1 Tsuwa limwe Samsoni kaghenda kuna ghumji ghwa Gaza, kuko ketingana na pinga yumwe chiweghe, na kawasa naye. 2 Iwanu wa Gaza wahulika ka Samsoni tsakakuko, apfo wampfingilila na wang'ali wompfisila hana lilango lya ghumji chilo chose. Wakala tulu ghendo chilo chighima aku wepfikitsa ka wodaha kumkoma hakutsakucha nemitondo. 3 Lekeni Samsoni tsakawasa mbaka chilo ghati, kuya kalamka kaghenda kuna lilango lya ghumji, kuko kenula lilango na kalibula hamwe na mikufuli yake, kaiduta na kaghenda nayo kuna ichidanando cha ichidunda ichili habehi na Heburoni.

4 Hambele pinga yumwe iyakemighwe Delila kamnoghela Samsoni, ipinga ayo yang'ali yokala mna lwanda lwa Soleki. 5 Wakulu wa Wafilisti wamghendela Delila, wamlongela, "Umdedetse Samsoni yakulongele tsingupfu tsake nyingi kwatsilawa ili tudahe kumghogha na kumwoha. Ung'atenda apfo, chila yumwe wetu katsokwing'a pfihande selasini pfa fetsa." 6 Delila kamlongela Samsoni, "Dedede Samsoni! Unongele chinu chachi ichikutenda uwe na ngupfu nyingi, na imunu yodahatse kukwoha na kukuhuma?" 7 Samsoni kamlongela, "Ka wonyoha kwa mitsabi saba mibisi ya minde, nene nakuwa nyondenyonde ka munu wowose ayula." 8 Iwakulu wa Wafilisti wamghalila Delila imitsabi saba mibisi ya minde, naye kamwohela Samsoni imitsabi ayo. 9 Delila tsakeka wanu wambetetse Samsoni mna ichiheleto ichili mng'anda. Kuya kamkema, "Samsoni, Wafilisti wokutsila." Lekeni Samsoni kadumla imitsabi ayo ka apfila tsinyutsi pfatsidumka tsing'etingana na moto. Apfo tsingupfu tsake kwatsilawa ng'akumanyike baye. 10 Kuya Delila kamlongela Samsoni, "Ghweghwe kunibugha na kungutsukila. Dedede unongele pfaudaha ukwohighwa." 11 Samsoni kamwidika, "Wang'anyoha na mitsabi ya sambisambi, ng'ana yohe chinu baye, nene nakuwa nyondenyode ka munu wowose ayula." 12 Apfo Delila kasola imitsabi ya sambisambi, kamwohela, na kamlongela, "Samsoni, Wapfilisti wokutsila." Baho tsakuna wanu mna ichiheleto ichili mng'anda wompfisila Samsoni. Lekeni Samsoni kaidumla imitsabi ayo ka pfayodumla utsi. 13 Delila kamlongela Samsoni, "Mbaka sambi ung'ali kwonibugha na kwongutsukila. Unongele pfaudaha ukwohighwa." Samsoni kamlongela, "Ung'asuka tsimvili tsangu tsiwe mabutu saba na ung'aghoha na chitambala, na ung'achikatsa pfinoghile mna ingutso ya kufumila maghwanda, nene nakuwa nyondenyode ka munu wowose ayula." 14 Samsoni hayawasile, Delila kaghasuka hamwe mabutu saba gha tsimvili tsa Samsoni na kaghoha kwa chitambala na kaghakatsa ghendo na libiki Kuya kamlongela Samsoni, "Samsoni, Wafilisti wokutsila." Samsoni kalamka kulawa mnongo, kaiswekula ingutso aila na chitambala achila. 15 Kuya Delila kamlongela, "Udahatse kulonga, nokukunda aku ghumoyo ghwako ng'aghuli hamwe na nene baye? Ghweghwe kunibugha lwakadatu na ng'unongele baye tsingupfu tsako tsilawa kwani." 16 Delila tsakaghendelela kumtsupfa na kumdedetsa Samsoni kwa kumlongela mbuli tsitso chila tsuwa. Apfo Samsoni kepfa na ghumoyo ghwake ghudeseka chidogho yake. 17 Apfo kalonga ghose ighali mmoyo mwake, kamlongela, "Tsimvili tsangu atsino ng'ana tsibehighwe baye, kwaapfila nilapfighwa niwe wa Imulungu kulawa munda mwa mai wangu. Ning'abehighwa tsingupfu tsangu tsondawa, nene nakuwa nyondenyode ka munu wowose ayula." 18 Apfo Delila hayatangile ka Samsoni kamlongela ghose ighali mmoyo mwake, kawakema wakulu wa Wafilisti, kawalongela, "Mtse lwakeli kwaapfila Samsoni kanongela ichili mmoyo mwake." Apfo iwakulu wa Wafilisti wamghendela Delila aku wamghalila tsifetsa tsawalongile womwing'a. 19 Delila kamuwasitsa Samsoni mna ghamafindi ghake, kamkema imunu yatse yamghete ghamabutu aghala ghake saba. Kuya Delila kanza kumdununza Samsoni kwaapfila tsingupfu tsake tsa tsimlawa. 20 Delila kamlongela Samsoni, "Samsoni Wafilisti wokutsila!" Samsoni kalamka kulawa mnongo aku kaghitsa ka katsolawa na kuswekuka ka pfayatendagha. Kumbe ng'atangile baye ka IMNDEWA kamleka. 21 Wafilisti wamghogha na wambofula tsinenge, kuya wamghala mna ghumji ghwa Gaza, wamwoha kwa tsimingu tsa shaba, na wamwika yadughedughe usaghe kuna ligeletsa. 22 Lekeni tsimvili tsa Samsoni tsanza kukula keli tangiya hatsibehighwe.

23 Wakulu wa Wafilisti wetingana hamwe wadeng'elele na wamlapfile tsinambiko mlungu wawo iyokemighwa Dagoni. Lelo wang'ali wakwimba apfino, "Mlungu wetu katwapfila kutughoghela Samsoni, iyotuhila." 24 Imimoyo yawo haing'ali yodeng'elela, walonga, "Mkemeni Samsoni yatse yatutendele midawalo." Apfo wamlapfa Samsoni kuna ligeletsa, naye kawatendela midawalo, aku wamwika yeme haghati ya tsingutso 25 Iwanu hawamwonile Samsoni, wamtunya mlungu wawo, walonga, "Mlungu wetu katwapfila kutughoghela Samsoni, iyotuhila, iyahinyile isi yetu na iyawakomile iwanu wetu wengi." 26 Samsoni kamlongela imsongolo ayula iyamkindile ghumoko, "Undeke ng'inde tsingutso itsikindilisa ing'anda aino ili na nene nitsaghamile." 27 Lelo ing'anda tsaimema wanu wapinga na wamale, iwakulu wose wa Wafilisti tsawabaho. Na kuna ikano tsakuna wanu elufu ndatu wamale na wapinga, wose wang'ali womlolesa Samsoni pfayowatendela imidawalo na kumseka.

28 Baho Samsoni kamlomba IMNDEWA, kalonga, "Ghwee IMNDEWA Imulungu, nokulomba ung'umbuke. Ungaye ingupfu mala imwe keli, ghwe Imulungu, mbuyitse chawanendele Wafilisti kwa kutsibofula nenge tsangu." 29 Samsoni katsikinda tsingutso mbili tsa haghatighati itsikindilitse ling'anda lyose, ghumoko ghumwe ngutso imwe, na ghumoko ghwa keli ngutso ingi. 30 Kuya Samsoni kalonga, "Wime nife hamwe na Wafilisti." Katsikunughitsa kwa ngupfu tsake tsose, na ing'anda iwaghwila wakulu wose na iwanu wose iwali mng'anda. Apfo iwanu iyawakomile hayang'ali kakufa tsa wa wengi kubita awala iyawakomile hayang'ali kamghima. 31 Kuya ndughu tsake na iwanu iwali akaye ha aba wake wahulumka watsa kumsola na wagheluka naye, waghenda kumtsika haghati ha Zola na Eshitaoli, hanu hayatsikighwe Manoa, aba wake. Naye tsa mlamtsi wa Isiraeli kwa miyaka ishilini.