1 Litsuwa limwe Samsoni kaghenda kuna ghumji ghwa Timna, kamwona pinga yumwe Mfilisti. 2 Hayoyile ukaye kawalongela aba wake na mai wake, "Nimwona pinga yumwe mwali Mfilisti ako Timna. Mnikwelele imwali ayo."

3 Aba wake na mai wake wamghutsa, "Pfihi kuduhu pinga wowose mna ndughu tsako au mna iwanu wetu mbaka ughende ukakwele kwa Wafilisti, iwanu ing'awengile ngoma baye?" Lekeni Samsoni kamlongela aba wake, "Mnikwelele imwali ayo, kwaapfila konoghela sideke."

4 Lekeni aba wake na mai wake ng'awamanyile baye ka chinu achi cha IMNDEWA, na IMNDEWA yang'ali yobama ghomba lya ukuwatowela Wafilisti. Kwaapfila matsuwa agho Wafilisti tsawawatawala Waisraeli.

5 Samsoni kahulumka kaghenda Timna, yeye na aba wake na mai wake, na hawapfikile mna imighunda ya mitsabibu ako Timna, baho kwa kwidukitsa kalawila simba mdoghodogho kamdumila Samsoni. 6 Baho Muhe wa IMNDEWA kamtsila Samsoni kwa ngupfu, naye kambatsula kwa ghamoko ghake ka imunu yombatsula mwana wa mene. Lekeni ng'amlongele baye aba wake wala mai wake ichinu chayatendile. 7 Kuya hawapfikile Timna Samsoni, kaghenda kulonga na imwali ayula, naye imwali ayula kamnoghela Samsoni sideke.

8 Matsuwa chidogho haghabitile, koya keli Timna yakamkwele imwali ayo. Hayang'ali ka mnzila kabaghuka hambalimbali kona ghumtsogha ghwa isimba ayula, kumbe tsamna nzukwi wengi na uki mwingi mghati mwa ghumtsogha aghula. 9 Kabakula uki kwa ghamoko kaghenda yakuja. Hayawapfikile aba wake na mai wake, kaweng'a uki aula, nawo waja. Lekeni ng'awalongele baye ka kasola uki aula kulawa mghati mwa isimba ayula yafile.

10 Lelo aba wake kaghenda ukaye kwa ipinga ayo. Kuko Samsoni katenda chihungo cha ukuja kwaapfila apfo pfipfo iwamale pfawang'ali wotendagha. 11 Wafilisti hawamwonile, wamghalila wasongolo wayaghe salasini wadawale naye.

12 Samsoni kawalongela, "Leka niwategheni na ng'ungo imwe, ka mng'anongela ing'ungo ayo ilonga choni mna matsuwa saba gha ichihungo, nitsoweng'a maghwanda matselu selasini na maghwanda gha ichihungo selasini. 13 Lekeni ka ng'amdaha baye kunilongela, mngaye maghwanda matselu selasini na maghwanda selasini gha ichihungo."

Wedika walonga, "Haya, tulongele ing'ungo yako na twetwe tuitegheletse." 14 Naye kalonga,

"Kwa iyakuja kulawa chijo,

kwa iyana ingupfu kulawa ghumta."

15 Apfo mna litsuwa lya saba wamlongela mwehe wake Samsoni, "Mdedetse mmale wako yatulongele ing'ungo ayo ilonga choni, hela tutsokulakatsa ghweghwe na ng'anda ya aba wako. Angu mtukema ahano mtuboke pfinu pfetu?"

16 Mwehe wa Samsoni kamghendela Samsoni aku kolila, kalonga, "Ghweghwe konihila ghendo, ng'unikunda baye. Kuwateghela ng'ungo iwanu wangu na ng'unongele baye ing'ungo ayo ilonga choni."

Samsoni kamwidika, "Hata aba wangu na mai wangu siwalongele, lelo ikuwatse nikulongele ghweghwe?" 17 Naye mwehe wake kalila kwa matsuwa ghose ighasighale mna ghamatsuwa saba gha ichihungo. Mna litsuwa lya saba Samsoni kamlongela mwehe wake, kwaapfila yang'ali yomnanahitsa yamlongele. Naye kawalongela iwanu wake ing'ungo ayo ilonga choni. 18 Mna litsuwa lya saba litsuwa ng'ana litsame, iwanu wa ghumji wamlongela Samsoni,

"Chinu chachi chamta kubita uki?

Na yuhi yana ing'upfu kubita simba?"

Naye Samsoni kawedika,

"Ka ng'amlimile baye na ing'ombe wangu

ng'ambamile kutanga baye ing'ungo yangu."

19 Kuya Ghumuhe ghwa IMNDEWA ghumwingila kwa ngupfu. Kaghenda Ashikeloni, ako kakoma wanu selasini, kuya kasola maghwanda ghawo ghawapfalagha mchihungo, kaweng'a awala iwateghule ing'ungo yake ilonga choni. Kuya koka, kaghenda ukaye kwa aba wake na mai wake aku kaghudubuka. 20 Na imwehe wa Samsoni keng'ighwa sale yake yamkwele, mna awala iwakemighwe wadawale naye mchihungo.