, "Leloli Waisiraeli waghitsa kabila limwe. 7 Lelo tutsotenda choni ili Wabenjamini iwakalile waghima wapate mapinga? Kwaapfila tsatwilaha kwa IMNDEWA ka ng'atutsowalapfa baye wana wetu wakwelighwe nawo." 8 Kuya weghutsa, "Angu kuna wanu mna ghamakabila gha Isiraeli ng'awaghendile baye kuna ghumtingano ghwa IMNDEWA ako Mizpa?" Baho tsawatanga ka kuduhu munu iyalawile Yabeshi Gileadi iyaghendile kuna mtingano agho. 9 Waisiraeli hawapetighwe ako Mizpa, tsakuduhu munu wowose iyaghendile ako kulawa Yabeshi Gileadi.

10 Apfo mtingano aghwo ghwa Waisiraeli ghutuma wanu elufu kumi na mbili, iwadahile kwitowa ng'ondo, na wawalaghitsa apfino, "Mghende Yabeshi Gileadi, mkamkome kwa limaghe chila munu iyokala kuko, wakomeni wapinga na iwana. 11 Mkatende apfino, wakomeni wamale wose na chila pinga iyawasile na mmale." 12 Nawo wawona mapinga miya nne yang'ana wawase na mmale iwakalile mna iwanu wa Yabeshi Gileadi. Wawasola wawaghala kuna indalo ako Shilo mna isi ya Kanaani. 13 Kuya ghumtingano ghwose ghwa Waisiraeli ghutuma nume ya ukukala tseghamba kwa Wabenjamini iwakalile kuna libambalawe lya Rimoni. 14 Wabenjamini bahala woya, weng'ighwa mapinga awala yang'awana wawase na mmale wa Yabeshi Gileadi iwalekighwe kukomighwa. Lekeni wapinga awo ng'awawenele baye.

15 Waisiraeli wawonela libatsi Wabenjamini, kwaapfila IMNDEWA kalileka likabila limwe chidogho lihupe mna ghamakabila agho gha Isiraeli. 16 Na wakulu wa ghumtingano aghula walonga, "Lelo tutendetse ili tuweng'e iwamale iwalihela wapinga kwaapfila wapinga wose wa likabila lya Benjamini wakomighwa?" 17 Iwamale wa likabila lya Benjamini, iwalekighwe kukomighwa wobamighwa weng'ighwe wapinga, ili weleke wana likabila lighendelele, apfo kuleke ukwagha kwa likabila limwe mna Isiraeli. 18 Lekeni ng'atudaha baye kuwaleka wawakwele wana wetu, kwaapfila tsatwilaha apfino, "Katsolighitighwa imunu ayula iyomlapfa imwanaghe yakwelighwe na Mbenjamini."

19 Baho walonga, "Lola, ichihungo cha IMNDEWA ichitendekagha ako Shilo chila mwaka ng'ambe cha habehi." Ghumji agho ghwa Shilo tsa ghwa kasikazini mwa Beteli, ubali wa mashaliki kuna inzila ng'ulu ilawa Beteli kughenda Shekemu, kusini mwa Lebona. 20 Apfo wawalaghitsa Wabenjamini wamale apfino, "Mghende mkepfise mna imighunda ya mitsabibu. 21 Mkale meso, iwandele wa Shilo hawolawa kunze kupfina kuchihungo, mwemwe mlawe mna imitsabibu na chila munu yasole kwa ngupfu mndele yumwe yawe mwehe wake. Kuya muye mna isi ya Benjamini. 22 Aba tsawo na ndughu tsawo hawatsakutsa kutughutsa twetwe tutsowalongela, ‘Twowalomba muwonele libatsi iwanu wa Benjamini na muwaleke wawasole wapinga awo, kwaapfila ng'atuwasolele baye chila munu mwehe wake kulawa kung'ondo. Namwe ng'amtsakuwa na totso baye kwaapfila ng'amuwalapfile wenyegho baye iwanenu wakwelighwe nawo.’" 23 Apfo pfipfo pfawatendile Wabenjamini, iwandele hawang'ali wopfina, chila mmale kesaghulila mndele yumwe na kamsola yawe mwehe wake. Kuya woya mna isi yaweng'ighwe na watsenga miji yawo keli na kukala mumo. 24 Mna matsuwa agho Waisiraeli woya, chila munu koya kuna likabila lyake na kuna ilukolo lwake, na kuna isi yake. 25 Matsuwa ghagho Waisiraeli wakala wahela mfalume, apfo chila munu katenda ka pfayonile pfinogha.