1 Nemitondotondo, Yeru Baali, pfipfila iyakemighwe Gidioni na iwanu wake iwakalile hamwe naye walamka, weka indalo yawo mlwanda habehi na imbwibwi ya Harodi. Nawo Wamidiani tsaweka indalo yawo ubali wa kasikazini habehi na ichidunda More, mlwanda.

2 IMNDEWA kamlongela Gidioni, "Iwanu wauli nawo wengi ng'ani kwa nene ukuwatenda Wamidiani watowighwe na mwemwe, Waisiraeli tsawaleke kwitunya hambele hangu walonge ka wekombola wenyegho. 3 Lelo walongele apfino iwanu, ‘Imunu wowose iyodedema na iyopfuka yahunduke yoye ukaye yake.’" Apfo iwanu elufu ishilini na weli woka ukaye naye kakala na wanu elufu kumi iwasighale.

4 Lekeni IMNDEWA Imulungu kamlongela Gidioni, "Iwanu wauli nawo wang'ali wengi sideke, wahulumse kuna imbwibwi, nani nitsowaghetsa ako, imunu wowose yanitsokulongela, ‘Ayuno katsoghenda naghwe,’ ayo yaghende naghwe. Lekeni yanitsokulongela ‘ng'atsoghenda naghwe baye,’ imunu ayo yaleke kughenda naghwe." 5 Apfo Gidioni kawasola iwanu awala kahulumka nawo kuna imbwibwi, na IMNDEWA kamlongela, "Kutsowabaghula iwanu awala iwolambita ghamatsi kwa milimi yawo ka yumbwa na awala iwakunwa ghamatsi kwa kutowa mapfindi." 6 Iwanu iwanwele ghamatsi kwa kudegha kwa ghamoko ghawo tswapetighwa wapfika wanu miya ndatu, lekeni wamwenga tsawanwa ghamatsi kwa kutowa mapfindi. 7 IMNDEWA kamlongela Gidioni, "Nitsowakombola kubitila iwanu miya ndatu iwanwele ghamatsi kwa kulambita ka yumbwa, na nitsowatenda Wamidiani watowighwe na ghweghwe. Lekeni awano wamwenga muwaleke woke, chila munu ukaye yake." 8 Baho iwanu awala wasola ipfijo pfawo na tsimalati tsawo kuya Gidioni kawaleka woke chila munu kuna indalo yake, lekeni awala miya ndatu tsakawaleka. Na indalo ya Wamidiani tsaikala kuhisi kunyika.

9 Chilo chicho IMNDEWA kamlongela Gidioni, "Ulamke uhulumke kuhisi ukawatowele mna tsindalo tsawo kwaapfila nitsokutenda uwahume. 10 Lekeni ka kopfuka kuhulumka, uhulumke na mtumwa wako Pura. 11 Ako kutsohulika ghose ghawolonga, naghwe kutsopata ngupfu ya kuwatowa." Apfo Gidioni kahulumka na mtumwa wake Pura mbaka hanu hawakalile wabetetsi wa indalo ya Wamidiani. 12 Wamidiani na Waamaleki na iwanu wose iwolawila ubali wa mashariki tsawakala mlwanda, tsawawengi ka nzighe, na wangamia wawo ng'awodaha ukupetighwa baye, tsawawengi ka msanga.

13 Gidioni hayapfikile, kahulika munu yumwe komsimulila miyaghe pfayalotile, kalonga, "Miyagho tsandota apfino, mbona chighate cha shayili chilaghala mbaka mna indalo ya Wamidiani, chihonda hema, na kulibidula lihema alyo mbaka hasi."

14 Miyaghe kamwidika, "Indoto ayo yomlonga Gidioni munu wa Isiraeli, mwana wa Yoashi, na si chinu chingi baye. IMNDEWA kamtenda yawahume Wamidiani na lijeshi lyetu lyose."

15 Gidioni hayahulike imunu ayo pfayalotile na chayalotile chilonga choni, kamfughamila IMNDEWA. Kuya koya kuna indalo ya Waisiraeli, kawalongela, "Mwinuke tuke, kwaapfila IMNDEWA Imulungu katutenda tuwahume Wamidiani." 16 Apfo kawaghola makingili madatu iwanu awala miya ndatu, na kaweng'a malati na pfiya pfina imiwenge ya ghumoto. 17 Kawalongela, "Mndole na mtende chanitsotenda ahala hanitsopfika habehi na indalo. 18 Nene na wayangu iwali na nene hatutsotowa tsimalati tsetu, namwe mtowe tsimalati tsenu chila hanu hamli na kukemelela, mlonge, ‘Kwa IMNDEWA na kwa Gidioni.’" 19 Ng'ana chilo ghati chingile ghendo baye, Gidioni na iwanu awala miya imwe iwakalile hamwe naye wapfika kwaitsighile indalo, ahala wabetetsi Wamidiani hawang'ali webokela. Watowa tsimalati tsawo na kutula ipfiya ipfili mmwoko mwawo. 20 Makingili ghose madatu gha iwanu ghatowa tsimalati tsawo, na watula ipfiya pfawo. Na mna ghamoko ghawo gha kumoso wakinda imiwenge ya ghumoto na mna ghamoko ghawo gha kujilo wakinda tsimalati tsawo na kutsitowa na walonga, "Limaghe lya Gidioni na lya IMNDEWA!" 21 Chila munu kema hanu hake kutsunguluka indalo. Wamidiani wose watsuma aku wokemelela. 22 Iwanu wa Gidioni hawatowile tsimalati tsawo miya ndatu, IMNDEWA kawatenda Wamidiani wekome iwenyegho kwa wenyegho kwa limaghe. Awala iwakalile waghima watsumila Beti Shita, waghendelela mbaka Serera mbaka kuna ghumbaka ghwa Abeli Mehola habehi na Tabati.

23 Waisiraeli wa likabila lya Nafutali, Asheri na Manase, wose tsawetingana hamwe wawawinza Wamidiani. 24 Kuya Gidioni katuma wanu mna isi yose ya pfidunda ya Efuraimu kalonga, "Muhulumke muwatowe Wamidiani na muwaghome kwa kuboka pfikolongo na ghumto Yoridani mbaka Beti Bara." Apfo wamale wose wa Efuraimu watsa waghuboka ghumto Yoridani mbaka Beti Bara. 25 Pfipfila wawaghogha pfilongotsi weli wa Wamidiani, Orebu na Zeebu. Wamkoma Orebu mna libambalawe lya Orebu, naye Zeebu wamkomela hanu ha ukukamila tsinzabibu ha Zeebu. Kuya waghendelela kuwawinza Wamidiani na wamghalila Gidioni ghamatwi gha Orebu na Zeebu kumwambu kwa ghumto Yoridani.