1 Lelo ako Gileadi tsakuna munu iyadahile kwitowa ng'ondo iyakemighwe Yefta, mwana wa pinga yumwe chiweghe, na aba wake kakemighwa Gileadi. 2 Mwehe wake Gileadi pfipfila kamwelekela wana wangi. Iwana wa mwehe ayo hawakulile, wamuwinga Yefta yoke ukaye yawo, wamlongela, "Ghweghwe ng'utsopata chinu chochose baye kulawa kwa aba wetu, kwaapfila ghweghwe kwa mwana wa pinga wa kunze." 3 Apfo Yefuta katsuma kawaleka ndugu tsake kaghenda kukala mna isi ya Tobu. Kuko wanu mbughilambughila wetingana naye, waghenda naye.

4 Matsuwa chidogho hambele, Waamoni watsa kuwatowa Waisiraeli. 5 Hailawile apfo, wakulu wa Isiraeli waghenda kumsola Yefta kulawa isi ya Tobu. 6 Wamlongela, "Utse utulongotse hatwitowa na Waamoni." 7 Lekeni Yefuta kawalongela, "Angu si mwemwe baye yamnihile na kuniwinga ukaye kwa aba wangu? Lelo mwonitsila kwaapfila mwoghaya?"

8 Iwakulu awo wa Gileadi wamlongela, "Acho chicho chitutendile mbaka tutsa kuna ghweghwe ili tuke naghwe ukatwapfile ukwitowa na Waamoni, naghwe kutsotulongotsa twetwe na iwanu wose wa Gileadi."

9 Yefuta kawalongela, "Ka mng'ambuyitsa ukaye nighende na mwemwe niketowe na Waamoni, naye IMNDEWA yang'anyapfila kuwatowa, pfihi nitsakuwa chilongotsi wenu ghendo?"

10 Wakulu wa Gileadi wamwidika, "IMNDEWA katsakuwa mkalangama wetu. Na twetwe tutsotenda ka pfaulongile."

11 Apfo Yefuta kaghenda nawo, nawo wamtenda yawe chilongotsi wawo, na ako Mizpa koyila keli ukughalonga hambele ha IMNDEWA aghala ghose ghayalongile na iwakulu.

12 Baho Yefuta katuma wasenga waghende kwa mfalume wa Waamoni kamlongela, "Una choni na twetwe mbaka utse witowe na iwanu wa isi yetu?" 13 Imfalume wa Waamoni kawedika iwasenga awo iyawatumile Yefta, "Waisiraeli hawalawile Misiri, wasola isi yangu kulawa Arinoni mbaka Yaboki na ghumto Yoridani. Lelo mbuyitsile isi yangu bila ukwisonga."

14 Yefta katuma keli wasenga waghenda kwa mfalume wa Waamoni. 15 Wamlongela, "Yefta kolonga apfino, ‘Waisiraeli ng'awaisolile baye isi ya Moabu wala isi ya Waamoni. 16 Lekeni Waisiraeli hawalawile Misiri, wang'ila mnyika mbaka kuna ibahari ya Shamu mbaka Kadeshi. 17 Kuya Waisiraeli watuma wasenga waghende kwa mfalume wa Edomu, wamlomba yawaleke wapfose mna isi yake, lekeni mfalume wa Edomu kalema. Apfo wamlomba mfalume wa Moabu, naye pfipfila kalema. Apfo Wasiraeli wakala mna isi ya Kadeshi. 18 Pfipfila wabitila mnyika na kuitsunguluka isi ayo ya Edomu na isi ya Moabu, mbaka wapfika ubali wa mashaliki wa isi ya Moabu. Kuya weka ndalo kumwambu kwa ghumto Arinoni. Lekeni ng'awengile baye mna isi ya Moabu kwaapfila ghumto Arinoni ghugho ghumbaka ghwa isi ya Moabu. 19 Baho Waisiraeli watuma wasenga waghende kwa mfalume wa Sihoni wa Waamori ako Heshiboni wamlomba yawaleke wabite mna isi yake waghende kuna isi yawo. 20 Lekeni Sihoni ng'awatogholele baye Waisiraeli wapfose mna isi yake. Apfo Sihoni kawatinganitsa iwanu wake wose, weka indalo ako Yahasa, wetowe na Waisiraeli. 21 Naye IMNDEWA Imulungu wa Isiraeli, kawapfila Waisiraeli wamtowa Sihoni na iwanu wake. Apfo Waisiraeli waisola isi yose ya Waamori iwang'ali wokala ako. 22 Waisola isi yose ya Waamori kulawa ghumto ghwa Arinoni mbaka ghumto Yaboki, pfipfila wasola kulawa kunyika ubali wa mashaliki mbaka ubali wa maghalibi wa ghumto Yoridani. 23 Baho IMNDEWA Imulungu wa Isiraeli kawawinga Waamori woke hambele ha Waisiraeli. Pfihi ghweghwe naghwe kobama utuboke isi yetu? 24 Wenele na achila chayakwing'ile imulungu wako Kemoshi. Lekeni isi yoyose IMNDEWA Imulungu wetu iyawawawingile iwanu wake yatwing'e twetwe, ayo yetu. 25 Pfii ghweghwe kuna ngupfu kubita Balaki mwana wa Sipori iyakalile mfalume wa Moabu? Angu yeye ng'esongile baye na Waisiraeli au kwitowa nawo? 26 Waisiraeli tsawakala mna ghumji ghwa Heshiboni na pfijiji pfake, mna ghumji ghwa Aroeri na pfijiji pfake, na mna imiji yose ikalile mmbalimbali mwa ghumto Arinoni kwa miyaka miya ndatu. Heule ghweghwe ng'uisolile baye mna ghamatsuwa agho? 27 Nene sitendile totso kuna ghweghwe, lekeni ghweghwe konendela ghehile kwa kwitowa na nene. IMNDEWA yuyo yolamla. Leloli yeye katsakuwa mlamtsi wa Waisiraeli na Waamoni.’" 28 Lekeni mfalume wa Amoni kabetsa achila chayalongile Yefta.

29 Kuya Muhe wa IMNDEWA kamtsila Yefta, naye kaghenda kubitila Gileadi na Manase, koya Mizpa mna isi ya Gileadi, na kawaghendela iwana wa Amoni. 30 Yefta kelaha kwa IMNDEWA, kalonga, "Ning'ahuma kuwatowa Waamoni, 31 chochose ichitsolawa kunze kulawa mng'anda mwangu kutsa kutingana na nene hanikuya kulawa kwa Waamori waniwatowile, acho chitsakuwa chakwako ghweghwe IMNDEWA. Acho nitsokulapfila chiwe nambiko ya ukulakatsighwa."

32 Apfo Yefta kaloka ghumto kaghenda kwitowa na Waamoni, naye IMNDEWA kamwapfila kawahuma.

33 Kawatowa kulawa Aroeri mbaka kupfikila Miniti, na kaghendelela mbaka Abeli Keramimu. Apfo Waamoni watowighwa ghendo na Waisiraeli.

34 Yefta hayoyile ukaye yake Mizpa, mndele wake kalawa katsa kumbokela aku kopfina na kutowa chighoma. Ayo tsakakala mwanaghe nyalimwe, kahela mwana yungi. 35 Yefta hayamwonile, kadegha maghwanda ghake kwa usungu kalonga, "Ghwe mwanangu, kunenda mbone usungu, ghweghwe kwa yumwe wa iwanu iwonidununza, nene nilaha kwa IMNDEWA, na sidaha baye kuleka kutenda chanilahile."

36 Imndele ayo kamlongela, "Ka kwilaha kwa IMNDEWA, unitende achila chawilahile, kwaapfila IMNDEWA kakwapfila kuwatowa Waamoni." 37 Kuya kamlongela aba wake, "Nokulomba chinu chimwe, ungaye miyetsi mili ng'ende na sale tsangu kuchidunda nikadomboketse kwaapfila nitsakufa ng'ana nikwelighwe." 38 Aba wake kamleka yaghende ako kwa miyetsi mili, naye kaghenda na sale tsake kuchidunda na wadomboketsa kwaapfila katsakufa ng'ana yakwelighwe. 39 Miyetsi mili haimalile, koya kwa aba wake naye kamtenda ka pfayelahile, naye imndele ayo tsang'awasile baye na mmale wowose. Apfo kulawa aho tsakukala na chihendo achino mna isi ya Isiraeli.

40 Chila mwaka wandele wa Isiraeli wang'ali woghendagha kudomboketsa ukumkumbuka imwanaghe Yefta wa Gileadi kwa matsuwa mane.