1 Imalaika wa IMNDEWA tsakoka ako Giligali, kaghenda Bokimu, kawalongela Waisiraeli Imulungu kolonga apfino, "Nene niwalapfa mna isi ya Misiri, na niwaghala mna isi yanilaghane kwa kwilaha na iwabala wenu ka nitsoweng'a. Tsanonga apfino, ‘Nene sitsolileka baye ghendo lilaghano lyangu lyanilaghane na mwemwe, 2 namwe mleke kwika laghano lyolyose na iwanu wa isi aino, na tsimatsabahu tsawo mtsibomole.’ Lekeni mwemwe ng'amnitegheletse baye. Hebali mwemwe mtendile aghano? 3 Apfo lelo nowalongela, ‘Sitsowawinga keli baye iwanu awano iwokala muisi aino,’ wawo watsowatsupfa, nawo watsakuwa kama mihonga iwahoma mmbapfu mwenu, na imilungu yawo itsakuwa mtegho kuna mwemwe." 4 Aho imalaika wa IMNDEWA hayalongile agho kwa Waisiraeli wose, iwanu watula ndilo. 5 Na wahakema hanu ahala Bokimu kwa chiebraniya Bokimu mana yake "Iwanu watula ndilo", na baho wamlapfila IMNDEWA nambiko tsa ukulakatsighwa.

6 Baho Yoshuwa hayawalekile iwanu woke, chila munu kaghenda hanu hake hayagholighwe, kuisola isi iwe yake. 7 Waisiraeli wamtumikila IMNDEWA matsuwa ghose Yoshuwa hayakalile mghima, na pfipfila mna ghamatsuwa ghose gha ughima wa iwabala tsawo awala iwonile tsisang'ano ng'ulu tsose IMNDEWA tsayawatendele iwanu wa Isiraeli. 8 Yoshuwa imwana wa Nuni, na mtumighwa wa IMNDEWA, kafa aku kana miyaka miya na kumi.

9 Nawo wamtsika mna isi iyagholelighwe iwe yake, ako Timunati Heresi, mna isi ya pfidunda pfa Efuraimu, ubali wa Kasikazini wa ichidunda cha Gaashi. 10 Kuya iwanu wose wa mweleko ghwake nawo wafa, na ghwoneka mweleko ghungi ghwa wanu ing'awammanyile IMNDEWA wala tsisang'ano tsake tsiyawatendele iwanu wa Isiraeli.

11 Apfo Waisiraeli wamtendela ghehile IMNDEWA, nawo waitambikila milungu ikemighwa Mabaali. 12 Wamleka IMNDEWA, Imulungu wa iwabala tsawo, iyawaghalile kulawa isi ya Misiri, wawinza milungu ingi, mna imilungu ya iwanu iwakalile habehi nawo chila ubali, wenama hambele ha imilungu ayo, wamtenda IMNDEWA yaghudubuke.

13 Wamleka IMNDEWA, waisang'anila milungu ikemighwe Mabaali na Maashitoreti. 14 Apfo IMNDEWA kawaghudubukila Waisiraeli, naye kawaleka iwanu wangi wawaboke tsimali tsawo. Kawaleka watowighwe na iwanu iwowehila chila ubali, na ng'awadahile keli baye ukwiyamila na iwehile wawo. 15 Kwokwose kwawaghendile kwitowa, ghumoko ghwa IMNDEWA ghwinulighwa kuwatendela ighehile, ka pfipfila pfayawakanyile na pfayewalahile. Apfo tsawakala na usungu mkulu.

16 Kuya IMNDEWA kaweng'a walamtsi, iwawakombole kulawa mna ghamoko gha iwanu iwawabokile tsimali tsawo.

17 Hata apfo Waisiraeli ng'awawahulikitse baye walamtsi wawo, mana wawa pfiweghe kwa kuiwinza na kuitambikila milungu ingi. Wasumkila ukughaluka na ukuileka inzila aila yawawinzile iwabala wawo, iwaghakindile ghamalaghitso gha IMNDEWA, lekeni wawo ng'awaghakindile baye. 18 Chila IMNDEWA hayaweng'ile mlamtsi, yeye imwenyegho yang'ali yomwapfila imlamtsi ayo na kuwakombola kulawa mna ghamoko gha awala iwawehile, mna ghamatsuwa ghose gha ughima wa imlamtsi ayo, kwaapfila IMNDEWA tsakawonela libatsi ahala hayahulike chililo chawo kwa ukughaya na ukughanzika kwawapatile. 19 Lekeni chila imlamtsi hayafile, iwanu woyila tsinzila tsawo tsihile tsa ghumwande, watenda ghehile kubita iwabala wawo. Waiwinza milungu ingi, waisang'anila na kuitambikila, na walema ghendo ukughaleka ighehile na tsinzila tsawo tsihile.

20 Apfo IMNDEWA tsakawaghudubukila ghendo Waisiraeli kalonga, "Kwaapfila iwanu awano ng'awalikindile baye lilaghano lyangu lyanyikile na iwabala tsawo, nawo ng'awanitegheletse baye, 21 nene sitsowawinga keli baye iwanu awala iyawalekile Yoshuwa ahala hayafile. 22 Nitsowatumila iwanu awo kuwaghetsa Waisiraeli, mbone ka watsoiwinza inzila ya IMNDEWA, kubita mna inzila ayo ka pfawatendile iwabala tsawo, au baye."

23 IMNDEWA kaghaleka makabila agho, wala ng'asumke baye kughawinga kwa kugheka mna ghamoko gha Yoshuwa.