1 Iwanu wa Efuraimu wetingana hamwe, waloka ghumto ghwa Yoridani waghenda Zafoni. Kuya wamlongela Yefuta, "Heule ng'autukemile baye tughende hamwe kuwotowa Waamoni? Lelo twoilakatsa ng'anda yako aku ghweghwe kwa mng'anda."

2 Yefuta kawalongela, "Nene na iwanu wangu tung'ali tuwehila sideke Waamoni. Tsaniwakema mnyapfila lekeni mwemwe ng'amtsile baye kunikombola. 3 Hambonile ng'amkutsa kunyapfila baye, tsanilapfa nife, ndoka niketowe na Waamoni, na IMNDEWA kanyapfila niwatowa Waamoni. Heule lelo mwakutsa kwitowa na nene?"

4 Apfo Yefta kawakema wanu wa Gileadi hamwe, waghenda waketowe na wanu wa Efuraimu. Na iwanu awo wa Gileadi wawatowa iwanu wa Efuraimu, kwaapfila wawo tsawalonga, "Mwemwe wanu wa Gileadi mwa wabita nzila iwalawile kuna likabila lya Waefuraimu na kughenda kwa likabila lya Manase."

5 Kuya iwanu wa Gileadi wapfiboka ipfiloko pfa ghumto ghwa Yoridani, ili Waefuraimu waleke kuloka. Chila mbita nzila wa Efuraimu yang'abama yaloke, iwanu wa Gileadi wamghutsa, "Pfii ghweghwe kwa Muefuraimu?" Yang'edika, "Aka," 6 wolonga pfinogha, "Lelo ulonge Shiboleti." Lekeni yeye yang'alonga, "Siboleti," kwaapfila Waefraimu ng'awadahile baye kulilonga ghoya, apfo wamghogha na wamkoma aho hana ipfiloko pfa ghumto ghwa Yoridani. Mna matsuwa agho Waefuraimu elufu alubaini na mbili wakomighwa. 7 Yefta tsakawa mlamtsi wa Waisiraeli kwa miyaka sita, kuya Yefta Mgileadi kafa na katsikighwa mna mji ghumwe ghwa isi ya Gileadi.

8 Hayafile Yefta, Ibizani, munu iyolawila Betilehemu kawa mlamtsi wa Isiraeli. 9 Yeye tsakana wana wamale selasini na wana wapinga selasini. Wanaghe wapinga awo kawalapfa wakwelighwe na wanu wa kolo tsingi. Pfipfila kawaghalila wanaghe wamale wapinga selasini kulawa kolo tsingi wawakwele. Ibizani kawa mlamtsi wa Isiraeli kwa miyaka saba. 10 Kuya Ibizani kafa na katsikighwa Betilehemu.

11 Hayafile Ibizani, munu yumwe taghwa lyake Eloni, yolawila mna likabila lya Zabuloni kawa mlamtsi wa Isiraeli kwa miyaka kumi. 12 Kuya Eloni kafa na katsikighwa mna ghumji ghwa Aiyaloni ighuli mna isi ya Zabuloni.

13 Hayafile Eloni, munu yumwe taghwa lyake Abidoni iyali mwana wa Hileli iyolawila mna ghumji ghwa Pilatoni kawa mlamtsi wa Isiraeli. 14 Naye tsakana wana wamale alubaini na watsukulu salasini, iwang'ali wodinagha pfihongwe sabini. Naye tsakawa mlamtsi wa Isiraeli kwa miyaka minane. 15 Kuya Abidoni mwana wa Hileli kafa na katsikighwa mna ghumji ghwa Pilatoni ighuli mna isi ya Efuraimu, mna isi ya pfidunda ya Waamaleki.