1 Ehudi hayafile, Waisiraeli watenda keli ghehile hambele ha IMNDEWA.

2 Apfo IMNDEWA kawaleka watowighwe na mfalume Yabini wa Kanaani, iyatawale ako Hazori, na Sisera tsakakala chilongotsi mkulu wa iwanu wa ing'ondo, naye yang'ali yokala ako Harosheti Hagoimu.

3 Kwaapfila Yabini tsakana mituka ya chuma ya ng'ondo miya tisa, naye tsakawadununza ng'ani Waisiraeli kwa miyaka ishirini, nawo wamlilila IMNDEWA yawapfile.

4 Lelo mna ghamatsuwa agho tsakukala na nabii pinga iyakemighwe Debora, pinga wa Lapidoti, naye tsa mlamtsi wa Isiraeli. 5 Debora yang'ali yolamlitsa maghomba hasi ha mbiki ghwa mtende ighukemighwe Mtende ghwa Debora, ighukalile haghati ha imiji ya Rama na Beteli, mna isi ya ipfidunda pfa Efuraimu. Waisiraeli tsawang'ali wogheluka womghendela yakawalamle maghomba ghawo. 6 Ayo katuma munu yakamkeme Baraki mwana wa Abinoamu iyokala Kadeshi mna isi ya Nafutali. Naye hayatsile kamlongela, "IMNDEWA, Imulungu wa Isiraeli kokulaghitsa apfino, ‘Ghenda usaghule wanu wako elufu kumi kulawa mna ghamakabila gha Nafutali na Zabuloni, na uwatinganitse kuna ichidunda cha Tabori. 7 Na nene nitsomghala Sisera, ichilongotsi mkulu wa ng'ondo wa Yabini, yatse na wanu wake na mituka yake yetowe naghwe hana ghumto ghwa Kishoni, na nitsomtenda yakutowe.’ " 8 Baraki kamlongela Debora, "Ka kutsoghenda na nene, noghenda. Lekeni ka ng'utsoghenda na nene baye, nani sitsoghenda baye." 9 Debora kamwidika kalonga, "Pfinogha, nitsoghenda naghwe, lekeni ako kwaughenda ng'utsotunyighwa baye kwa ukuhuma ing'ondo, kwaapfila IMNDEWA katsomleka Sisera yatowighwe na ipinga." Apfo Debora kenuka, kelongotsa na Baraki waghenda Kedeshi. 10 Ako Kadeshi Baraki kawakema na kawatinganitsa Wazabuloni na Wanafutali, na wanu elfu kumi wagheluka wamghendela. Naye Debora kaghenda hamwe naye.

11 Matsuwa agho Heberi, iyakalile Mkeni, tsakebaghula na Wakeni wayaghe iwakalile watsukulu wa Hobabu, mlamu wake Musa, naye tsakatsenga hema lyake kutali kuna ghumbiki mkulu ighukemighwe mwaloni ako Zaananimu, habehi na Kedeshi.

12 Wanu wamlongela Sisera ka Baraki mwana wa Abinoamu kagheluka kuchidunda Tabori. 13 Sisera kakunga mituka yake yose, mituka miya tisa ya chuma, na kawakema iwanu wake wose wa ing'ondo, kaghenda nawo kulawa Harosheti Hagoimu, mbaka kuna ghumto ghwa Kishoni. 14 Debora kamlongela Baraki, "Winuke ughende! Kwaapfila leloli lilyo litsuwa IMNDEWA liyamlekile Sisera yatowighwe na ghweghwe. Angu IMNDEWA ng'akulongolele hambele hako?" Apfo Baraki kahulumka kulawa kuchidunda Tabori na wanu elufu kumi wamuwinza. 15 IMNDEWA kamuweghetsa Sisera na iwanu wake wose, na iwakulu wake wa ing'ondo wose kwa mimaghe itema hambele ha Baraki na wanu wake, kahulumka mna ghumtuka ghwake ghwa chuma, katsuma kwa mighulu. 16 Lekeni Baraki kawawinza iwanu wa ing'ondo na imituka yawo ya chuma mbaka Harosheti Hagoimu, kawakoma iwanu wose wa Sisera kwa limaghe, ng'alekile munu mghima hata yumwe.

17 Sisera tsakatsumila kuna lihema lya Yaeli, mwehe wa Heberi, Mkeni, kwaapfila Yabini mfalume wa Hazori tsakakala tseghamba na iwanu wa ikaye ya Heberi, Mkeni. 18 Yaeli kalawa kunze yakambokele Sisera, naye kamlongela, "Ghwe mfalume wangu, wingile mng'anda, uleke kupfuka." Apfo kengila mna lihema lyake, naye kamghubika na mgholole. 19 Sisera kalonga, "Nina ng'ilu, nokulomba ungaye matsi chidogho nuwe." Yeye kasola matsiwa kamwing'a kanwa, kuya kamghubika keli. 20 Sisera kamlongela Yaeli, "Wime hana ghumlango ghwa lihema, na munu wowose yang'atsa kukughutsa kulonga, ‘Pfihi ahano hana munu?’ Ubele, ulonge, ‘Mbe! Haduhu munu.’" 21 Lekeni Yaeli, mwehe wa Heberi, kasola chighingi cha lihema na nyundo, kamghendela kwa kumnyatila, aku imwenyegho kamnongo, kwaapfila tsakepfa na ghumwanza, kachikomelela ichighingi achila mchihanga mwake, nacho chingila mbaka chilawilila mlidongo. Baho Sisera kafa. 22 Naye Baraki hayang'ali yomuwinza Sisera, Yaeli kalawa kunze yambokele, kamlongela, "Utse, na nene nitsokulangusa imunu yumbama." Baraki kengila mng'anda mwa lihema lya Yaeli, na kampfika Sisera kahasi, kafa, na ichighingi cha lihema cha mchihanga mwake.

23 Apfo mna litsuwa alyo IMNDEWA kamtowa Yabini, mfalume wa Kanaani, hambele ha iwana wa Isiraeli. 24 Waisiraeli waghendelela kuwa na ngupfu na kumtowa Yabini, mfalume wa Kanaani, mbaka hawamkomile ghendo ayo Yabini, imfalume wa Kanaani.